Shasha munyaya dzekutuhwina, Kirsty Coventry, awana menduro yegoridhe mangwanani eMugovera ku Beijing, China, uko kuri kuitirwa makwikwi e 2008 Olympics.

Kirsty abhaguja achiita manhendesure mumakwikwi evanhukadzi e 200 meters backstroke, akava munhu wekutanga kupedza mujaho uyu munguva inoita 0,85 seconds.

Izvi zvapa kuti Kirsty akunde anga ari shasha yepamusoro mumakwikwi aya, Margaret Hoelzer, weku America, uyo atora nzvimbo yechipiri mumakwikwi aya.

Reiko Nakamura weku Japan, ndiye atora nzvimbo yechitatu. Kirsty akawanawo menduru nhatu dze silver kumakwikwi e 2008 Beijing Olympics.

Pari zvino Kirsty ava nemenduru ina dzaawana kumakwikwi aya. Mumakwikwi e Athens Olympics, Kirsty akawana menduru imwe chete yegoridhe, mendure imwe chete ye silver, uye menduru yebronze. Izvi zvinoreva kuti Kirsty ava nemendura nomwe dzaawana mumakwikwi e Olympics, mbiri dzegoridhe, ina dze silver, ne bronze imwe chete. 

Kirsty akaberekerwa muHarare muna 1983, akadzidza paDominican Convent High School. Muna 2000, Kirsty akapihwa chiremera cha Sports Woman of the Year.

Patience Rusere weStudio7 abata mutori wedu wenhau dzemitambo, George Mupfuti, kuti tinzwe kuti vanhu vari kutambira seyi zvaitwa na Kirsty