Ikhomisheni ebona ngokuqutshwa kokhetho elizweni, iZEC, ithi ukhetho lwesibili lokudinga umongameli welizwe luzenziwa ngemva kwenyanga ezintathu sokwethulwe impumela yokhetho. Lokhu kutsho ukuthi ukhetho lolu lulakho ukwenziwa mhlaka 2 ngoNcwabakazi, kumbe 2 August. Umgcinisihlalo walikhomishini, uMnu. George Chiweshe utshele iStudio seven ukuthi ilanga leli lilakho ukudluliselwa phambili kodwa kaboni kungehlula ukuthi lolukhetho lwenziwe esikhathini asiqambileyo.

UMongameli Mugabe uzabe encintisana loMnu. Morgan Tsvangirai ngoba yibo abalandelanayo ekhethweni lukambimbitho kodwa phakathi kwabo akula owathola amavoti ayisilinganiso se 50 percent levoti elilodwa.

Umanyano wamazwe angezansi yezwekazi leAfrica, oweSadc uthi umumo oseZimbabwe awuvumeli ukuthi kuqhutshwe ukhetho olukhululekileyo.

Ekhuluma lenhlanganiso yezindaba i Reuters lamuhla unobhala jikelele walumanyano uMnu Tomaz Salomao uveze ukuthi iziphathamandla zeSadc eziseZimbabwe okwamanje ziphitsheke ngemizamo yokuthi ukhetho lwe run off lwenziwe kungeladlakela njalo ngendlela ezasuthisa amabandla womabili azancintisa, iZanu PF leMDC.

Kunjalonje, iMelika layo ithi ukuhlukuluzwa komeli wayo eZimbabwe labanye abakwamanye amazwe ngamapholisa izolo kuveza sobala ukuthi kweleZimbabwe akusoze kube lokhetho olukhululekileyo.

Umsekeli wesikhulumi secele le MDC elikhokhelwa nguMnu Arthur Mutambara uMnu Abednico Bhebhe, utshele uBrenda Moyo ukuthi uvumelana lembiko yeSadc leMelika, esithi abantu abahlala ezigabeni zemaphandleni baphakathi kokwethuselwa lokuncitshwa ukudla ngabasekela ibandla le Zanu PF, besethuselwa ngokuthi nxa bengavotelanga uMongameli Mugabe kukhetho oluzayo kuzakuba lempi esabekayo elizweni.

Ezinye indaba ZeStudio 7...