Dare reSenate rasarudza Amai Edna Madzongwe semutungamiri waro, zvichitevera kupa mhiko yekushandira nyika kwaitwa nenhengo dzedare iri. Amai Madzongwe vawana mavhoti makumi mashanu nemasere. MDC, iyo yanga ichitsigira VaGibson Sibanda, vechikwata chinotungamirwa naVaMutambara, yawana mavhoti makumi maviri nemasere. 

Mavhoti eZanu PF awanda zvichitevera kudomwa kwakaitwa magavhuna masere, pamwe nemaseneta matatu neSvondo naVaMugabe.

Vakadomwa semagavhuna ndiMai Angeline Masuku – Matabeleland South, Mai Thokozile Mathuthu– Matabeleland North, VaCain Mathema – Bulawayo, VaDavid Karimanzira – Harare, VaMartin Dinha – Mashonaland Central, VaAeneas Chigwedere – Mashonaland East, VaChristopher Mushowe – Manicaland, pamwe naVaFaber Chidarikire – Mashonaland West.

Vakadomwa semaseneta ndiVaJoseph Msika, VaPatrick Chinamasa, pamwe naVaJohn Nkomo. VaMugabe vari kutarisirwa kudoma mazita emagavhuna ematunhu eMasvingo neMidlands, uye mamwe maseneta maviri.

Zvichakadaro, dzimwe nyanzvi mune zvematongerwo enyika dzinoti zvaitika mudare reparamende chiratidzo chezvakabuda musarudzo dzakaitwa munaKurume, chekuti vanhu havachina chivimbo nebato reZanu PF. 

Nyanzvi idzi dzinotiwo ichi chiratidzo chekuti mutungamiri wechimwe chikwata cheMDC, VaArthur Mutambara, havana rutsigiro rwavanoti vanarwo kunhengo dzavo, sezvo paine chiratidzo chekuti nhengo dzavo dzinogona kunge dzavhoterawo nhengo yebato raVaTsvangirai, VaLovemore Moyo, semutauriri wedare reparamende, vachisiya kusarudza VaPaul Themba Nyathi. 

Imwe nyanzvi munyaya  dzezve matongerwo enyika, uye vari sachigaro weN-C-A, Doctor Lovemore Madhuku, vaudza Jonga Kandemiiri weStudio 7 kuti VaMutambara vanogona zvavo kuchibuda munhaurirano sezvo varaswa nevavanoti vari kumirira, nhengo dzeparamende, idzo dzakaita kuti vapinzwe munhaurirano.

Dzimwe Nhau Kubva kuStudio7...