Vamwe vagari vekuChiweshe kuMazowe Central vanoti vakafanobata chigaro chaIshe Negomo, vari kuda kuvadzinga mudunhu ravo nemhosva yekuti vatsigiri vebato reMDC. Zvinonzi Ishe Negomo vachishanda nemasabhuku avo, vakanyorera nhengo dzeMDC sere tsamba dzekuvazivisa nezvedanho iri. 

Pamusoro pezvo, Ishe Negomo vanonzi vari kuda kuti vatsigiri veMDC ava, varipe mari inoita $350 billion pamunhu, uye mbudzi mbiri. Studio 7 haina kukwanisa kunzwa divi rashe Negomo.

Dzimwe nyanzvi munyaya dzemitemo dzinoti madzishe haana masimba ekudzinga munhu mudunhu mavo, sezvo ivhu riri pasi pehurumende. 

Nyanzvi idzi dzinotiwo kana munhu achinge abviswa paanenge achigara, anofanirwa kupiwa imwe nzvimbo yekugara. Ukuwo, nyanzvi munyaya dzezve matongerwo enyika dzinotiwo madzishe mazhinji ari kupindira munyaya dzezvematongerwo enyika, achitsigira bato riri kutonga reZanu PF.

Jonga Kandemiiri weStudio 7 abata VaLuke Mutakuragumbo, mumwe wenhengo dzeMDC dziri kuda kudzingwa mudunhu rashe Negomo, avo vati vava kutsvaga rubatsiro rwemagweta kuti vasadzingwa nashewavo.

Dzimwe Nhau Kubva kuStudio 7...