VOA News: Indaba

Udaba LukaChihuri Luqhubeka Ludala Inkulumo

Ntungamili Nkomo — Fri, 10 Feb 2012 20:21:37 GMT

Ukudonselana phezu kokusebenza kwenkokheli yezomvikela, ikakhulu uskomitshi wamapholisa uMnu Augustine Chihuri kuqhubekela phambili kuhulumende womanyano.

Inhloko kahulumende uMnu Morgan Tsvangirai lomsekeli wakhe uMnu Arthur Mutambara bazise ngoLwesithathu ukuthi bavumelane loMongameli Mugabe ukuthi uChihuri uzasebenza ephethe intambo besakhulumisana ngokuthi ngubani omele athathe isikhundla sakhe.

Kodwa isikhulumeli sikaMongameli Mugabe, uMnu George Charamba uthi imbiko kaMnu Tsvangirai loMutambara ayiqondanga.

UMnu Charamba uthi uMongameli Mugabe wengeze isikhathi sokusebenza kukaChihuri ngokugcweleyo hatshi ukuphatha intambo njengokutsho kukaMutambara loTsvangirai.

UCharamba uthi i-contract kaChihuri entsha izaphela ngomnyaka ka2014. Kodwa isikhulumeli sikaTsvangirai uMnu Luke Tamborinyoka uthi imbiko kaCharamba ayiqondanga.

Udaba lokusebenza kukaChihuri labanye abakhokheli bezomvikela kuqhubeka kuludaba oluxabanisa iZanu PF leMDC.

Kunjalo nje ibandla leMDC elikhokhelwa nguMnu Morgan Tsvangirai selikhonone kakhulu ngokuvinjwa komhlangano walo ngamapholisa eHarare ngoLwesithathu.

Umhlangano lo wawujonge ukuhlaziya udaba lomnotho njalo uTsvangirai ngomunye owayekhangelelwe ukukhuluma kulumhlangano.

I MDC ithi isenzo samapholisa lesi siveza sobala ukuthi amapholisa aqhubeka engananzi njalo engahloniphi amalungelo oluntu.

ICOPAC Isola Ukuvezwa Kokumunyethwe Lugwalo Lwesisekelo Esitsha Sombuso

Sithandekile Mhlanga — Fri, 10 Feb 2012 20:34:36 GMT

Ezinye iziphathamandla zekomithi yedale lephalamende ebona ngokulotshwa kutsha kwesisekelo sombuso eye COPAC zithi ukuvezwa kokumunyethwe lugwalo olungaba yisisekelo esitsha sombuso olwe Draft Constitution okwenziwe liphephandaba le The Herald ngolweSihlanu kulakho ukuphazamisa umsebenzi wokuhluza lolugwalo.

Iphephandaba lelo liphinde lacubungula udaba lokuthi abantu abasoze basamukele isisekelo sombuso esitsha ngendlela esizalotshwa ngalo kukhonjwa yilolu gwalo.

Ngakwelinye icele, umphathintambo wezemali uMnu. Tendai Biti utshele iStudio 7 ukuthi kufanele amabandla ezombusazwe avumelane kuzahluko eziseleyo, njengalokhu okwenziwa kugwalo lwe Kariba Draft ngamabandla ezombusazwe.

UMnu. Edward Mkhosi, omunye wabagcinisihlalo be COPAC utshele uSithandekile Mhlanga weStudio 7 ukuthi ikomithi yakhe izaqhubekela phambili ngomsebenzi wayo inganikile ngosokuphume kumaphephandaba.

Ngenani Ezitaladeni Litshengisele Njengase Egypt - Lovemore Madhuku

Chris Gande — Fri, 10 Feb 2012 21:02:14 GMT

Umgcinisihlalo wenhlanganiso edinga ukulotshwa kwesisekelo sombuso esitsha, eye National Constitutional Assembly-NCA, uMnu. Lovemore Madhuku uthi sesifikile isikhathi sokuthi izizalwane zeZimbabwe zingene ezitaladeni zitshengisele ukuthi azivumelani njalo azisekeli indlela uhulumende okhona abusa ngayo.

UMadhuku utsho lamazwi esemhlanganweni wenhlanganiso ezitshiyeneyo elizweni, owe People’s Charter eHarare ngolweSine. UMadhuku uthi sekumele uzulu aqunge isibindi alandele ikwenziwe nguzulu wasemazweni afana labo Egypt le Tunisia.

UChris Gande weStudio 7 uxoxe lengcwethi ecubungula ezombusazwe, uMnu. Effie Dlela Ncube opha imbono yakhe ngalolu daba.

Amabhanga Amanengi eZimbabwe Aphelelwa Yimali Yokunika Uzulu

Gibbs Dube — Fri, 10 Feb 2012 20:15:34 GMT

Amabhanga amanengi eZimbabwe abikwa esehluleka ukunika abantu makhaza imali ngenxa yamankampani labantu abangasagcini imali emabhanga.

Ukwehluleka kwamankampani ukubhadala izikwelede zamabhanga kanye lokuswelakala kwamankampani angasungula ibhizimusi engaletha imali yokuthuthukisa umnotho welizwe ngokunye okubikwa kuludubo.

Iziphathamandla zamabhanga zithi amanye amabhanga anjenge CABS, People’s Own Savings Bank le Interfin Bank Limited akasela mali yokunika uzulu njengoba kungela mphahla elungiswa ngamankampani elakho ukuthi ilethele amabhanga imali nxa ithe yathengiswa.

Umnu. Witness Chinyama ingcwethi kwezokungena kwemali emabhanga njalo osebenzela elinye ibhanga eZimbabwe uthi ukuswelekala kwemali le kungenza ukuthi amanye amabhanga abhidlike.

UChinyama uthi kusobala ukuthi amabhanga athwele nzima ngokunika uzulu imali njengoba lohulumende esethethe isinqumo sokuthi sokumele izisebenzi zingatholi iholo ngamalanga akade zinikwa ngawo ukwenzela ukuthi amabhanga adinge imali.

