Magaalad Baladwayne

Guddoomiyihii odayaasha dhaqanka ee gobolka Hiiraan Dacar Xirsi Xooshow ayaa maanta duhurnimadii lagu dilay magaalada Beledweyne, kadib markii nin bistoollad ku hubaysan uu saddex xabbadood madaxa uga dhuftay isaga oo jooga suuqa doollarka.

Lama yaqaan jihada dishay odayga, illaa iyo haddana cidi ma sheegan mas’uuliyadda dilkaas.

Ku xigeenkiisii, Axmed Xasan Barre oo VOA-da u waramay ayaa sheegay in ay magaaladu kacsan tahay, iyada oo ay ciidamada Maxkamadaha Islaamiga ah ee ka taliya magaaladana ay xabbado cirka u rideen si ay u kala diraan dad isku soo baxay oo ka caraysan dilka Dacar Xirsi Xooshoow, waxayna soo rogeen bandoow xilliga maalinimada dhaqan-galaya.

Ciidamda Itoobiya ayaa dhawaann isaga baxay Baladwayne oo ah magaalada ay ka dhaceen dagaallada ugu badan ee u dhexeeya ciidanka Itoobiya iyo kooxaha la dagaallama, marka laga hadlayo gobollada dhexe ee Soomaaliya.

Dacar Xirsi Xooshoow ayaa todobaadkii hore u sheegay laanta Af-Soomaaliga ee VOA-da in ay ciidamada Itoobiya halkaa uga baxeen kadib wada-xaajood dhex maray iyaga odayaasha ah iyo ciidanka Itoobiya.  Arintaas ayuu uga jawaabayay sheegasho maalin ka hor ka timid mid ka mida mas’uuliyiinta Maxkamadaha Islaamiga ah oo sheegay in ciidamada Itoobiya halkaa looga saaray dagaal.