جیمز جونز په اسلام آباد کې له صدراعظم یوسف رضا گیلاني سره وکتل.

د واشنگټن پوسټ ورځپاڼې نن لیکلي چې د اوباما حکومت دا وخت افغانستان ته د نورو عسکرو د لیږلو پلان نلري.

ورځپاڼه لیکي، د امریکا د ملي امنیت مشاور دا خبره تیره هفته په افغانستان کې وکړه چې د اوباما حکومت غواړي چې دا وخت په افغانستان کې د خپلو عسکرو شمیر په همدې اندازه وساتي او ددغه ملک لپاره د جوړې شوې ستراتیژئ پر اساس ډیره توجه اقتصادي او د حکومتدارئ تقویې ته وشي او دې ته کار وشي چې د افغانستان خپل خلک او عسکر په روانه مسئله کې ور گډ کړل شي.

ورځپاڼه لیکي دا پیغام هغه توقعات له منځه وړي چې ممکن نور عسکر راشي، خو په آینده کې د نورو عسکرو لیږل نه دي رد شوي.

واشنگټن پوسټ د جنرال جونز له خولې لیکلي: "دا یوازې په نظامیانو باندې نه گټل کیږي. موږ دا شپږ کاله همدا هڅه وکړه. کومه ستراتیژي چې د آینده کال لپاره جوړه شوې اساسي ټکی پکې اقتصادي پرمختگ دی. که دا کار په سمه توگه ونشي، نو د نړۍ په ټولو موجوده عسکرو هم دا مبارزه نشي گټل کیدای".

ورځپاڼه لیکي د امریکا جمهور رئیس براک اوباما جیمز جونزه تیره هفته ددې لپاره افغانستان، پاکستان او هند ته لیږلی و چې عمويم وضعه معلومه کړي او د جمهور رئیس نظر د هغه ځای خلکو ته ورسوي.

واشنگټن پوسټ لیکي، جمهور رئیس اوباما دا خبره د خپل واک د دورې او همدارنگه د انتخاباتي مبارزو پر وخت په صراحت کړې وه چې د افغانستان مسئله د بوش د ادارې پر وخت شاته پرېښودل شوې وه.

اوباما د فبروري په ١٧مه اعلان وکړ چې افغانستان ته ١٧ زره نور عسکر لیږي. جمهور رئیس اوباما هغه وخت وویل، په افغانستان کې طالبان د بیرته پوره کېدو په حال کې دي او په گاونډي هیواد پاکستان کې القاعده له خپلو پخو مورچلو نه امریکا ته تهدید پیښ کړی دی.

ورځپاڼه لیکي، د امریکا د ملي امنیت مشاور جیمز جونز د خپل دغه سفر په ترڅ کې په تکرار سره دا خبره یاده کړه چې د سیمې لپاره نوې ستراتیژي درې پایې لري چې دده په خبره په دغو درې برخو کې پرمختگ ته ضرورت دی. لومړی: امنیت، دوهم: اقتصاد او دریم: حکومت داري او بیارغاونه.