Inhlanganiso yalabo abakhangelane lamabhanga eye Zimbabwe Bankers Association ithi kumele amabhanga alezigidi ezingamakhulu amane lamatshumi amahlanu amadollar eMelika asemazweni kumele alethe imali le egcinwe kulokho okuthiwa ngama nostro accounts. Le yimali efakwa emazweni ngamabhanga ukwenzela ukubhadala okufunwa yilabo abafake imali emabhanga la abasemazweni.

UChinyama uthi lokhu kungenza ukuthi kubelemadlana engasetshenziswa kwele Zimbabwe engenza ukuthi kube lemali engacina isezandleni zikazulu lemabhanga.

Ingcwethi kwezenotho uMnu. Masimba Kuchera uthi ukwehluleka kwamabhanga ukuthi anike uzulu imali kwenziwa yikuthi akulamali engena emabhanga.

Ukulotshwa Kutsha Kwesisekelo Sombuso Sokufika Emaphethelweni

Sithandekile Mhlanga — Thu, 9 Feb 2012 21:21:27 GMT

Ikhomisheni yedale lephalamende ebona ngokulotshwa kutsha kwesisekelo sombuso eye COPAC ithi sokulotshwe izahluko ezilitshumi lesikhombisa zogwalo lwe sisekelo esitsha sombuso ngakho sokusele isahluko esisodwa kuphela ukuthi luphutshe.

ICOPAC ilandule imbiko ephume kumaphephandaba ethi isisekelo sombuso esitsha sizavimba abantu asebeleminyaka eyisikhombisa kanye lasebebuse okwamahlandla amabili ukuthi bencintise kukhetho. Ilandule njalo ukuthi ithe ukulotshwa kutsha kwesisekelo sombuso esitsha sokuphelile.

UMnu. Edward Mkhosi, omunye wabagcinisihlalo be COPAC utshele iStudio 7 ukuthi inhlanganiso yakhe isicubungule izahluko ezine phakathi kwalezo esezilotshiwe ukuze besuthiseke ukuthi imbono eyaqoqwa ebantwini ilotshwe ngokuqotho.

UMnu. Mkhosi utshele uSithandekile Mhlanga weStudio 7 ukuthi akulula ukubeka ilanga lokuthi ukulotshwa kwalolugwalo kuzaphela nini ngoba kulokudonselana kwezinye izigaba .

Ikhomisheni yeAnti-Corruption Ihlolisisa Ukwebiwa Kwenhlanyelo eMasvingo

Gibbs Dube — Thu, 9 Feb 2012 21:10:30 GMT

Abahlolisisa ukwabiwa kwenhlanyelo lemvundiso ye fertilizer eye Ammonium Nitrate lonyaka kunkampani yeGrain Marketing Board (GMB) abaku Anti-Corruption Commission babikwa besendaweni ezitshiyeneyo esabelweni seMasvingo.

Ikhomisheni le ibikwa ithole ukuthi kutshontshwe inhlanyelo le fertilizer enengi okwamagama.

Uhlangothi lwe GMB oluhlolisisa ukusetshenziswa kwemali – olwe Loss Control Department luvumbulule ubusela obumangalisayo eMasvingo lapho abalimi abangenelisanga lonyaka ukuthola imvundiso ye fertilizer kanye lenhlanyelo.

Ikhomisheni le ibikwa izakwethulela amapholisa amabizo alabo abacatshangelwa ukuthi batshontsha inhlanyelo, amabele le fertilizer eMasvingo.

Okwamanje sokubotshwe abantu abangaba yisikhombisa eGMB kwele Mandebeleni abacatshangelwa ukuthi batshontsha inhlanyelo le fertilizer lonyaka kanye lamasaka omumbu.

Umnu. Seiso Moyo ongumsekeli womphathintambo wezokulima utshayele ihlombe ikhomisheni le eveze ubusele lobu esithi kumele bonke labo abacatshangelwa ukuthi batshontsha inhlanyelo le fertilizer babotshwe.

Uphinde wakhuthaza ikhomisheni le ukuthi ingethuselwa ngabasekeli bebandla le Zanu-PF abacatshangwelwa ukuthi bancedisana lezisebenzi zeGMB ekutshontsheni inhlanyelo lemvundiso ye fertilizer.

Umnu. Liberty Bhebhe ingcwethi kwezokuthuthukisa inotho kazulu uthi okutshaya inhliziyo yikuthi kuyenzakala ukuthi abakubandla le Zanu PF kabasoze babotshwe.

Uzulu Ukhala Ngokungasebenzi Kuhle Kwamakhansili

Ntungamili Nkomo — Thu, 9 Feb 2012 21:13:49 GMT

Ukungasebenzi kuhle kwamakhansili amanengi sokubangele ukukhonona kuzulu osola umphathintambo obona ngokuthuthikiswa kwezabelo uMnu Ignatias Chombo ngokungenela kumisebenzi yamakhansili.

Kodwa abanye ngabasola amakhansila ebandla leMDC, ayiwo akhokhela amakhansili amanengi elizweni, ikakhulu emadolobheni besithi yiwo akhuba ingqubela phambili ngokuphatheka emisebenzini yokungethembeki.

UChombo yena sexotshe umsebenzi amakhansila eMDC amanengi ewethesa amacala atshiyeneyo agoqela ukungethembeki lokungazi umsebenzi.

Edolobheni leHarare ikakhulu, uChombo ungenele kunhlelo zalikhansili waphazamisa into ezinengi njalo umanisipala uthi ulokhu engenelisi ukusebenza kuhle evinjwa nguChombo.

Ukuhlaziya loludaba sixhume ukhansila kaWard 10 koBulawayo uMnu Prince Dube lomqondisi weCombined Harare Residents Association uMnu Mfundo Mlilo bona abasole kakhulu uChombo.

