Abameli bamanye amazwe eZimbabwe namhla bethekelele indawo ezitshiyeneyo esabelweni seMmashonaland Central ngenjongo yokuhlolisisa umumo wodaba lodlakela kuleli.

Abameli laba abagoqela umeli wakwele Melika kuleli uMnumzana James MacGee, umeli welamangisi kuleli uMnumzana Andrew Pockock, umeli wele Japan kuleli uMnumzana Takeo Yoshikawa , umeli we European Union kuleli uMnumzana Exeviour Machal lomsekeli wele Netherlands uNkosikazi Leoni Cuelenaere bethekele indawo zama base okubikwa kutshaywa khona abantu kanye lezibhedlela kulesisabelo. Bafike endaweni ezigoqela i Mazoe, Howard, Chiweshe, Glendale le Mvurwi. E Mvurwi kube le nkinga amapolisa aze avale isango elikhulu lesibhedlela se Mvurwi General Hospital alisa ukuba izimota zabameli laba ziphume kuleyondawo bethi kumele ziye enkambeni ukuba amapolisa abuzisise umuntu wonke ngodaba lokwethekelela kwabo.

UMnumzana McGee kavumelananga lalokhu wacine esevula lelo gedi phambi kwamapolisa ahlomileyo ngokwakhe izimota zaphuma. Sezibuyela e Harare amapolisa labacuphi be CIO paphinde bamisa lezozimota ebezihamba ngalababameli intathelizindaba kanye lezisebenzi zama embassy okwesikhathi esifika kuhola elilodwa befuna ukwazi ukuthi bavela ngaphi, ukuyakwenzani kanye lokuthi balemvumo na eyokwethekelela indawo ezingaphandle kwe dolobha okwedlula amakilometre angamatshumi amathathu lanhlanu okuthiwa yi diplomatic note.

Ezinye indaba ngesiNdebele...