Umkhokheli wecele leMDC, uMnu. Morgan Tsvangirai ukhangelelwe ukuphindela ekhaya ngoMgqibelo. UTsvangirai, owasuka elizweni ngemva kokhetho ngoMbimbitho, ubephakathi kohlelo lokudinga uncedo lokuxazulula inkinga yokhetho emazweni angomakhelwane.

UTsvangirai ubesithi kasoze abuyele ekhaya ngoba esesabela impilo yakhe kumbe ukubotshwa. Kodwa umphathintambo wezemithetho, uMnu. Patrick Chinamasa uthembise ukuthi uTsvangirai kasoze abotshwe. Amapholisa alile ukuthi kwenziwe umkhosi wokuhlangabeza ukuphindela elizweni kukaTsvangirai eZimbabwe Grounds.

Lo ubungumbuthano wesine walelibandla wokwalela imvumo ngamapholisa athi asabela ukuthi kungaqhamuka udlakela.Kunjalo nje, uTsvangirai ubekhangelelwe ukukhuluma embuthanweni wakoBulawayo enkundleni ye White City Stadium ngeNsonto, lapho lelibandla belifuna ukuthakazelela ukunqoba kwalo phose zonke izihlalo kulelidolobho ekhethweni oludluleyo.

Kodwa amapholisa emba phansi athi lokhu akusoze kwenzakale. Isiphathamandla salelicele, uMnu Reggie Moyo, utshele uSithandekile Mhlanga we studio 7 ukuthi bahambise udaba lolu kugqwetha labo lamuhla ukuze lukhwezwe emthethwandaba baphiwe imvumo yokwenza lumbuthano.

Ezinye indaba ze studio 7...