Incwadi kaMnu. Morgan Tsvangirai Eya kuMongameli Mugabe Idala Inkulumo

Chris Gande — Wed, 8 Feb 2012 20:01:03 GMT

Udaba lwencwadi elotshwe yinhloko kahulumende, uMnu. Morgan Tsvangirai isiya kuMongameli Mugabe ephethe isisemaphephandabeni ngeviki edluleyo isidale inkulumo. Abecele leMDC elikhokhelwa nguTsvangirai bathi ihofisi kaMongameli yiyo ephe intathelizindaba lincwadi kodwa isikhulumi seZanu PF, uMnu. Rugare Gumbo utshele iStudio 7 ukuthi lincwadi ingabe isiwe emaphephandabeni ngabakubandla leMDC.

Encwadini le, ebikwa ingakapheli ukulotshwa uTsvangirai ukhalaza ngokunengi okungavunyelwananga kuhulumende.

Isikhulumi sikaMugabe, uMnu. George Charamba utshele intathelizindaba ukuthi uMugabe kayitholanga lincwadi. Incwadi kaTsvangirai ibikwa ilotshelwe uMugabe lomsekeli wenhloko kahulumende, uMnu. Arthur Mutambara kodwa itshengisa ukuthi uTsvangirai ukhuluma okunengi lapho afaka khona uNcube.

UChris Gande oweStudio 7 uxoxe lesikhulumeli sebandla lika Ncube, uMnu. Nhlanhla Dube ngalolu daba.

Kunjalo nje, uGande uphinde waxoxa lengcwethi ecubungula ezombusazwe, uMnu. Rejoice Ngwenya laye opha imbono yakhe ngaloludaba.

UMnu Chinamasa Uthi Ukhetho Luzaqhutshwa Kusetshenziswa Imithetho Evele Ikhona

Ntungamili Nkomo — Wed, 8 Feb 2012 19:56:08 GMT

Umphathintambo wezemithetho njalo elilunga leZanu PF uMnu Patrick Chinamasa uthi ilizwe lizakuya kukhetho oluzayo kusetshenziswa imithetho evele ikhona.

Imbiko kaChinamasa le itsho ukuthi akusoze kube lenguquko emithethweni efane lePublic Order and Security Act kanye leZimbabwe Electoral Act.

UChinamsa utshele umsakazo weZBC ukuthi iMDC yiyo evimbe imizamo yokuguqulwa kwalimithetho, okuyinto elandulwa ngumsekeli wesikhulumeli seMDC ekhokhelwa nguMnu Morgan Tsvangirai, uNkosazana Thabitha Khumalo.

Kunjalo nje, uTsvangirai uhlangane loMonganeli Mugabe ngoLwesithathu behlafuna okutshiyeneyo okugoqela udaba lukasikomitshi wamapholisa uMnu Augustine Chihuri.

UTsvangirai uveze ngemva kwalumhlangano ukuthi bavumelane loMugabe ukuthi uChihuri aqhubeke ephethe intambo zombuso kuze kukhethwe usikomitshi omutsha.

Izisebenzi Zikahulumende Lokhu Zimelele Impendulo Kahulumende Ngeholo Lazo

Sithandekile Mhlanga — Wed, 8 Feb 2012 20:03:58 GMT

Umanyano wenhlanganiso emela izisebenzi zikahulumende owe Apex Council uthi ulokhu umelele impendulo evela kunhloko kahulumende uMnu. Morgan Tsvangirai eyokuthi bazaxoxisana nini ngodaba lokwengezelelwa iholo.

Lokhu kwenzakala abongi bebikwa bengavumanga ukwengezelelwa iholo ngamadola angamatshumi phose ayisithupha-$57, ngamunye besithi imali le incane kakhulu.

UMnu. Richard Gundani, isiphathamandla se APEX Council utshele uSithandekile Mhlanga weStudio 7 ukuthi inkulumo lohulumende ziqhubekela phambili njalo udaba lwabongi lwehlukene lolwezinye izisebenzi zikahulumende ngoba luhlafunwa yinhlanganiso ye Health Services Board hatshi yi National Joint Negotiating Council.

Akula Zisebenzi Zikahulumende Ezaqhatshwa Okungekho Emthethweni: PSC

Gibbs Dube — Wed, 8 Feb 2012 21:06:36 GMT

Ugatsha olubona ngokuqhatsha izisebenzi zikahulumende iPublic Service Commission (PSC) luthi akula zisebenzi zikahulumende ezaqhatshwa okungekho emthethweni.

Inhlolisiso enziwe yinkampani yama auditors eye Ernest and Young kungwalo zikahulumende ngomnyaka ka 2010 iveze ukuthi kulezisebenzi ezizinkulungwane ezingamatshumi ayisikhombisa ezisebenza okungela mvumo.

Iphephandaba le Herald elisekela ibandla le Zanu-PF lithi iPSC ithi isihlolisise ugwalo olujulileyo olwethulwe yi Ernest and Young yathola ukuthi kungaba lezisebenzi phose ezedlula inkulungwane eziyisithupha kuphela ezaqhatshwa okungekho emthethweni lugatsha lwezabatsha lokuthuthukisa inotho kazulu.

Iphephandaba leli libika ukuthi okwenza ukuthi iErnest and Young icabangele ukuthi kulezisebenzi ezinengi ezingekho emthethweni yikuthi inkampani le yabala lalabo abasebenza emazweni, ezinye iziphathamandla zengatsha zikahulumende ezigoqela ama permanent secretaries labanye njalo abangafundanga.

Iphinde njalo yathi kulezinye izisebenzi ezazibaleka ngesikhathi zisethekelelwa yizisebenzi ze Ernest and Young.

Unkosikazi Lucia Matibenga ongumphathintambo wogatsha lukahulumende olubona ngezisebenzi uthi akazi lutho ngalokho okwethulwe yi PSC.

