Umkhokheli weMDC uMnu Morgan Tsvangirai uthi ibandla lakhe kalemukeli inkhuthazo yomanyano weAfrican Union (AU) yokuthi libumbe uhulumende womanyano leleZanu PF. 

Ekhuluma lentathelizindaba eHarare lamuhla uMnu Tsvangirai uthe okufunwa libandla lakhe yikuthi kubunjwe uhulumende ozaphatha intambo zombuso okwesikhatshana, i transitional government, andubana kwenziwe ukhetho olukhululekileyo. Uthe njalo ufuna iZanu PF iqede udlakela elizweni andubana kwenziwe inkulumo ngenjongo yokwenza ukhetho olutsha, olukhululekileyo.

UMnu Tsvangirai uthe njalo iMDC ifuna iAU ikhethe isikhonzi esizancedisana loMongameli Thabo Mbeki emizameni yokulungisisa inkinga yaseZimbabwe.

Kusenjalo, umanyano weEuropean Union (EU) wazise lamuhla ukuthi kawusoze unanze ubukhokheli bukaMongameli Robert Mugabe, usithi uzananza kuphela uhulumende okhokhelwa nguMnu Morgan Tsvangirai. 

Lumanyano uthi lawo usekela imbono kahulumende ozaphatha intambo zombuso andubana kwenziwe ukhetho olukhululekileyo. Limbiko iphange yasolwa ngumlamulankunzi kudaba lweZimbabwe uMongameli Thabo Mbeki esithi i EU akumelanga ingenele kulolu daba. 

I Zanu PF yona ithi izimisele ukukhulumisana leMDC, kodwa isiphathamandla salelibandla uMnu Joram Gumbo usole imbiko kaTsvangirai esithi yenqabela ingqubelaphambili ekulungisiseni udaba lweZimbabwe.

Ingcwethi ecubungula ezombusazwe uMnu Hope Masola Wadaubudabu utshele uNtungamili Nkomo weStudio 7 ukuthi usekela isinqumo sikaTsvangirai esithi linyathelo elihle ngoba uzulu weZimbabwe ufuna uhulumende omutsha ongelani leZanu PF.

Ezinye Indaba ZeStudio 7...