Musangano wenyika sere dzakabudirira weG8 wakatanga muJapan neMuvhuro vatungamiri venyika idzi vachisangana nevatungamiri venyika dzemuAfrica, avo vakakokwawo kumusangano uyu. 

Nyika dzemuAfrica dziri kumusangano uyu dzinoti, Nigeria, Senegal, Ethopia, Ghana, South Africa neTanzania. 

Vatungamiri veG8 vanonzi vaonesa mutungamiri weSouth Africa, VaThabo Mbeki, ndondo vachiti vari kutadza kugadzirisa dambudziko reZimbabwe. 

Zvinhu zvinonzi zvabva zvanyanyoomera VaMbeki nekuti nyika dzakaita seNigeria, Ethopia neTanzania, dziri kuramba kutambira VaMugabe semutungamiri wenyika.

Ghana neSenegal dzinotiwo VaMugabe vanofanira kushanda neMDC. Ukuwo America iri kutarisirwa neChipiri kukurudzira United Nations Security Council, kuti itemere VaMugabe nevamwe vavo zvirango zvakaomarara. 

Nyika dzakawanda dziri kukurudzira kuti VaMbeki vabatsirwe nenhumwa yeUnited Nations kana kuti yeAU mukugadzirisa gakava riri munyika, sezvo VaMbeki vatadza kunyatsogadzirisa gakava iri.

Nemugovera, mutungamiri weMDC VaMorgan Tsvangirai, vakaramba kusangana naVaMbeki, avo vakazopedzisira vaita musangano naVaMugabe, pamwe naVaArthur Mutambara vechimwe chikwata cheMDC. 

VaPedzisayi Ruhanya vanoongorora nyaya dzezvematongerwo enyika, uye vari Programmes Manager weCrisis in Zimbabwe Coalition. 

VaRuhanya vaudza Blessing Zulu weStudio7 kuti zviri kuitwa neG8 zvinokurudzirwa nekuti VaMbeki vari kukundikana mukugadzirisa dambudziko riri muZimbabwe.

Dzimwe Nhau Kubva kuStudio 7...