Umantshi weBindura, uNkosazana Faresi Chakanyuka ugwebe amalunga ayisikhombisa ebandla leMDC elikhokhelwa nguMnu Morgan Tsvangirai ngolweSihlanu ukuthi ahlale entilongweni okwenyanga eziyisithupha kulandela ukutholakala kwawo elecala lokubangela udlakela ngoNhlolanja lonyaka.
UNkosazana Chakanyuka wesule inyanga ezintathu kusigwebo lesi, okutsho ukuthi abasolwa laba bazapika okwenyanga ezintathu kuphela.
Abagwetshiweyo laba babalisa oKhansila beBindura abathi uMnumzana Norbert Dokotera okaWard 10, uMnumzana Rickson Kaseke okaWard 11, umgcinisihlalo webandla leli esigabeni se Bindura North uMnumzana Tongai Jeki, umgcinisihlalo wabasakhulayo uMnumzana Amiri Jawara, lamalunga alelibandla amathathu abalisa uMnumzana Tererai Tsvakwi, loMnumzana Daniel Koroni, lomunye ongaqanjwanga ngegama obengekho emthethwandaba.
Igqwetha labayisikhombisa laba, uMnu Ernest Jena uthe uzaphikisa isinqumo sikamantshi lesi. Kudaba olufanayo, umthethwandaba weHigh Court unqume ukuthi isisebenzi seMDC esibotshwe sisetheswa icala lokweba imibhobho enkambeni yamasotsha eyePomona Baracks uMnumzana Pasco Gwezere akhululwe entilongweni ngemva kokuhlawula amakhulu amahlanu amadollar eMelika- US$500 yesibambiso.
Kodwa uhulumende uthi uzaphikisa lesisinqumo, kubika intathelizindaba yethu uThomas Chiripasi kungxoxo ayenze loBrenda Moyo weStudio 7.
