Sangano reNational Association of Non-Governmental Organisations, kana kuti Nango, rinoti hurumende yarambidza masangano anosvika zvikamu makumi mapfumbamwe nezvipfumbamwe kubva muzana, kuti ape veruzhinhi chikafu.

NANGO inoti mamwe masangano arambidzwa anosanganisira Care International, Save the Childre UK, ne Adventist Develpment and Relief Agency.

Studio 7 haina kukwanisa kunzwa divi remasangano aya, asi bepanhau repa internet, re ZimOnline, rinoti masangano aya ari kunzi ari kubatsira MDC mukutsvaga rutsigiro, apo anenge achipa vanhu chikafu.

Mamwe masangano akaita se Christian Care anoti achaita musangano nehurumende neChitatu kuitira kuti vazeye nyaya iyi. Kurambidzwa kwemasangano aya kupa veruzhinji chikafu, kunoitika apo mutungamiri wenyika, VaRobert Mugabe, vari kumusangano nevamwe vatungamiri venyika dzepasi rose, wekuzeya nyaya dzechikafu uyo uri kuitirwa kuRome, Italy.

Vachitaura vari kumusangano uyu, uyo wakarongwa nesangano rinobatsira nechikafu pasi rose, re Food and Agriculture Organization, VaMugabe vatuka nyika dzakaita seBritain nemadzisahwira ayo, vachiti nyika idzi dziri kuda kubvisa hurumende yavo ichishandisa chikafu nezvimwe zvakadaro.

VaMugabe vatiwo izvi hazvisi kuzodzora hurongwa hwavo hwekutora minda yevachena vachiipa vanhu vatema.

Ukuwo mutungamiri weAmerica, VaGeorge Bush, vashora zviri kuitwa nehurumende yaVaMugabe, zvekushungurudza pamwe nekunyima vanoipikisa chikafu. VaBush vatiwo hurumende yavo icharamba ichibatsira vanhu vanoda chikafu muZimbabwe. Va Bush vati America iri kupa Zimbabwe mari inosvika mamiriyoni zana nemakumi manomwe emadhora eku America, yekushandisa mukuwanira vanoshupika chikafu.

 VaCephas Zinumwe ndivo Chief Executive Officer weNANGO.

Patience Rusere weStudio Seven atanga nekubvunza, VaZinumwe kuti vanoona seyi zvaitwa nehurumende.

Dzimwe Nhau Kubva kuStudio Seven...