Inhlanganiso yomanyano wenhlanganiso zezisebenzi emhlabeni wonke jikelele eye International Labour Organisation ithi ele Zimbabwe sokumele lizamele limiswe phambi kwekomidi yayo yezelungelo loluntu lichasisa ukwephula iziqondiso zayo eziphathelane lokulondoloza ilungelo loluntu.

Linhlanganiso isanda kuthatha lelinyathelo emhlanganweni wayo oqubekela phambili edolobheni le Geneva kwele Switzerland. Lumhlangano oqale zimhlaka 27 May 2008 uzaphela mhlaka 16 June 2008 .

Isikhulumeli senhlanganiso yezisebenzi kuleli eye Zimbabwe Congress of Trade Unions uMnumzana Last Tarabuku utshele i Studio Seven ukuba lumhlangano ubone kufanele ukuba ubize ele Zimbabwe lizoziphendulela kulolodaba lokwephula amalungelo abantu phansi kwezivumelwano ezithi convention 98 lo convention 87 amayelana lamalungelo okukhuluma abantu bekhululekile kanye lokuhlangana kungela nkinga.

UMnumzana Tarabuku uthi okwamanje inhlanganiso ye ZCTU ibhekana lobunzima obukhulu ukuba yenze imihlangano lembuthano lezisebenzi ngoba kuzamele icele imvumo emapoliseni ngaso sonke isikhathi befuna ukwenza imbuthano enje ngoba belakho njalo ukwalelwa ukuiyenza leyo mihlangano; Uthi noma nje ele Zimbabwe lilakho ukwala ukuyangena umhlangano onje ukwenza kanje kuzabangela ukuba lithathwe njengelizwe eliyisiqoqodo phakathi kwamanye emhlabeni wonke.

Kusenjalo umsekeli kamongameli we ZCTU wakuqala uNkosikazi Lucia Matibenga ukhethwe ukuba ahlale ku committee ekhokhela imisebenzi ye ILO eye Governing Body. UMnumzana Tarabuka uthi isenzakalo esinje siqakathekile kakhulu ngoba sizenza ukuba izikhalazo zezisebenzi kuleli ziqakathekiswe njalo zizwakale emhlabeni wonke jikelele.

Ezinye indaba ngesiNdebele...