Sangano reZimbabwe Peace Project (Z-P-P), rinoti mapurisa atanga kusunga vechidiki mumakamba akaiswa kuChitungwiza. Studio 7 haina kukwanisa kuziva kuti hurongwa uhu hwaitikawo here munzvimbo dzakasiyana siyana munyika. Z-P-P inotiwo mapurisa neMuvhuro akasunga vanhu vanosvika makumi matatu nevana vainge vapotera pamusha pasachigaro weMDC kuNyanga kuManicaland, VaSavour Chiodza. Sangano iri rinoti mhirizhonga yakaitikawo kuBikita, Hwange Central pamwe nekuMidlands.

Ukuwo masangano eProgressive Teachers Union of Zimbabwe neZimbabwe Congress of Trade Unions, anoti nhengo dzawo dziri kugara dzichitya kupambwa kana kushungurudzwa nevatsigiri veZanu PF. Masangano maviri aya neMuvhuro akaburitsa magwaro anotaura kuti nhengo dzavo dziri kushungurudzwa uye kuti dzava kugara dzichityira hupenyu hwadzo. 

P-T-U-Z inoti hutungamiri hwayo huri kugara kuchishanyirwa nevanhu vasingazivikanwi kuti ndivanaani. Ukuwo Z-C-T-U inoti vamwe vevatungamiri vayo vari mumatunhu akasiyana siyana, vari kuramba vachishungurudzwa, kunyange hazvo sarudzo yerunoff yakapfuura. 

Mutungamiri weP-T-U-Z, VaTakavafira Zhou, vaudza Jonga Kandemiiri weStudio 7 kuti sangano ravo rine nhengo nhanhatu dzakapondwa mumhirizhonga yezvematongerwo enyika.

Dzimwe Nhau Kubva kuStudio 7...