UMongameli Mahmoud Ahmadinejad weleIran, uthi uhulumende wakhe uzimisele ukuncedisa eleZimbabwe ukulwisana lezijeziso ezafakelwa iziphathamandla zeZanu PF lamankampani alobudlelwani lebandla leli ngamazwe angentshonalanga.
UMnu Ahmadinejad wethule amazwi la ngoMvulo ngemva kokuhlangana lomphathintambo obona ngokwenzakala ewofisini kaMongameli Mugabe uMnu Dydimus Mutasa oseIran okwamanje.
UMongameli Ahmadinejad ngumuntu ohlezi esolwa kakhulu ngamazwe angentshonalanga, emethesa umlandu wokuba nguntando kayiphikiswa kanye lokulungisa ibomba lembubhiso (nuclear).
UMutasa yena ucele eleIran ukuthi lizevula amabhizimusi eZimbabwe liphathise uhulumende ukuvuselela umnotho. EleIran lalo njengeZimbabwe lithwele nzima ngezijeziso elazethulelwa ngamazwe angentshonalanga.
UMnu Khuli Mathulela Sibanda, ocubungula ezombusazwe utshele uNtungamili Nkomo weStudio 7 ukuthi eleIran ngeke lenelise ukuncedisa eleZimbabwe ukulwisana lezijeziso ngoba lalo lithwele nzima ngezijeziso zalo.
