Amalunga edlula amakhulu amabili ebandla leMDC abalekele udlakela emaphandleni acine esiyaphephela esigodlweni someli weMelika eZimbabwe lamuhla. Amalunga la, agoqela abantwana, amakhehla lezalukazi, asuke esigodlweni sebandla lawo, iHarvest House ngemva kokuba abezempilakahle bethe lawo mahofisi avalwe ngoba kusesatshelwa ukuthi kungaqhamuka imikhuhlane ngenxa yokuvalwa kwamanzi. 

Ngenyanga edluleyo abasekeli balelibandla abedlula amakhulu amabili baye njalo esigodlweni someli wele South Africa. Lelixuku lisuswe kulesi sigodlo lasiwa kwenye inkamba eruwa duzane leHarare. Kodwa imbiko esiyitholayo ithi abantu laba abasiwe eRuwa badliswa imbuya ngoluthi ngoba belindwe ngamapholisa angabavumeli ukusuka kulinkamba kumbe ukwethekelelwa yizihlobo kumbe inkokheli yebandla labo. 

Obona ngenhlalakahle kubandla leMDC, uMnu. Fred Makuvise utshele iStudio 7 ukuthi abanye bamalunga abo abasiwe enkambeni yeRuwa bathathwa ebusuku zinsoli zikahulumende bengaphendukiswa. Ekuqubekeni kodlakela endaweni zelizwe ezehlukeneyo. UMnu. Daniel Ngondo osebenzelane lobe cintisa isikhundla sokumela ibandla leMDC kukhetho lukaMbimbitho eGokwe emangweni kanduna Gumunyu ubikwa ebulewe izolo ngabasekeli beZanu PF. 

Umeli weMelika eZimbabwe, uMnu. James Macgee uthi baphakathi kokudinga uncedo lokupha iziphepheli ezisemahofisini akhe. UChris Gande weStudio 7 uxoxe lonkosikazi Gertrude Dube omunye walabo abaphephelele esigodlweni someli weMelika eZimbabwe.

Ezinye izindaba zeStudio7 …