Idale laphezulu ele Senate liqale umsebenzi lamuhla phambilini kwedale lephalamende lona elizavula mhlaka 14 ngeviki ezayo. 

Idale leli liqala nje umsebenzi elizweni kungela hulumende ngoba kulokudonselana phakathi kweZanu PF leMDC phezu kodaba lokwabelana izikhundla zedale labaphathintambo i cabinet.

Amalunga eSenate abehlaziya umbiko kaMongameli Mugabe awethule ngenyanga edluleyo evula amadale womabili okusemthethweni. 

Amalunga eZanu PF yibo ekade esethula imibono yawo ngalumbiko lamuhla kuthi aweMDC wona azakwenza lokhu kusasa. 

Idale leli likhangelelwe njalo ukuhlaziya udaba lokuguqulwa kwesisekelo sombuso u Constitutional Ammendment number 19.

Lokhu kumele kwenziwe ukuze uhulumende womanyano phakathi kweZanu PF leMDC abe semthethweni. 

UMnu Dalumuzi Khumalo ngumeli weLupane kudale leSenate, njalo engowebandla leMDC elikhokhelwa nguMnu Arthur Mutambara. UKhumalo uchasisele uNtungamili Nkomo weStudio 7 ngokwenzakeleyo ekuvulweni kwalelidale lamuhla. 

Ezinye Indaba ZeStudio 7...