Umnu. Masimba Kuchera ingcwethi kwezenotho uthi iPSC ilakho ekufihlayo.

Liphuma Lendaba, Litshone Lendaba: Sixoxa LoMhlanga Ngemikhoba Yakhe

Ntungamili Nkomo — Wed, 8 Feb 2012 19:52:23 GMT

Kuliviki siphatha imbedumehlwana esemilonyeni yabanengi elokitshini leNtumbane koBulawayo eyomunye ubaba obikwa elemikhoba esihluphile kuleli lokitshi.

UMnu Malibeni Mhlanga uthi wanikwa umuthi wamabele lenotho yinyanga kuminyaka elitshumi edluleyo esigabeni seNsuza, wamsebenzela lowomuthi inkomo zadlana uboya esibayeni.

Uthi kube kuhle kakhulu kuye ephila impilo yendoda ehloniphekayo, kodwa ngokuya kwesikhathi impande azinikwayo zaqalisa ukumphendukela.

UMhlanga uthi impande lezi zaphenduka zaba ngontikolotshi abamthwalisa amagabha avuzayo.

Ngalokhu, uthi wadinga usizo kwabomoya babulala abane babontikolotshi laba kwasala okukodwa okwamlandelayo sesiyahlala koBulawayo.

Wengeze wathi umkhoba lo ubususiya emacansini lomkakhe njalo uhlupha labafazi babomakhelwane bakhe elokitshini leNtumbane waze wancedwa ngumphorofita obuye wakubulala ngoLwesihlanu.

Lalela ingxoxo yethu loMnu Mhlanga kuhlelo Liphuma Lendaba, Litshone Lendaba.

Abalakho abafuna sikhulume ngakho, thumela incwadi ye-email kukheli ethi studio7@voanews.com. Ungathumela njalo itext message kunombolo ezithi 001 202 465 0318.

I MDC Kumele Izinikele Kudaba Lokwesulwa Kwezijeziso - ICG

Ntungamili Nkomo — Tue, 7 Feb 2012 21:10:42 GMT

Inhlanganiso yeInternational Crisis Group ithi ibandla leMDC kumele liphathe udaba lwezijeziso ezafakelwa amalunga eZanu PF ngokuqotho njalo zesulwe ngoba zivimba impumelelo ekulungisisweni kwezombusazwe.

Inhlanganiso le ithi amazwe afaka lezizijeziso lawo kumele ayekethise, kanti lebandla leZanu PF lalo lizinikele ekugcwalisiseni zonke inhlamvu lezimiso zesivumelwano seGPA layo yonke inguquko ephathelane lombuso okhululekileyo ekhangelelweyo.

Embikweni ewethule ngoMvulo iInternational Crisis Group ixwayise ukuthi kungayiwa kukhetho kungela nguquko ebekhona kuzakuba lodlakela elizweni olufana lolubekhona kukhetho luka2008.

Umsekeli wesikhulumeli seMDC ekhokhelwa yinhloko kahulumende uMnu Morgan Tsvangirai, uNkosazana Thabitha Khumalo uthi ibandla lakhe selenze konke okusemandleni alo ukukhankasela ukususwa kwezijeziso kodwa kwehlule.

Ingcwethi ecubungula ezombusazwe uMnu Brilliant Mhlanga uthi ngempela abeMDC bahlezi bekhankasela ukwesulwa kwezijeziso lanxa nje amazwe azifakayo engafuni ukuzesula.

Uhulumende Ugcizelela Ukuthi Umkhuhlane WeTyphoid Ungaqhubeka Umemetheka

Sithandekile Mhlanga — Tue, 7 Feb 2012 20:25:52 GMT

Uhulumende uthi inani labantu abahlaselwe ngumkhuhlane weTyphoid eHarare lingabe selifike kunkulungwane ezimbili-2000 lokhu umkhuhlane lo waqhamukayo.

UNkosikazi Portia Mananganzira isiphathamandla sogatsha lukahulumende olwezempilakahle utshele iStudio 7 ukuthi izakhamizi kumele ziqinise ukuhlanzeka ukwenzela ukwenqabela ukumemetheka kwalumkhuhlane.

Kusenjalo, UMnu. Rejoice Ngwenya ingcwethi ecubungula ezombusazwe njalo eyingcwethi yokubuswa kwezabelo utshele uSithandekile Mhlanga weStudio 7 ukuthi kufanele kuguqulwe umthetho we Urban Councils Act ukuze amakhansili enelise ukufeza izinqumo zawo.

Iisilinganiso Sendleko Yemuli Ngenyanga Sikhuphuka Nge US$30

Gibbs Dube — Tue, 7 Feb 2012 20:21:24 GMT

Inhlanganiso ebona ngelungelo labathengi eye Consumer Council of Zimbabwe ithi isilinganiso sendleko yemuli yabantu abayisithupha ehlala emadolobheni sikhuphuke ngamatshumi amathathu amadollar eMelika ngenyanga, ngoZibandlela kubangelwa yikuqonga kwemithelo yezindlu.

Unkosikazi Rosemary Siyachitema umqondisi we CCZ uthi isilinganiso lesi sisuke kumakhulu edlula amahlanu amadollar ngoMpalakazi sayafika kumakhulu phose ayisithupha amadollar ngoZibandlela.

Unkosikazi Siyachitema uthi okudingakala ukuphilisa imuli ngenyanga kukhangelelwe ukwehla ngoNhlolanja njengoba uhulumende ethi abanikazi bezindlu bakhweze imithelo yezindlu eye rent ngoZibandlela okungekho emthethweni.

Uhulumende uthi kumele uzulu abhadale imithelo ebivele ikhitshwa ngoMpalakazi ephakathi kwamatshumi amathathu lamatshumi amahlanu amadollar eMelika kukamelo elilodwa.

Umphathintambo wezindlu uMnu. Giles Mutsekwa uthi kumele kwehliswe imali ye rent ukwenzela ukuthi izisebenzi zenelise ukuphila ngeholo eliyingcosana ezilithola ngenyanga.

