Lamuhla bekulilanga lakuqala izikolo zivulwa kodwa inengi lalezizikolo libikwa belitshaya ibhungane lamuhla ngoba ababalisi bekhalele imisebenzi njalo labantwana bengayanga ezikolo ngezizatho ezitshiyeneyo.

Inengi labazali abalabantwana abasezikolo ze boarding likhala ngokuthi phezu kwembadalo enengi yama schools fees, kumele lithenge ukudla okutshiyeneyo, njalo umntwana kavunyelwa ukungena esikolo engakuthwalanga lokhu kudla.

Ezinye izikolo zibikwa zibiza imbadalo yama school fees ngemali yemelika ama us dollars kumbe amarandi, kukanti ezinye zifuna amafutha ephethulo.

Kodwa isiphathamandla sikahulumende, uMnu Goodwills Masimirembwa uthi lokhu kungaphandle komthetho njalo izikolo ezizaficakala zigila le imikhuba zizajeziswa.

IStudio 7 ixoxe loNkosazana Isabel Ndebele, olomntwana ofunda esikolo seboarding eGwanda, othi uthwele nzima ngezikhalazo ezilethwa yilesisikolo.

Kunjalo-nje, inhlanganiso elwela amalungelo ababalisi, iProgressive Teachers’ Union of Zimbabwe, iPTUZ, ithi inengi lababalisi alibuyanga ezikolo ngoba likhalele umsebenzi lifuna iholo elifika ku US$ 800.

Isiphathamandla salinhlanganiso, uMnu. Vusumuzi Mahlangu, utshele istudio 7 ukuthi inengi lababalisi livele kalilayo imali yokugada imitshova kumbe amabhasi emakhaya lisiya ezikolo.

Ezinye indaba ze studio7…