EleBotswana lamuhla lazise ukuthi kalisoze linanze ubukhokheli bukamongameli Robert Mugabe ngoba engakhethwanga ngemfanelo. 

Ekhuluma lentathelizindaba, umphathintambo obona ngobudlelano lamanye amazwe kulelilizwe uMnu Phandu Skelema wazise ukuthi umongameli welizwe lakhe uMnu Ian Khama Seretse Khama selobele umgcinisihlalo weSadc emazisa ngesinqumo lesi njalo ekhuthaza lumanyano ukuthi lawo ungaze wananzi uMugabe njengomongameli weZimbabwe, kubika intatheli yethu uMartin Ngwenya.

Ngakwelinye icele, umsekeli kamphathintambo obona ngokudlelana lamanye amazwe eSouth Africa uMnu Aziz Pahad laye lamuhla wethule amazwi ekhuthaza eleZimbabwe ukuthi liphange limise udlakela oluselizweni. Intathelizindaba yethu, uBennedict Nhlapho ubika ukuthi uMnu Pahad uthi nxa udlakela lolu lungaqhubeka, ilizwe lakhe lizathatha amanyathelo ngokwalo ukuqeda lobobudlwangudlwangu. Kacacanga ukuthi ngamanyathelo bani la.

Kunjalo nje, umongameli Mugabe ukhanya sesiba senkingeni ngoba amazwe ezwekazi leAfrica asekubeke sobala ukuthi akabunanzi ukukhokheli bakhe esanda. Amazwe afana leTanzania, Sierra Leon, Nigeria, Senegal leZambia lawo athi kasoze amnanze uMugabe njengomongameli weZimbabwe. 

Kodwa umphathintambo obona ngokwethulwa kwembiko uMnu Sikhanyiso Ndlovu utshele uNtungamili Nkomo weStudio 7 ukuthi ibandla lakhe kalilandaba lokuthi amanye amazwe athini ngobukhokheli bukaMugabe, esithi iZanu PF izaqhubeka ibusa, abantu befuna kumbe bangafuni.

Ezinye Indaba ZeStudio 7...