UMutsekwa uthi ulakho ukuthatha isinqumo sokuthi kungasakhuphulwa imali ye rent kuze kuyephela umnyaka.

Unkosikazi Siyachitema uthe uzulu umelele ukuthi kwehliswe imali ye rent ngoNhlolanja.

Solugqitshiwe Uphenyo Lwemfa KaMnu Mujuru

Mark Peter Nthambe — Mon, 6 Feb 2012 21:14:38 GMT

Umthethwandaba obuhluzisisa ngemfa kamuyi uGeneral Solomon Mujuru uphethe lolucwaningo ngoMvulo ngokwala ukwamukela isicelo semuli yakoMujuru sokuthi ithuna lakhe ligejwe ukuze isidumbu sakhe sihlolwe kakutsha.

UMnu Mujuru utshele endlini epulazini lakhe eliseBeatrice duzane leHarare wafa ngomnyaka odluleyo. Imfa yakhe iqhubeka iyimpicabadala njalo uzulu lokhu ebuzana imbuzo etshiyeneyo.

Umantshi obekhokhela ucwaningo lolu, uMnu Walter Chikwanha utshele idale ukuthi ngemva kokuhlolisisa yonke imicijo ethulwe ligqwetha lemuli kaMujuru ngesicelo lesi, katholanga isizatho esiqinileyo sokuthi avumele ukugejwa kweliba likamuyi.

UChikwanha uthe njalo umthetho okhangelane lokucutshungulwa kwezimfa ezisolisayo (Inquest Act) awumuphi amandla okuthi avumele ukugejwa kwengcwaba lomufi. Ngalokho, uthe kafuni ukwephula umthetho.

Umfowabo kaMujuru uMnu Joel Mujuru utshele intathelizindaba ukuthi imuli yabo izahlala phansi ihluze isinqumo sikaChikwanha andubana ithathe isinqumo sokuthi baqhubekela phambili njani lokuthi yiwaphi amanyathelo abangawathatha.

UNkosikazi Joice Mujuru, umkakhe kamuyi njalo engumsekeli kaMongameli Robert Mugabe ube ngowokucina ukupha ubufakazi ngendlela yeAffidavit echasisa ngendlela athola ngayo umbiko wengozi eyehlela umkakhe.

UMongameli Mugabe LoMnu. Morgan Tsvangirai Bahlangana Okwakuqala ngo2012

Chris Gande — Mon, 6 Feb 2012 21:34:41 GMT

UMongameli Robert Mugabe lenhloko kahulumende, uMnu. Morgan Tsvangirai bahlangene ngoMvulo okwakuqala lokhu kusungulwe lumnyaka ka2012. UMugabe ubekukhefu inyanga kaZibandlela.

Ababili laba babikwa behlafune indaba ezigoqela isisekelo sombuso esitsha, ukukhethwa njalo kukaskomitshi wamapholisa uMnu. Augustine Chihuri ukubuyela esikhundleni sakhe yena isibanga sakhe sokusebenza sesaphela, iterm yakhe lokunye okubalisa ukuvezwa kwengxoxo zabababili laba zintathelizindaba zemisakazo lamaphephandaba kahulumende.UMugabe loTsvangirai babikwa bezahlangana njalo ngolweSithathu.

UChris Gande weStudio 7 uxoxe lengcwethi ecubungula ezombusazwe uMnu. Effie Dlela Ncube saqala ngokumbuza ukuthi imihlangano le, enziwa ngoMvulo maviki wonke, iphathisani khona kulokhu kungela lutho olukhanya lusenziwa yimihlangano le.

Inhelo Ezibiza Amabillion Ayisithupha Amadollar Zivunyelwa Ukusungulwa eZimbabwe

Gibbs Dube — Mon, 6 Feb 2012 21:10:01 GMT

Inhlanganiso ebona ngokuletha ukusungulwa kwamabhizimusi elizweni eye Zimbabwe Investment Authority ithi inhlelo zebhizimusi ezitshiyeneyo ezibiza amabillion edlula ayisithupha amadollar eMelika-$6,6billion, zivunyelwe ukusungula elizweni ngomnyaka ophelileyo.

UMnu. Tapuwa Mashakada ubikwa etshele umhlangano wezokuhlolisisa umnotho we Zimbabwe ukuthi inhlelo ezinengi bezikhangelelwe ukuthi zisungulwe kwezemigodi, kwezokwethekelela ezemvelo, ukulima, ukwakha kanye lokulungisa impahla etshiyeneyo kumafekithali.

UMashakada uthe loba nje kusobala ukuthi manengi amankampani afuna akuvula amafekithali kwele Zimbabwe, uhlelo lokwabelana amashares amankampani olwe Indigenization lubisela muva umsebenzi wokuthuthukiswa kwenotho yelizwe njengoba lusesatshwa ngamazwe wonke womhlaba.

Uthe kumele kuguqulwe iziqondiso zomthetho lo ukwenzala ukuthi amankampani emazweni azizwe ekhululekile ukuvula amafekitheli kwele Zimbabwe.

Uphinde wathi ukudonselala kwamabandla abusayo akuhulumende womanyano ngokhetho ngokunye okubangela ukuthi abaqondisi bamankampani bemazweni bathandabuze ukufaka imali yabo emisebenzini yeZimbabwe.

Ingcwethi kwezenotho zithi inhlelo zamankampani ezivunyelwe ukuthi zisungulwe kwele Zimbabwe inengi lazo kazizange ziyenziwe zonke ngenxa yemigoqo lemithetho engaqondakaliyo eselizweni.

Zithi imadlana engaba yisilinganiso sokulitshumi ekhulwini-10% yenhlelo zamankampani lawa ingabe ilethwe elizweni nyakenye.

Osomabhizimusi abatshiyeneyo babikwa bevunyelwe ngomnyaka ka 2010 ukuthi bavule inhlelo ezibiza amabillion edlula amabili amadola eMelika-$2,2billion.

