Sangano reCrisis In Zimbabwe Coalition rinoti harisi kutambira zvakabuda musarudzo yemutungamiri wenyika. Sangano iri ratiwo harisi kuzoremekedza hurumende yaVaMugabe, zvichitevera mabatiro ayakaita zvizvarwa zveZimbabwe munguva yesarudzo ye run off. Crisis in Zimbabwe Colaition mubatanidzwa wemasangano mazana matatu, ayo anoita basa rekurwira kodzero dzevanhu nenzira dzakasiyana siyana.

Crisis  In Zimbabwe Coalition yatiwo hurumende yeZANU-PF yaurayisa zviuru nezviuru zvevanhu vanoipikisa kubva payakasarudzwa muna 1980. Sangano iri ratiwo ZANU-PF yakapa kuti vanhu vakawanda vafe mugukurahundi, uye musarudzo ye Run-Off.

Sangano iri rinoti rinoda kuti SADC ne African Union, pamwe nenyika dzepasi rose, dzisatambire kusarudzwa kwaVaMugabe. Ratiwo VaMugabe vanofanirwa kumisa mhirizhonga, kubvisa mitemo inodzvanyirira vanhu, kubvumidza mapepanhau akazvimirira ega kuita basa rawo, uye kuti mapato ezvematongerwo enyika aite basa rawo akasununguka.

Sangano iri ratiwo kana VaMugabe vakatadza kuita zviri kudiwa neveruzhinji, sangano iri richakurudzira vanhu kuti varatidzire mumigwagwa senzira yekumanikidza hurumende yaVaMugabe kuti itambire zvido zvevanhu. 

VaMacdonald Lewanika ndivo mutauriri weCrisis in Zimbabwe Coalition. Patience Rusere weStudio Seven aita hurukuro naVaLewanika kuti tinzwe pamire sangano ravo.

Dzimwe Nhau Kubva kuStudio 7...