Mashoko atatambira anoti bato reM-D-C kuMasvingo ringangodzinga meya weguta reMasvingo, Alderman Femias Chakabuda, kana kuvabviswa pachigaro chehumeya, nemhosva yavanonzi vari kupomerwa yekupanduka vachipinda mubato reZanu PF munguva yesarudzo yerunoff. 

Alderman Chakabuda vari kupomerwa mhosva yekupinda mubato reZanu PF vachityira hupenyu hwavo, munguva yairohwa nekupondwa nhengo dzebato ravo nevanofungidzirwa kuti inhengo dzeZanu PF nevanozviti vakarwira rusununguko. 

Bepanhau repainternet reZimbabwe Times rinoti komisheni yakaumbwa kuti iongorore Alderman Chakabuda nemamwe makanzura maviri, yakatopedza basa rayo nemusi weChipiri. 

Studio 7 yabata munyori wekomisheni iyi, VaLawson Mapfaira, avo vabvuma kuti ichokwadi kuti vari kuongorora vachakabuda nevamwe vaviri, vakati vanga vachitarisira kusangana nevari kupomerwa mhosva ava manheru eChina.

Asi VaMapfaira varamba kutaura zvizhinji vachiti vanoda kutanga vasangana nevatatu ava. Asi Alderman Chakabuda varamba mashoko avari kupomerwa aya, vachiti mabasa evamwe vari mubato ravo vari kuda kusvibisa zita ravo pamwe nerebato reM-D-C. 

Sachigaro weM-D-C mudunhu reMasvingo, VaWilstaff Chitemere, varambawo kutaura nezvenyaya iyi. 

Alderman Chakabuda vaudza Jonga Kandemiiri weStudio 7 kuti havana nguva yavakambopinda mubato reZanu PF.

Dzimwe Nhau Kubva kuStudio7...