Eyinye yengcwethi lezi uMnu. Rejoice Ngwenya uthe kusakude phambili ukuthi amankampani emazweni abelegunya lokuletha imali yawo enengi kwele Zimbabwe.

Uhulumende Uthi Inani Labahlaselwe Ngumkhuhlane weTyphoid Lingaqonga

Sithandekile Mhlanga — Mon, 6 Feb 2012 21:29:05 GMT

Uhulumende uthi lanxa eseqinise imizamo yokulwisana lomkhuhlane weTyphoid edolobheni le Harare, umkhuhlane lo ulakho ukumemethekiswa yilabo abathwele igcikwane lawo emzimbeni kodwa bengakaguli.

Isiphathamandla sogatsha lwezempilakahle uDokotela Goodswill Mombeshora ubikwa esithi abantu balakho ukuthwala igcikwane lomkhuhlane wetyphoid okwamaviki amathathu bengakwazi, njalo belithelele abanye.

Abantu asebehlaselwe ngumkhuhlane lo lokhu waqhamukayo bedlula inkulungwane.

Uphinde wasola ikhansili ye Harare ngokungaqinisi imizamo yokugcina lelidolbho lihlanzekile, okuyikho okubangele ukuqhamuka kwalumkhuhlane.

USithandekile Mhlanga weStudio 7 uxoxe loMnu. Mfundo Mlilo, isiphathamandla se Combined Harare Residents Association ngaloludaba.

Igqwetha Elikhulu Likahulumende Lethusela Ukubopha Intatheli Ngodaba Lukaskomitshi Wamapholisa

Ntungamili Nkomo — Fri, 3 Feb 2012 21:19:09 GMT

Umtshutshisi omkhulu kahulumende uMnu Johannes Tomana sexwayise ukuthi ulakho ukubopha intatheli labezombusazwe abathi uskomitshi wamapholisa kumele atshiye umsebenzi ngoba i-contract yakhe siphelile.

UTomana uthi uMnu Augustine Chihuri kasoze asuswe esikhundleni lesi, esithi akulamuntu olelungelo lokukhuluma ngodaba lwakhe ngaphandle kukaMongameli Robert Mugabe.

I contract kaChihuri ibikwa iphele ngenyanga ezedluleyo, kodwa uqhubeka esemsebenzini.

Asenelisanga ukuzwa ukuthi uMugabe engaba sowengezelele isikhathi sokusebenza kwayo.

Kodwa abeMDC bathi uChihuri kamelanga abuyele emsebenzini njalo uMnu Morgan Tsvangirai uthi uMugabe kumele akhulumisane laye bavumelane ukuthi uChihuri aqhubeke esebenza kumbe hatshi.

UTomana yena uthi abakhuluma ngaloludaba balakho ukubotshwa ngoba kuludaba olulakho ukuphazamisa ukulondolozwa kokuthula lomvikela welizwe.

Kuthethelwa eGokwe Ukuze "Injuzu" Zingaphazamisi Uhlelo Lwamanzi

Chris Gande — Fri, 3 Feb 2012 21:54:42 GMT

Induna labanye abamasiko abeGokwe babikwa belungiselela intethelelo yomkhuba wesintu emizameni yokwenqabela ukuphanjaniswa komsebenzi wokudonsa amanzi edamini leGokwe okubikwa kusenziwa yimimoya ehlala emanzini ebizwa ngokuthi zinjuzu ngolimi lwesi siShona. Le imimoya ibikwa isenqabela umsebenzi wokudonsa amanzi ukuthi uzulu awasebenzise enhlelweni zokulima ngokuthelezela lokunatha.

Umphathintambo wezamanzi, uMnu. Sam Sipepa Nkomo utshele ikhomidi yedale leSenate ngoMvulo ukuthi loludubo luke lwabakhona njalo esigabeni seManicaland. UNkomo utshele iStudio 7 ukuthi umsebenzi sikhulumanje usumile kulezondawo.

Kunjalo nje, ingcwethi ecubungula ezamasiko esintu, uMnu. Zwidekalanga Khumalo utshele uChris Gande weStuio 7 ukuthi imimoya yenjuzu asiyo nkolo ekhona esikweni lesiNdebele ngakhoke akakwazi ngempela ukuthi ingabi ikhona eGokwe ngoba ivame ukuzwakala isiba khona elwandle hatshi emadamini amancane anjengawe Gokwe.

Ukuhlaziya loludaba uGande uphinde waxoxa lengcwethi kwezombusazwe, uMnu. Rejoice Ngwenya othi ukukholwa ngokuba khona kwenjuzu lokhu kubisela muva ingqubela phambili yelizwe ngoba yena ngokubona ngokwakhe kungela nto ethiwa yinjuzu..

Inhlanganiso Ezizimeleyo Zisola iZimbabwe Media Commission

Sithandekile Mhlanga — Fri, 3 Feb 2012 21:43:10 GMT

Inengi labantu kanye lenhlanganiso ezizimeleyo sebesole ikomishini kahulumende ebona ngokwethulwa kwembiko eye Media Commission of Zimbabwe ngokwethusela ukuvimba amaphephandaba alotshwa ngaphandle kwelizwe ukuqhubeka esebenza lokuthengiswa eZimbabwe.

Amaphephandaba la ngagoqela iThe Sunday Times, iMail and Guardian alotshwa e South Africa kanye le The Zimbabwean elotshwa eNgilandi.

Ngakwelinye icele wona amaphephandaba la athi ale lungelo lokuqhubeka esebenza lokuthengiswa eZimbabwe ngoba esithi ayabhadala imali yomthelo kuhulumende.

UMnu. Njabulo Ncube, isiphathamandla se MISA-Zimbabwe utshele uSithandekile Mhlanga weStudio 7 ukuthi kuyamangalisa ukuthi kungani uhulumende esekhathazwa ngumsebenzi wamaphephandaba la ngalesi sikhathi.

