Abalandeli bomdlalo wenguqu bayala belokhu benyamalala ezinkundleni zomdlalo ngenxa yesimo somnotho esingamanga kuhle.
Umdlalo obuphakathi kweqembu le Highlanders lele Chapungu izolo e Magumeni ubukelwe lihlekana labalandeli bomdlalo wenguqu okuyinto emangalisayo ngoba leliqembu lisesibangeni sesibili engalaneni yemiklomelo. Osekela leli qembu u Jackson Ndlovu uthi isizatho sokungasabuyi kwabantu ebholeni yikuba ngeqiniso i Bosso ibinqoba kodwa ibingadlali kuhle obekungasathokozisi abalandeli bayo yikho abantu bekubona kungcono ukugcina izimali zabo ukuze bathengele imuli ukudla, kulokuba baze ebholeni lapho abangasuka khona becaphukile ngoba iqembu selidliwe.

Izolo kodwa i Highlanders idlale kuhle yanqoba i Chapungu nge 2 ka nya okuyimpumela edale ukuba iyale ilokhu iphefumelela entanyeni yeqembu elihlezi phezu kwengalane yemiklomelo i Monomotapa yona enqobe i Kiglon nge 2 ka 1 ngoMgqibelo.

Kuthi kweminye imidlalo yangoMgqibelo i Caps United idliwe 1 ka nya ise khaya yi Sundowns kuthi i Gunners leShooting Stars zitshayane zaze zabhekana kungela elitshayele emambuleni.
Emidlalweni yangeNsonto i Dynamos ibengutshiki lobhanqa le Motor Action, i Eastern Lions inqobe i Lengthens nge 3 ka 2, i Lancashire Steel itshaye i Caps FC nge 1 ka nya, kuthi i Underhill le Masvingo United zibe ngutshiki lobhanqa 1 ka 1.
.......................................................................................................................................................................


Emdlalweni wokugijima,………………

Kulamaqembu amane kuphela anelise ukuphatheka emidlaweni yokugijima eye Hwange Track and Field Championships ngemva kokuba amanye amaqembu ehluleke ukuza ngenxa yokubiza kwendleko zokuhambisa. I Shangani Mine, i Zimalloys, i Zimbabwe Prison Services kanye labaqoqe limidlalo abe Hwange yibo abaphatheke kulimidlalo ebikhona ngempelaviki
Amanye amaqembu afana le Shabanie Mine, i Bindura kanye le Gaths Mine abikwa athe ehluleke ukuthola amafutha okuhambisa ikanti amanye asuke ehluleka ngoba indleko zokugada isitimela zisuke zakhuphuka.
Lokhu kungabi khona kwamaqembu amanengi kubikwa kuphazamise indlela abadlali abagijime ngayo njalo kulokwesabela ukuba udubo olufanayo lungaphazamisa imidlalo eye Chamber of Mines ezakuba khona ensukwini ezilandelayo.
......................................................................................................................................................................

Isifiso somdlali we Tennis wakuleli u Kevin Ullyet esokuphakamisa isicoco salonyaka ese Wimbledon sabadlali abadlala bebabili  esithi mhlawumbe singalethela intokozo abantu bakuleli ababhekane lobunzima bempilo asisafezekanga ngemva kokudliwa kwakhe lomunye wakhe wase Sweden  u Jonas Bjorkman benqotshwa ngu Daniel Nestor wase Canada obedlala elo  Nenad Zimonjic wase Serbia ku final yama doubles  ebekhona ngoMgqibelo.
U Ullyet ubethe phambilini kwalumdlalo ukhathazekile emoyeni ngokwenzakala kuleli njalo kuyisifiso sakhe ukuba anqobe mhlawumbe lokhu kungalethela injabulo abalandeli bomdlalo we tennis kuleli.  

Ezinye indaba ngesiNdebele...