Mumiriri we America muZimbabwe, Ambassador James McGee, pamwe nevamiriri veSweden neBritain, vashanyira chipatara cheAvenues Clinic neChishanu, vaine chinangwa chekuona vanhu vakakuvara mumirizhonga, avo vari kurapwa pachipatara ichi.

Ambassador McGee vanoti vatora danho iri, kuitira kuti vaone nemaziso avo, vanhu vari kurapwa pachipatara ichi, zvichitevera kurohwa kwavakaitwa mumhirizhonga yezve matongerwo enyika. Mukoti mukuru wepa Avenues Clinic, Amai Patricia Tavaziva, vaudza Ambassador McGee nevamwe vavo kuti chipatara chavo chiri kurapa vanhu vanodarika makumi maviri, avo vanosanganisira mhuri yekwa Jemedze, iyo yakarohwa zvakaipisisa kuChiweshe kuMashonaland Central. Amai Tavaziva vaudzawo Ambassador McGee zvakare kuti vanhu vari kurapwa pachipatara ichi, vazhinji vavo vari kubva kuMashonaland East, munzvimbo dzakaita se Mudzi, Mutoko neMurehwa, pamwe nekuMashonaland Central.

Ambassador McGee vati havasati vamboona hutsinye pamwe nekusakoshesa kwehupenyu hwevanhu kwakadai, kuburikidza nezvavaona pachipatara ichi. VaMcGee vakurudzira vanhu vose vari kuita hutsinye hwakadai, kuti varege zvavari kuita. Vatiwo muzinda wavo uchaenda kunoona hurumende yaVa Mugabe nezvenyaya yekushungurudzwa kwevanhu uku.

Vachitaurawo vari pa Avenues Clinic, mumiriri weBritain muZimbabwe, VaAndrew Poccock, vati vanoziva kuti mhirizhonga iyi, iri kukonzerwa nevatsigiri vaVaMugabe, kuitira kuti VaMugabe varambe vachitonga.

Amai Tavaziva vati kubvira pakatanga mhirizhonga iyi, chipatara chavo charapa vanhu vanodarika mazana manomwe. Vatiwo intensive care unit yechipatara chavo, ine vanhu vatatu, zvichitevera kufa kwewechina ashaya Chishanu mangwanani.

Kunyange hazvo tiine zita remufi, hatikwanisi kuriburitsa sezvo hama dzake dzisati dzaziviswa.

Dzimwe Nhau Kubva kuSrudio7...