Kulabantu Abangaba Yisigidi Abalambayo Okumele Banikwe Ukudla Kusiyafika uMbimbitho: WFP

Gibbs Dube — Fri, 3 Feb 2012 19:54:49 GMT

Inhlanganiso yamazwe womhlaba ebona ngokunceda abantu ngokudla eye World Food Program ithi abantu abangaba yisigidi kwele Zimbabwe bakhangelelwe ukuthola ukudla kunhlelo zokuphandela abalambayo kusukela khathesi kuze kuyefika uMbimbitho lonyaka.

Umnu. Simon Camelbeeck ongumsekeli kamqondisi we WFP eZimbabwe uthi okwamanje abantu abazinkulungwane ezilikhulu lamatshumi amahlanu abasezabelweni ezitshiyeneyo bathola ukudla okunjenge mpuphu, amafutha okupheka kanye lendumba okuthengwa yinhlanganiso le.

Umnu. Camelbeeck uthi kulembiko eyethusayo etshengisa ukuthi amabele asetshile ezabelweni ezinengi ngenxa yokuswelakala kwezulu ngakho kumele kudingwe izigidi ezilitshumi lambili zamadollar yokuthenga ukudla kwabalambayo.

Uthi indlala ehlasele izabelo ezinjenge Matabeleland South, Masvingo, Manicaland lenkabazwe mnyaka yonke kumele iphungulwe ngokucebisa uzulu ukuthi ahlanyele amabele anjengo phoko lokunye okuvuthwa loba kungela zulu elinengi.

Okwamanje amabele asetshile ezigabeni lezi ngenxa yokuswelakala kwezulu okubangelwe yi tropical cyclone Funso elethe izulu elimangalisayo kwamanye amazwe yancitsha indawo ezinengi zelizwe.

Umnu. Everson Ndlovu osebenza ukunika uzulu ukudla uthi kumele kube lenhlelo zabantu makhaza ezabelweni ezingela zulu ezinjengo kufuya inkomo ukwenzela ukulwisana lendlala.

Qaphelani Uyeza Umvukela: USoyinka Utshela UMugabe Labanye

Ntungamili Nkomo — Thu, 2 Feb 2012 21:15:30 GMT

Umlobi olodumo uWole Soyinka uthi ontandokayiphikiswa beAfrica abafana loMongameli Robert Mugabe loAbdoulaye Wade weSenegal balakho ukuhlamukelwa ngabantu babo basuswe embusweni ngodlakela.

USoyinka, oyisizalwane seNigeria uthi uMugabe loWade kumele batshiye umbuso ngoba kungekho okutsha abalakho okungathuthukisa amazwe abo.

Uthi abakhokheli beAfrica abangontando kayiphikiswa balakho ukwehlelwa yilokho okwehlele inkokheli yamazwe eMiddle East abathile abafana loMongameli Muammar Gaddafi weleLibya loMnu Hosni Mubarak weleEgypt.

Kodwa uMugabe seke waxwayisa ukuthi abalakho ukulokotha umvukela bazajeziswa kabuhlungu.

Ingcwethi ecubungula ezombusazwe uMnu Nkululeko Sibanda uthi kaboni okwenzakale eMiddle East kusenzakala eZimbabwe.

Inkampani yeNdizamtshina eyeEmirates Airlines Isungula Inhambo eHarare

Gibbs Dube — Thu, 2 Feb 2012 21:12:04 GMT

Inkampani ye ndizamtshina elodumo eye Emirates Airlines ngoLwesithathu isungule uhlelo lwayo lokusebenzela eZimbabwe le Zambia okuzakwenza ukuthi abantu be Zimbabwe bahambe lula emazweni atshiyeneyo.

Abantu abanengi abagoqela iziphathamandla zikahulumende lezohlangothi olubona ngokuphaphisa indizamtshina kwele Zimbabwe eze Civil Aviation Authority kanye labamele iEmirates airlines bathakazelele okwenziwe yi nkampani le ezabe iphaphisa indizamtshina zayo zisuka eHarare zisiya eZambia, Dubai, lasemazweni asentshonalanga le mpumalanga.

Umnu. Walter Mzembi umpathintambo wezokwethekelelwa kwelizwe lokulondolozwa kwemvelo, okade emele uhulumende labanye bakhe, uthi inkampani le ilakho ukulethela ele Zimbabwe inzuzo enkulu engathuthukisa inotho ikakhulu emsebenzini wezokwethekelelwa kwelizwe abemzini bezobuka ezemvelo.

UMzembi uthi umsebenzi wokubukwa kwzemvelo ukhangelelwe ukulethela ele Zimbabwe amabillion amahlanu amadollar eMelika kusiyafika umnyaka ka 2015.

Uphinde wathi iEmirates airlines ilakho ukubhidliza iAir Zimbabwe ekhanya idonsa kanzima isindwa yikubhadala izikwelede osoklwenze yaze yamisa inhambo zayo zendizamtshina eziya kwamanye amazwe ngenxa yezikwelede lezo.

Inkampani ye Emirates Airlines izabe ile nhambo zokuya kwele Zimbabwe kahlanu ngeviki okuzakwenza ukuthi incintisane kule ibhizimusi lenkampani yendizamtshina yakwele South Africa eye South African Airways.

Umnu. Masimba Kuchera oyingcwethi kwezenotho uthi ukusungulwa komsebenzi wale inkampani eZimbabwe kulakho ukuphathisa kakhulu ekuguquleni lokuthuthukisa umnotho we Zimbabwe.

Izakhamizi ZeHarare Ziphikisana Lekhansili Yalelidolobho Ngembangela YeTyphoid

Sithandekile Mhlanga — Thu, 2 Feb 2012 17:58:54 GMT

uGatsha lwezempilakahle kukhansili yedolobho leHarare luthi amanzi aphuma kungxenye yezibhorani ezikulelidolobho awahlanzekanga, okungenye yembangela yokumemetheka komkhuhlane we typhoid kuleli dolobho.

