Nhanga nhaurirano pakati pemdc neZanu-PF dzakatanga muPretoria neChina. Mutevedzeri wegurukota rezvekuburitswa kwemashoko VaBright Matonga vatenda kuti nhaurirano idzi dzatanga.

Mashoko aya atsinhirwawo naVaMukone Ratshitanga mutauriri wemutungamiri weSouth Africa VaThabo Mbeki, vanova mutongi gava pagakava iri.

Asi mutungamiri weMDC VaMorgan Tsvangirai vanoti hapana hurukuro chaidzo dzatanga asi kuti varikuyedza kuti vape divi ravo kuti hurukuro dzifambire mberi sezviri kudiwa neAU.

Nyanzvi munyaya dzezvematongerwo enyika dzinoti Zanu-PF iri kuitawo chimbi chimbi kuti sarudzo iitwe sezvo pasina nyika yati yatambira zviripamutemo kusarudzwa kwavamugabe muAfrica kunze kwaVaOmar Bongo vekuGabon avo vakatora chigaro chekutungamira nyika iyi muna1967. Vari kumiririra Zanu-PF ndiVaPatrick Chinamasa naVaNicholas Goche.

MDC yaVaTsvangirai iri kumirirwa naVaElton Mangoma naVaTendai Biti. Ukuwo MDC yaVaMutambara irikumirirwa naVaWelshman Ncube naamai Priscilla Misihairambwi Mushonga mutevedzeri wavo. Nhanga nyaya idzi dzakanangana nekuona kuti votora gwara ripi kuti vagovane masimba sezviri kudiwa neAfrican Union.

VaEarnest Mudzengi National Director WeNCA vaudza mutori wenhau Blessing Zulu weStudio 7 kuti VaMugabe vari kuda nhaurirano sezvo hupfumi hwawondomoka uye pasina arikutambira kusarudzwa kwavo.

Dzimwe nhau kubva kuStudio 7...