Vemasangano akazvimirira oga vanoti havakoshesi chibvumirano chaitwa pakati peZANU-PF nezvikwata zviviri zveMDC. 

Masangano aya akagara ataura kuti anodawo kupinda munhaurirano dzichange dzichitora nzvimbo pakati pemapato aya.

Vamwewo vemasangano akazvimirira oga vanoti Memorandum Of Understanding, kana kuti MOU iyi, hairevi kuti matambudziko ari muZimbabwe agadziriswa, asi kuti iri idanho rekutanga rekugadzirisa matambudziko akatarisana nenyika.

Mumasvondo maviri apfuura, mutungamiri weMDC, VaMorgan Tsvangirai, vakaita musangano nevatungamiri vemasangano akazvimirira oga, vachiti vanoda kutora pfungwa dzavo, kuti vadzibatanidze nedzeMDC panenge pava kuitwa hurukuro idzi.

Asi vemasangano aya vanoti vakaramba vachiti vanoda kunge vachizvitaurirawo vega, vasina divi ravakarerekera.

Mutori wenhau weStudio7, Carole Gombakomba, aita hurukuro naVaFambai Ngirande mutauriri weNANGO, avo vanoti chibvumirano ichi hachigoni choga kugadzirisa matambudziko ari munyika.

Ukuwo vemachechi vanoti vatambira kunyorerana pasi kwaitwa nemapato ezvematongerwo enyika.

Patience Rusere weStudio7 aita hurukuro nemutauriri weHeads of Christain Denominations, Father Frederick Chiromba, pamwe nemutauriri we Christian Alliance, Pastor Ray Motsi, kuti tinzwe pfungwa dzavo.

Dzimwe Nhau Kubva ku Studio 7...