 |
| افغان او د ایتلاف عسکرو د یکشنبې په ورځ د زابل په مرکز د قلات په ولسوالۍ کې له جگړه مارانو سره جگړه وکړه. |
د جرمني کابینې نن پریکړه وکړه چې په افغانستان کې خپل پوځي ماموریت تر ١۴ میاشتو پورې غځوي. د جرمني عسکر به اوس د راتلونکي کال تر دسمبر پورې په افغانستان کې پاتې وي.
د جرمني کابینې همدارنگه پریکړه کړې چې افغانستان ته زر تنه اضافي عسکر لیږي چې په دې ډول په افغانستان کې د جرمني د عسکرو شمېر څلور زره او ٥٠٠ ته رسیږي.
د جرمني د حکومت دغه پرېکړه د هغه ملک د پارلمان تائید ته ضرورت لري.
د جرمني عسکر په افغانستان کې د آیساف په چوکاټ کې د ملک د شمال په نسبتاً آرامه سیمه کې د سوله ساتنې په ماموریت بوخت دي.
په جرمني کې د افغانستان له ماموریت سره مخالفت موجود دی.
له بلې خوا، ایتلافي قواوو نن د سه شنبې په ورځ په خپلې یوې خبرپاڼې کې ویلي چې عسکرو یې د زابل په ولایت کې ۴٣ جگړه ماران وژلي دي.
افغان او د ایتلاف عسکرو د یکشنبې په ورځ د زابل په مرکز د قلات په ولسوالۍ کې له جگړه مارانو سره جگړه وکړه.
په خبرپاڼه کې ویل شوي چې د افغان او د ایتلاف د عسکرو یوې گډې گزمې ته کمین نیول شوی و او پر عسکرو باندې د مختلفو لورو د ټوپکو او درنې وسلې ډزې وشوې.
ایتلافي قواوې وايي، پر جگړه مارانو یې د سپکو وسلو او راکټ ځوابي فیرونه کړي دي او وروسته یې د هوايي قوې ملاتړ وغوښته.
په خبرپاڼه کې ویل شوي چې په حمله کې هیڅ افغان یا د ایتلاف عسکر ندی وژل شوی یا زخمي شوی.
دا مضمون کوم بل دوست ته واستوئ!
د متن چاپ
