Ibhanga elikhulu lelizwe iReserve Bank of Zimbabwe (RBZ)  lamhlanje lengezelele imali esiseneliswa ukuthathwa nguzulu emabhanga isuka ku $25 billion isiya ku $100 billion ngelanga.

Lokhu kwenzakale inkampani yakwele Germany eyiyo ebithengisela eleZimbabwe iphepha lokudindela imali isimise ubudlelwano leleZimbabwe kulandela isiqondiso sikahulumende weleGermany ukuthi iyekele ukudlelana leZimbabwe. 

Uhulumende wamaJelimana yena ubelandela inkuthazo ye European Union (EU) yokuthi abamabhizimisi bekele ukudlelana leleZimbabwe ngemva kokuzingenisa embusweni kukaMongameli Robert Mugabe. 

Inkampani ye Giesecke & Devrient GMBH ibilobudlelwano bokuthengisela iReserve Bank of Zimbabwe iphepha lokudinda imali yohlobo lwama bearers cheque. Kodwa linkampani yazise lamuhla ukuthi simise lobubudlelwano.

Umqondisi walinkampani uMnumzana Karsten Ottenberg uthe inkampani le ithethe lelinyathelo ngokungahambi kuhle kwezombusazwe kweleZimbabwe. Ibhanga elikhulu lelizwe lihlezi lidinda imali mihla ngemihla, Ingcwethi kwezenotho ezithi yikho okubangela ukuwa kwamandla emali yelizwe lokuqonga kwentengo yezinto. 

Ingcwethi kwezenotho uMnu Clemence Sibanda utshele uBrenda Moyo weStudio 7 ukuthi inyathelo leli lilakho ukubangela ukusilela kwemali elizweni, esithi usibalukhulu webhanga elikhulu sokufuze asungule amacebo amatsha okulungisa udaba lwemali elizweni.