Imwe nyanzvi ine mukurumbira pasi rose munyaya dzehupfumi hwenyika, Professor Steve Hanke, vanoti inflation yemuZimbabwe yepagore rose, yasvika pa531 billion percent.

Mugwaro raburitswa nesangano rinoshanda naProffessor Hanke, re Cato Institute, Proffessor Hanke vanoti kusabuda pachena kwehurumende pamamiriro akaita huremu hwedhora remuZimbabwe, ndiko kuri kupa kuti nyanzvi dzemari dzibuditse maonero avo epakamira dhora remuZimbabwe.

Muna Chikumi gore rino, hurumende yakabuditsa mashoko ekuti inflation yave pa11.2 million percent. Doctor Godfrey Kanyenze inyanzvi munyaya dzehupfumi, uye vari mutungamiri weLabour and Economic Development Research Institute of Zimbabwe.

Mutori wenhau weStudio7, Carole Gombakomba, aita hurukuro na Doctor Kanyenze avo vari kuti zviri kubuditswa nedzimwe nyanzvi izvi, havawirirani nazvo nekuti zvinonetsa kuziva zviri kuitika pasina ongororo ine hudzamu.

Dzimwe Nhau Kubva kuStudio7...