کرزي وویل د سعودي له پاچا نه یې غوښتي چې د طالبانو سره د دوی د خبرو منځگړیتوب وکړي.

د افغانستان حکومت هغه رپوټونه رد کړي دي چې وايي، دوی د طالبانو سره مستقیمې یا د منځگړو له لارې خبرې کړي دي.  

رپوټونه وايي چې د طالبانو استازو په تیر سپتمبر کې د سعودي عربستان د شاهي کورنۍ د غړو په منځگړیتوب د افغانستان له حکومت سره خبرې کړي دي. 

د افغانستان د جمهور رئیس ویاند همایون حمید زاده نن د سه شنبې په ورځ وویل چې هیڅ ډول خبرې ندي شوي.  

حمید زاده وویل، که څه هم جمهور رئیس کرزي د سعودي پر پاچا غږ کړی چې ددغو خبرو لپاره زمینه برابره کړي خو تر اوسه دغه خبرې ندي شوي.  

جمهور رئیس کرزي تیره اونۍ د کوچني اختر په لومړۍ ورځ وویل چې د سعودي له پاچا سره د تیرو دوو کلونو راهیسې په تماس کې دی او له هغه نه یې غوښتي چې د طالبانو سره د دوی د حکومت د خبرو منځگړیتوب وکړي.