Daahir Rayaale Kaahin

Madaxwaynaha Jamhuuriyadda la magac-baxday Soomaaliland Daahir Rayaale Kaahin ayaa markii ugu horaysay ka hadlay safarkii uu dhawaan isaga iyo wafdi la socday ku tageen dawladda dariska ah ee Jamhuuriyadda Jabuuti. Sidoo kale, Madaxwayne Riyaale waxa uu ka jawaabay baaq khuseeyay midnimada Soomaaliya oo uu dhawaan munaasabadda 1-da July uu ku beegay Madaxwayne Cabdullaahi Yuusuf Axmed.

Madaxwayne Rayaale ayaa isaga oo u waramaya Sahra Ciidle oo VOA-da uga soo waranta magaalada Hargaysa waxa uu safarkiisa ku macneeyay mid lagu soo celinayo walaaltimandii iyo xiriirkii ka dhexeeyn jiray labada dhinac.

Inkasta oo uusan madaxwaynuhu meesha ka saarin in ay safarkiisa qayb ka ahayd sidii ay Jamhuuriyadda Jabuuti ugu muujin lahayeen taageeradooda dagaalka kala dhexeeya dalka Eretriya, misana waxa uu ka gaabsaday in uu xaqiijiyo wararka sheegaya in heshiiska labada dhinac uu ku jiray qodob ay Soomaaliland ciidamo ugu deeqayso dalka Jabuuti, si ay uga barbar dagaallamaan kuwa Jabuuti ee dagaalka kula jira ciidamada Eretriya. Madaxwayne Riyaale ayaa arintaa uga baxay mid lala sugayo waqtigeeda iyo maalinteeda.

Dhinaca kalena, Madaxwayne Rayaale, waxa uu ka jawaabay baaqii dhawaan ka soo baxay madaxwaynaha Dawladda Federaalka Kumeel-gaarka ah ee Soomaaliya Cabdullaahi Yuusuf Axmed ee uu ku sheegay, in kadib marka xal laga gaaro Koonfurta Soomaaliya, wadahadal lala furi doono goballada Waqooyi si loo badbaadiyo midnimada.  Madaxwayne Rayaale, waxa uu meesha ka saaray rajada soo celinta midnimada, waxase uu soo dhaweeyay in labada dhinac iyaga oo kala madax-bannaan ay si walaalnimo iyo dariswanaag ah uga wadahadli karaan arimaha ka dhexeeya.

Waraysiga Madaxwayne Rayaale oo dheeraa ayaa waxa kale oo uu ka waramay dhaqanka bur-cad badeedka iyo ajaanib lagu haysto buuraha Laas-qoray, kuwaasoo uu sheegay in ay ciidamada Soomaaliland ku wareegsan yihiin. Ugu dambayntiina Madaxwaynuhu waxa uu ka hadlay fursadda Soomaaliland ay ku heli karto aqoonsi caalami ah, iyada oo uu sheegay in ay ku xiran tahay waddamda Afrika iyo Midowga Afrika.