UMongameli Robert Mugabe uhlangane lababokheli bamacele womabili eMDC uMnu Morgan Tsvangirai loMnu Arthur Mutambara lamuhla bekhulumisana ngodaba lokwabelana izikhundla zecabinet, kodwa behluleka njalo ukuvumelana. 

Lokhu bekungokwesine abathathu laba behlangana, lokhe belobelane phansi isivumelwano sokubumba uhulumende womanyano. Abathathu laba bavumelene ukubiza uMnu Thabo Mbeki ukuthi azelamula umbango wezikhundla ezimqoka lo. 

Bekhulumisana abakhokheli laba, amalunga enhlanganiso ethiwa yiRestoration of Human Rights in Zimbabwe ebetshengisela ezitaladeni zeharare esithi afuna kubunjwe uhulumende ngokuphangisa njalo luhulumende kumele ekhokhelwe yiMDC. Kubotshwe amalunga alitshumi alinhlanganiso.

Laloba icele leMDC elikhokhelwa nguMnu Tsvangirai lisithi umbango uphezu kwengatsha zonke,iStudio 7 iyakuveza ukuthi ingatsha ezibangwayo zine kuphela njalo ukudonselana kuphakathi kweMDC kaTsvangirai leZanu PF. 

Ingatsha lezi zibalisa olwezemali (finance), olwendaba zaphakathi kwelizwe (home affairs), olwendaba zaphandle kwelizwe (foreign affairs), kanye lolwembuso yezabelo (local government). 

UMbeki yena ukhangelelwe ukufika eZimbabwe ngoMvulo kumbe ngolweSibili. Ubemele afike ngempelaviki kodwa uMugabe ubikwa ethe uzakuba engekho. IMDC kaTsvangirai yona izaba lomhlangano omkhulu labasekeli bayo eHarare ngeSonto. 

UTsvangirai ukhangelelwe ukwazisa lumhlangano ngebanga inkulumo esezikilo lezizatho zokuvuma ukungena kuhulumende womanyano leZanu PF. 

Ingcwethi ecubungula ezombusazwe uMnu Mandlenkosi Gatsheni utshele uNtungamili Nkomo weStudio 7 ukuthi uMbeki engatshaya inja efihla umphini kasoze enelise ukulamula umbango wezikhundla lo. 

Ezinye Indaba ZeStudio 7...