Ekuqhubekeni kodlakela elizweni abasekeli bebandla leZanu PF babikwa sebelandela abantu abayabe betshaywe basiwa ezibhedlela babatshaye njalo. Lokhu kubikwa kwenzakale ezigabeni zenkabazwe lase Mashonaland East. Iphephandaba le The Herald lilandule imbiko yokuqansa kodlakela elizweni isithi leli liqhinga nje kuphela lebandla lemdc lokuthi amazwe omhlaba asekele ukususwa embusweni kukamongameli mugabe. 

Leliphephandaba lithi ngamanga ukuthi abantu ababalekela udlakela endaweni ezitshiyeneyo zelizwe baphiwa ubuphepheli eRuwa duzane leHarare batshyiwe izolo ngabasekeli beZanu PF lisithi abathiwa balimele bebevele belimele. Kodwa umqondisi wokuqutshwa kwembiko kubandla leMDC kaTsvangirai, uMnu. Luke Tamborinyoka utshele iStudio 7 lamuhla enkambeni yeruwa kutholakale umsekeli weZanu PF obehlome ngombobho. 

Umphathintambo wezemithetho, umnu. Patrick Chinamasa lomphathintambo wezenhlalakahle kazulu, uMnu. Nicholas Goche bethekelele linkamba izolo. Owayengumphathintambo wezenzakala elizweni kuhulumende kaMugabe ngesikhathi seGukurahundi, uMnu. Enos Nkala utshele uChris Gande weStudio 7 ukuthi kunzima ukubakwazi ukuthi udlakela lungaqedwa yini elizweni.

Ezinye izindaba zeStudio7 …