Inkokheli yamazwe ezwekazi leAfrica ihlangene lamuhla emhlanganweni oqhutshwelwa kwele Egypt, umhlaba uqhubeka ngokusola ukugcotshwa kukaMnu Robert Mugabe ukuba ngumongameli weZimbabwe. 

Umhlangano weAfrican Union lo ukhangelelwe ukuhlaziya udaba lweZimbabwe kusasa. Umgcinisihlalo weAU umongameli Jakaya Kikwete, weleTanzania ubikwa enzele umongameli Mugabe amhlophe lamuhla ngokunqoba kukhetho, laloba ukhetho lolu lusolwe ngabantu abanengi, abagoqela bona abe AU ekade bezebona ngokuqhutshwa kwalo. 

Ekhuluma eseKenya uMnu Raila Odinga, inhloko kahulumende kulelolizwe ukhuthaze i AU ukuthi ithathe amanyathelo aqinileyo phezu kukaMugabe, esithi lumanyano kumele umise iZimbabwe ukuba lilunga. Umkhokheli weleBhilithani uMnu Gordon Brown laye ukhuthaze umhlangano weAU lo ukuthi ungaze wabamba uMugabe ngezandla ezibuthakathaka kuthi unobhala jikelele weUnited Nations uMnu Ban ki-Moon esole laye ukhetho olusanda kwedlula esithi iUN ilakho ukucina isethulela iZimbabwe izijeziso zenotho. 

Inengi lithi likhangelele ukuthi inkokheli yeAU ibambe uMugabe ngamandla ukuthi akhulumisane leMDC kwenziwe ukhetho olutsha elizweni. Kodwa igcwethi ecubungula ezombusazwe uMnu George Mkhwananzi utshele uNtungamili Nkomo weStudio 7 ukuthi lokhu kaboni kusenzakala.

Ezinye Indaba ZeStudio 7...