Ababona ngomumo womkhathi bathi kuzakuna izulu ngempelaviki elinengi elilakho ukubangela umonakalo kwezinye indawo zelizwe.
Embikweni abawethule ngoLwesihlanu, abohlangothi lweMeteorological Services Department bathe indawo ezilakho ukuhlaselwa lizulu lesikhukhula zigoqela iMatabeleland Morth, iHarare, izabelo zonke zeMashonaland kanye leManicaland.
Bathe njalo izulu leli lilakho ukuba lesiqhotho lesavunguzane esilamandla amakhulu kwezinye indawo. Izulu leli liqale ukuna ngoLwesihlanu njalo lizaqhubeka lize liyephele ngeviki elandelayo.
ITsholotsho ngenye yendawo zeMatabeleland North ezilakho ukuhlaselwa yisikhukhula lesi.
UNtungamili Nkomo weStudio 7 uxoxe lommeli wesigaba lesi kudale leSenate uMnu Believe Gaule owecele leMDC elikhokhelwa nguMnu Welshman Ncube yena oxwayise uzulu weTsholotsho ukuthi kumele ehlale eqaphele.
