احمد ولي کرزی

د جمهور رئیس حامد کرزي ورور، احمد ولي کرزي پر ځان باندې هغه تورونه په کلکه رد کړي دي چې وايي، دی د نشيي موادو په قاچاق کې لاس لري. 

احمد ولي کرزي په کندهار کې خبریالانو ته وویل چې د امریکا د نیویارک ټامیز د ورځپاڼې په خلاف به محکمې ته عریضه وکړي. دغه ورځپاڼې څو روځې مخکې یو رپوټ خپور کړ چې په دغه رپوټ کې پر هغه باندې د نشيي موادو په کاروبار کې د لاس لرلو تورونه لگول شوي وو.  

احمد ولي کرزی وايي، دغه رپوټ بې اساسه وو او سیاسي انگیزه یې درلوده. دی وايي، دده سیاسي دښمنان دغه تورونه لگوي.  

نیویارک ټایمز د تیرې شنبې په ورځ پر هغې اوږدې او دوامدارې مسئلې باندې رپوټ خپور کړ چې ځینې امریکايي مقامات له دې آمله اندېښمن دي چې د جمهور رئیس کرزي ورور شاید د نشيي موادو په قاچاق کې لاس لري او پخپله جمهور رئیس کرزی کوښښ کوي چې پر دغې موضوع باندې پرده واچوي.  

احمد ولي کرزی چې د کندهار د ولایتي شورا رئیس دی، په یوه خبري کنفرانس کې پر خپلو سیاسي حریفانو باندې تور ولگاوه چې دده په اړه دغه ډول مغرضانه رپوټونه خپروي.

هغه همدارنگه وویل چې د امریکا ددغه رپوټ د خپرېدو علت دا دی چې جمهور رئیس حامد کرزي په دې وروستیو وختونو کې په افغانستان کې د ملکي تلفاتو له آمله پر امریکايي قواوو باندې انتقاد کړی دی.  

"امریکايي مقاماتو په وار وار جمهور رئیس کرزي ته خبرداری ورکړی چې ورور یې په سیاسي لحاظ دده د اوږو بار جوړ شوی"

احمد ولي کرزي همدارنگه وویل، هغه کسان چې دی پیژني پوهیږي چې دغه رپوټونه بې اساسه دي. هغه، خبریالانو ته وویل، دی په نړیواله ټولنه کې د هغو عناصرو د انتقادونو ښکار شوی دی چې غواړي پر جمهور رئیس کرزي باندې حمله وکړي.  

احمد ولي کرزي وویل، په راتلونکې یوې یا دوو اونیو کې به په نیویارک کې د هغو افرادو او مطبوعاتو په خلاف محکمې ته عریضه وکړي چې پر د باندې یې دغه تورونه لگولي دي.  

د نیویارک ټایمز په رپوټ کې د بوش د حکومت د ځینو چارواکو له خولې چې نومونه یې ندي اخیستل شوي، لیکل شوي چې احمد ولي کرزی د نشيي موادو په قاچاق کې لاس لري او امریکايي مقاماتو په وار وار جمهور رئیس کرزي ته خبرداری ورکړی چې ورور یې په سیاسي لحاظ دده د اوږو بار جوړ شوی دی.  

افغانستان د نړۍ ٩٠فیصده هیروین تولیدوي.  

د اپینو کاروبار اوس د کندهار په ولایت کې د اقتصاد د ملا تیر گڼل کیږي. ډیر دهقانان لا تر اوسه په دغه ولایت کې کوکنار کري. په دغه ولایت کې طالبان هم تر نورو ځایونو ډیر فعال دي.