Inhlanganiso zabalweli benkululeko ezigoqela i Zimbabwe Liberation Veterans Forum, leZimbabwe Liberators Platform ziyavumelana ukuthi elizweni kumele kusungulwe inkulumo zabamabandla ezombusazwe kubunjwe uhulumende wesikhatshana i Transitional Authority. Inhlanganiso zombili ziyavumelana ukuthi uhulumende lo akumelanga akhokhelwe nguMongameli Robert Mugabe. Abamanye amabandla aphikisayo labo basekela lelinyathelo.

Umkhokheli webandla  leFederal Democratic Union, FDU, uMnumzana Paul Siwela othi okunye okungenziwa nxa kungehlula okweTransitional Authority yikuthi amazwe aphetsheya agoqela eleBhilithane, iMelika lawe European Union akhulumisane loMongameli Robert Mugabe bavumelane ezintweni ezithize,babumbe ubudlelwano, okuthiwa ngesingisi yiforeign policy u-turn.