Nyanzvi munyaya dzezvemitemo dzinoti dare reparamende, raifanirwa pamutemo kutanga basa musi wa 29 Chikumi, apo pakagadzwa VaMugabe kuve mutungamiri wenyika. 

Nyanzvi dzinoti bumbiro remitemo yenyika rinoti paramende haifanirwi kugara mazuva anopfuura zana nemakumi masere, kubva payakaputswa, isati yatanga basa. Izvi zvinoreva kuti nhengo dzematare aya dzinofanirwa kugadzwa nekutanga basa mukati memazuva gumi anotevera. 

Imwe nyanzvi munyaya dzezvemitemo, Professor Greg Linnington, avo vanodzidzisa paUniversity of Zimbabwe, vaudza Studio 7 kuti hurumende inosungirwa kutevedzera zviri mubumbiro remitemo enyika, asi dambudziko riripo nderekuti vari kuzviti mutungamiri wenyika, VaRobert Mugabe, havana kusarudzwa zviri pamutemo.

Panyaya yekushungungurudzwa kana kusungwa kuri kuitwa vakasarudzwa kumirira MDC muparamende, Professor Linnington vati kushaikwa kwenhengo dzeparamende dzakakwana, hakutadzisi matare eparamende kuti atange basa. Asi VaKinnington vati zvinonetsa kuti vebato rinopikisa vashande mumatare aya, ivo vari kushungurudzwa neveZANU-PF.

Mutori wenhau weStudio 7, Carole Gombakomba, aita hurukuro naVa Innocent Gonese, avo vakasarudzwa kuve mumiriri we Mutare Central muparamende, avo vanoti havasati vatomboudzwa kuti vachatanga basa riini.

Dzimwe Nhau Kubva ku Studio 7...