UMnu Lovemore Moyo, owebandla leMDC elikhokhelwa nguMnu Morgan Tsvangirai nguye okhethwe ukuba ngumlawuli wedale lephalamende lamuhla. 

UMoyo unqobe uMnu Paul Themba Nyathi oweMDC ekhokhelwa nguMnu Arthur Mutambara.

Ibandla leZanu PF lona kalincintisanga kulolukhetho. UMoyo uthole amavoti angu 110 kwathi u Nyathi wathola angu 98. 

UNkosazana Nomalanga Khumalo, ongumeli weMzingwane edaleni lephalamende nguye okhethwe ukuba ngumsekeli kaMoyo. UMakhumalo ngoweMDC kaMutambara.

Kudale lesenate, uNkosikazi Ednah Madzongwe oweZanu PF nguye okhethwe ukuba ngumkhokheli walelidale kuthi uMnu Naison Khutshwekhaya Ndlovu nguye okhethwe ukuba ngumsekeli wakhe.

UNkosikazi Madzongwe unqobe uMnu Gibson Sibanda oweMDC kaMutambara. USibanda ubesekelwa ngamalunga amacele eMDC womabili. 

Ibandla leMDC lithi lilokujabula okukhulu ngokuthola isikhundla sikamlawuli lomsekeli wakhe ngoba lezizikhundla ziqakatheke kakhulu kwezombusazwe elizweni.

UMnu Lovemore Moyo utshele iStudio 7 ukuthi ukwamukela ngenjabulo ukukhethwa kwakhe njalo uthi uzasebenza gadalala.

AbeMDC kaTsvangirai bona bathi kabasoze bahambe ephalamende kusasa ekuvulweni kwalelidale nguMongameli Mugabe okusemthethweni.

Laloba umsekeli wesikhulumi seMDC kaMutambara, uMnu Renson Gasela engathandanga  ukuphumela egcekeni ekuthini amalunga ebandla lakhe azahamba ekuvulweni kwephalamende yini kusasa, uthe amalunga eMDC kumele ehambe ekuvulweni kwalelidale ngoba uSomlomo lomsekeli wakhe bengabeMDC. 

UMongameli Robert Mugabe nguye ozavula lelidale okusemthethweni. 

Kusenjalo uMugabe sekhethe osibalukhulu bezabelo kanye lamasenators angelazabelo.

Umthetho uvumela uMugabe ukuthi akhethe amasenators amahlanu. Kodwa ukhethe amathathu kuphela amabalisa uMnu John Nkomo, Joseph Msika loMnu Patrick Chinamasa.

Amabili kakawazisi ngezizatho ezingacaci kuhle. Ekukhetheni oSibalukhulu uMugabe utshiye njalo ababili ngezizatho ezingazakaliyo.

Osibalukhulu abakhethiweyo babalisa, uNkosikazi Thokozile Mathuthu (Matabeleland North), Angeline Masuku (Matabeleland South), Cain Mathema (Bulawayo), David Karimanzira (Harare).

Abanye babalisa uFaber Chidarikire (Mashonaland West), Christopher Mushowe Manicaland), Martin Dinha Mashonaland Central) kanye loMnu Aeneas Chigwedere owe Mashonaland East.

Ezinye Indaba ZeStudio 7...