Iqembu elimela iZimbabwe emdlalweni weCricket linqotshwe ngeleNew Zealand nge 10 wickets ngoLwesihlanu emdlalweni walo wesithathu weICC World Cup oqhutshelwe kweleIndia.
IZimbabwe yiyo eqale ukubhetha njalo into azizange ziyihambele kuhle ngoba iphange yalahlekelwa ngabadlali abamqoka umdlalo usanda kuqala.
Lokhu kudale ukuba yenelise ukuthola ama runs angu 162 kuphela ingazange ifikise ama overs angamatshumi amahlanu adlalwayo.
Ingqobe yokubhetha ithe sikuNew Zeland, badlala kuhle abafana bamaKiwis bahlohla ama runs angu166 kusasele ama overs angu17 njalo ingakalahlekelwa ngumdlali ngitsho loyedwa.
Abadlali beZimbabwe abaqhube ngcono ngesikhathi kuyibo ababhethayo ngabathi uBrendan Taylor, uGreg Lamb kanye loProsper Utseya. Iqembu leZimbabwe lizangqikilana leqembu le Sri Lanka ngeviki ezayo.
Komunye umdlalo weICC World Cup odlalwe ngoLwesihlanu, iqembu leWest Indies linqobe eleBangladesh nge9 wickets.
Iyangise kakhulu iBangladesh ngoba kuyiyo eqale ukubhetha yahlohla ama runs angu58 kuphela, okwenze umthwalo waba lula kuWest Indiest, yona enqobe sidlale ama overs alitshumi lambili kuphela.
Kolunye udaba lweCricket, amaqembu amela izigaba kunkezo yeLogan Cup azadlala ngokulandelayo ngempelansonto: Matabeleland Tuskers v Midwest Rhinos (Queens Sports Club Byo); Southern Rocks v Mountaineers (Masvingo). Limidlalo ikhangelelwe ukuphela ngoMvulo.
Kwezenguqu khona, amaqembu athi iDynamos leHighlanders azangqikilana enkundleni yeRufaro ngeSonto emdlalweni weVictory Challenge Cup.
Iqembu elizanqoba likhangelelwe ukuba lidlale leqembu leKaizer Chiefs elaseSouth Africa ekupheleni kwenyanga kaMabasa.
Womabili lawa maqembu akhangelelwe ukuba asebenzise lumdlalo ukuba abone ukuthi aqine kangakanani njengoba imidlalo yalonyaka yePremier Soccer League isizaqalisa.
