Laloba kulokhe kulokufiphala kungaziwa ukuthi udaba lwezikhundla kuhulumende omutshwa luzalungisiswa njani njalo nini, ingcwethi kwezombusazwe zithi inkulumo phakathi kweZANU PF  leMDC zilakho ukutshabalala ingqe yisiphi isikhathi. Kodwa uzulu jikelele ulokhe elethemba lokuthi udubo lweZimbabwe lulakho ukulungisiswa masinyane. 

UBrenda Moyo weStudio 7 uxhume ingcwethi ezicubungula ezombusazwe uMnumzana Mandlakhe Dube, loMnumzana Walter Nsununguli Mbongolwane  bekhangela udaba lwezombusazwe lolu. umbongolwane uthi nxa ibandla leZANU PF lingaqubeka lihudula izithende kudaba lokwabelana izikhundla  lizazibona seligenqulwe embusweni ngabantu beZimbabwe.

Laloba abanye bebelokhe belethemba lokuthi amabandla eMDC le ZANU PF azacina evumelana kudaba lwezikhundla zedale leCabinet, abanye labo ngabathi hatshi umthwalo wakhona ususibanzima ngamandla. Umlaleli weStudio 7 uMnumzana Edwin Munkuli esimxhume eseJohannesburg South Africa uthi nxa uMnumzana Thabo Mbeki engehluleka ukuxazulula loludaba iMDC kumele iphume kusivumelwano sikahulumende womanyano.

Omunye umlaleli uMnumzana Phillip Kawara ohlala eMpumalanga eHwange uthi iMDC kumele iqinisele ize ithole izikhundla ezisasuthisa uzulu.

Ezinye Indaba ZeStudio7...