UMnu. Robert Mugabe ugcotshiwe ukuba ngoMongameli welizwe lamuhla esigodlweni sesizwe, iState House. Lokhu kwenzakale lanxa impumela yokhetho lapho kade engancintiswanga muntu ibilokhu ingakaziswa yonke. 

Esegcotshiwe uMugabe, ikomishini ebona ngokuqhutshwa kokhetho elizweni, iZEC ithe uMugabe wathola amavoti ayi 2 150 269, kwathi umkhokheli weMDC uMnu. Morgan Tsvangirai owakhalala ukungena ukhetho ngenxa yokuhlukuluzwa lokubulawa kwabasekeli bakhe, wathola amavoti ayi 233 000. Amavoti ayi 131 481 abe ngama spoilt votes. 

UMugabe uqhubeke ngokhetho lolu lanxa amazwe womhlaba emkhuthaze ukuthi alumise. Impumela yokhetho lolu yethulwe ngemva kwamahola angamatshumi amane kodwa impumela yokhetho lukaMbimbitho, lapho uTsvangirai anqoba khona uMongameli Mugabe, yaziswa ngemva kwenyanga.

UMugabe ubenxuse inkokheli yamacele womabili eMDC, agoqela uMnu. Tsvangirai, kumkhosi wokumgcoba. Isikhulumi seMDC kaTsvangirai, uMnu. Nelson Chamisa uthe vele bona kabasoze bazihluphe ngokuya emkhosini wamandlwane. 

Uhulumende utshele intathelizindaba ukuthi icele leMDC elikhokhelwa nguMnu. Arthur Mutambara lithumele iqula lalo emkhosini lo. Kodwa umsekeli kanobhala jikelele walelibandla, unkosikazi Priscilla Misihairambwi Mushonga utshele istudio 7 ukuthi la ngamanga.

Ezinye izindaba zeStudio7 ...