Ilunga le cele le MDC elikhokhelwa nguMnu. Morgan Tsvangirai, umuyi uMnu. Shepherd Jani otholakele ebulewe ngemva kokuthunjwa ngabacatshangelwa ukuthi ngabasekeli bebandla le ZANU PF ungcwatshiwe lamuhla kibo e Murehwa.
Umgcinisihlalo wabatsha kulelibandla, uMnu. Thamsanqa Mahlangu, obekulo umngcwabo utshele istudio 7 ukuthi izakhamizi zakulindawo, zesabele khatshana ukuya ngobunengi bazo zisithi zethuselwe ngokuthi zingake zilokothe zilugxobe kulumngcwabo zizabona izibunu zenyoka.
Uthi izakhamizi lezi azisalali emzini yazo, kodwa sezilala egangeni kumbe emasimini ngenxa yokwesaba ukuthunjwa ebusuku ziyebulawa. Ekhuluma kulumhlangano, umkhokheli walelicele, uMnu. Morgan Tsvangirai ukhuthaze abantu ukuthi babe lesibindi bavote ngobunengi babo ukuze benqobe ibandla le ZANU PF ngoba ngokwenza udlakela liyazilethela inzondo evela ebantwini.UMahlangu uthi amapholisa abevimbile endaweni ezinengi emgwaqweni oya eMurehwa behlola imota eziyakhonale ngoba ezwile ukuthi uTsvangirai uzahamba kulumango.
Kusenjalo, uMahlangu, utshele uSithandekile Mhlanga we studio 7 ukuthi udlakela lolu lukhanya luqondiswe ikakhulu kwabatsha, njalo ibandla lakhe lamukela abantu abedlula amatshumi amabili nsukuzonke e mahofisini abo eHarvest House edolobheni le Harare bebalekela udlakela lolu emaphandleni.
Ezinye indaba ze studio 7…
Thumela lolu daba nge e-mail
Udaba ngamabala
