Iqembu elimela i Zimbabwe emdlalweni kakhilikithi lilakho ukwehluleka ukuphatheka emidlalaweni yezizwe zomhlaba eye ICC world twenty/20 ezaqhutshelwa kwele Ngilandi ngomnyaka ozayo.

Lokhu kuza ngemva kokuba ilizwe okuzaqhutshelwa khona limidlalo elase Ngilandi lithe alisoze livumele abadlali bakuleli ukuba bangene kulelolizwe ngenxa yobudlelwano benhlanganiso ebona nokuqhutshwa komdlalo kakhilikithi kuleli eye Zimbabwe Cricket lomangameli welizwe lase Zimbabwe u Robert Mugabe.

Isinqumo sokuba i Zimbabwe ingabikhona kumidlalo yomnyaka ozayo sithethwe ngemva komhlangano wenhlanganiso ye International Cricket Council oqhutshelwe kwele Dubai lapho okuqunywe khona ukuba okwamanje i Zimbabwe ayisoze imiswe ukuba lilunga lalinhlanganiso kodwa kuzakuba lophenyo lokuhlolisisa ukuba isimo somdlalo sinjani elizweni njengoba kulokucabangela ukuba kulokungenela kwabe zembusazwe kulo umdlalo.
Umkokheli we Zimbawe Cricket u Peter Chingoka uthi i Zimbabwe iphume kulimidlalo ye twenty/20 ngokuthanda kwayo ngoba ikubona mgceke ukuba elaseNgilandi kalifuni ukuba abadlali bakuleli baphatheke kulimidlalo yikho bona njengenhlanganiso abathandanga ukuba umdlalo ubuyele emuva ngenxa yalokho ngoba bekungacina kulendingeko yokuba limidlalo isuswe eNgilandi iye kwelinye ilizwe ngabe i Zimbabwe iyale itshisa inkani yathi izadlala kulimidlalo ngoba kulilungelo layo njengelunga lenhlanganiso ye ICC.
Isiphathamandla seqembu le Glenshire elidlala esigabeni se Harare Metropolitan u Austin Karonga uthi akulunganga lokhu okwenziwe yiNgilandi ngoba kulambisa abadlali bakuleli abaphila ngokudlala umdlalo kakhilikithi bona abangasavunyelwa ukuyadlala emazweni aphetsheya lapho okulemali engcono njengoba bengasaholi ngamadola aseMelika njengalokhu okwakusenziwa kudala.
......................................................................................................................................................................

Sikhangele ukuba zizadlala njani esigabeni senguqu se Premier Soccer League kulimpelaviki lapho amaqembu adlala kulesisigaba azakuba lethuba lokudlalisa abadlali abatsha njengoba linyanga kantulikazi kungeyokubhalisa abadlali bokuqinisa amaqembu;
NgoMgqibelo i Caps United izadibana le Njube Sundows ngase Rufaro, i Monomotapa izemukela i Kiglon ngase Dzivarasekwa kuthi i Gunners ile Shooting Stars ngase Gwanzura.

NgeNsonto amaqembu adonsa kanzima i Lancashire Steel  le Caps FC zizabhuqana ngase Baghdad, i Dynamos izadlala le Motor Action ngase Rufaro, i Eastern Lions ile Lengthens ngase Sakubva kuthi i Highlanders izemukela i Chapungu ngase Magumeni. Kusenjalo kulokwesabela ukuba umdlalo okumele ube phakathi kwe Masvingo United le Underhill ngeNsonto ngase Mucheke ungekela ukuqhubekela phambili ngenxa yokukhalala umsebenzi okwenziwa ngabadlali be Masvingo bekhonona ngobuncane beholo abaliphiwayo
.......................................................................................................................................................................

Ezinye indaba ngesiNdebele...