Burcad-badeed Soomaaliyeed

Faransiiska ayaa sheegay in burcad-badeed ay xeebaha Soomaaliya ku af-duubeen doon ay la socdeen laba muwaadiniin oo Faransiis ah.

Wasiirka arimaha dibadda Faransiiska ayaa sheegay in doontan (oo nooca lagu raaxaysto ah) laga afduubay Gacanka Cadmeed maanta oo Arbaca ah.  Saraakiil u hadashay maamul goboleedka Soomaaliyeed ee Puntland ayaa iyaguna warkaas xaqiijiyay.

Burcad-badeeddu waxa ay fara kulul ku hayaan Gacanka Cadmeed, kaasoo ah mid ka mida marinnada ugu mashquulsan ee ay maraan maraakiibta caalamka, iskuna xira Badwaynta Hindiya iyo Badda Cas.

Sannadkaan gudihiisa qiyaastii 30 markab ayaa lagu afduubay xeebahaas.

Xukuumadda ku meel-gaarka ayaa la daalaa-dhacaysa dagaal ay kula jirto kooxo Islaamiyiin ah mana ay laha awood ay ku ilaaliso xeebeheeda.

Golaha Amaanka ee QM ayaa meel-mariyay qaraar u ogolaanaya maraakiibta dagaalka ee ajnabigu in ay galaan biyaha Soomaaliya si ay ula dagaallamaan burcad-badeedda.