Okhokhela lolugatsha udokotela Propser Chonzi uveze lokhu ngolweSine esethekelela ikilinika ye Kuwadzana 4 elo Mnu. Nelson Chamisa omela umuzi weKuwadzana edale lephalamende. Iklinika le ibikwa yelaphe abantu abahlaselwe yi typhoid abedlula amatshumi amathathu ngoLwesine kuphela.

UMnu. Chamisa yena ukhuthaze uhulumende ukuthi aqinise imizamo yokwenqabela lumkhuhlane.

Ukuze sihlaziye udaba lomkhuhlane we typhoid, uSithandekile Mhlanga weStudio 7 uxoxe lokhansila Peter Moyo weNorton eHarare, endawonye loMnu. Mfundo Mlilo, umqondisi we Combined Harare Residents Association ngaloludaba.

Idolobho LeHarare Liqinisa Imizamo Yokulwisana Lomkhuhlane WeTyphoid

Sithandekile Mhlanga — Wed, 1 Feb 2012 21:13:32 GMT

Inkokheli kamanisipala we Harare iyavuma ukuthi isiyehluleka ukutholisa izakhamizi zaleli dholobho amanzi eneleyo njalo ahlanzekileyo. Linkokheli iveze njalo ukuthi sokufdingakala ukuba kwengezelelwe indawo lapho abantu abahlala eGreater Harare abathola khona amanzi. IGreater Harare ibalisa oNorton, Chitungwiza, Epworth kanye le Ruwa. Kubika intathelizindaba yeStudio 7 uMavis Gama eseHarare.

Kusenjalo, uMayor wedolobho lako Bulawayo uMnu. Patrick Thaba Moyo utshele uSithandekile Mhlanga weStudio 7 ukuthi izakhamizi zakulelidolobho zingethuki ngoba imikhuhlane enjenge typhoid le cholera ayisoze iphonguqhamuka mahlayana koBulawayo ngenxa yendlela ikhansili le esebenza ngayo.

Amabele Asetshile Ezabelweni Ezinengi ze Zimbabwe

Gibbs Dube — Wed, 1 Feb 2012 20:49:52 GMT

Izakhamizi zezigabeni ezibalisa iMatabeland South, Masvingo, Manicaland kanye le Nkabazwe zithi amabele asetshile okwesabekayo ngenxa yokusilela kwezulu.

Lokhu kubikwa kubungelwa lizulu likazamcolo eleTropical cyclone Funso eline lilinengi kwamanye amazwe angomakhelwane agoqela kwele Mozambique le Swaziland kodwa lisilela endaweni ezinengi ze Zimbabwe.

Izakhamizi lezi zithi sokumhlophe nke emasimini njengoba isikhudumezi esilokhe sabamba izabelo lezi kusukela ngoMpalakazi nyakenye ngesikhathi icyclone le iqalisa ukuphehla umoya otshisayo ovunguzele kwele Zimbabwe.

Zithi kusobala ukuthi kuzaba lendlala enzima lonyaka ngenxa yokutsha kwamabele akade ekhangelelwe ukuthi angaletha isivuno esithe xaxa.

Indawo eziswele kakhulu izulu zibalisa kubo Gwanda South, Matobo, Plumtree, Beitbridge, Insiza lezinye indawo ze Masvingo, eManicaland le Nkabazwe.

Umqondisi we Zimbabwe Metereological Services uMnu. Tichaona Zinyemba uthi isikhudumezi esihlasele indawo lezi silethwe ngumoya otshisayo ophehlwe yi cyclone Funso.

UZinyemba uthe kujayelekile ukuthi icyclone ilethe isikhudumezi kumbe izulu elinengi kodwa okwamanje kukhanya ivale izulu.

Isakhamuzi se Bazha eMatobo uMnu. Bekithemba Nkomo uthe amabele asetshile kakhulu emasimini.

Umnu. Thandeko Zinti Mnkandla omele iGwanda North kudale lephalamende uthi izakhamizi sezisesaba lokuhamba emasimini ngenxa yamabele asetshe okudabula inhliziyo.

Kuqhamuka Ukufuthelana Phezu Kwesikhundla Sikaskomitshi Wamapholisa

Chris Gande — Wed, 1 Feb 2012 21:35:24 GMT

Sekuqhamuke ukufuthelana phakathi kukaMongameli Robert Mugabe labanye bakhe abakuhlumende womanyano phezu kokuphela kwesibanga somsebenzi i-term kasikomitshi wamapholisa, uMnu. Augustine Chihuri. Isibanga somsebenzi kaChihuri, owaphiwa leso sikhundla ngomnyaka ka 1991, siphele ngoLwesibili ebusuku.

Ibandla leMDC lenhlanganiso ezizimeleyo zihlala zisethesa uChihuri icala lokusekela uhlangothi lweZanu PF ekusebenzeni kwakhe.

Icele leMDC elikhokhelwa nguMnu. Morgan Tsvangirai lifunge lathi lizasebenza gadalala ukuvimba uChihuri ukuthi aphiwe elinye ithuba lokuba nguskomitshi wamapholisa eZimbabwe. Laloba kunjalo, isikhulumi sikaMongameli Mugabe sisithi ibandla leMDC kalilamandla vele okuphatha loba ukupha imibono yalo kulolu daba.

Isikhulumi sikaTsvangirai, uMnu. Luke Tamborinyoka utshele iStudio 7 ukuthi bazalwisa kanzima uMugabe aze avume ukuthi abonisane labanye bakhe ukuthi kukhethwe omunye umuntu ongasi Chihuri. Isikhulumeli samapholisa uMnu. Wayne Bvudzijena walile ukukhuluma leStudio 7 phezu kwaloludaba.

Ukuhlaziya loludaba uChris Gande weStudio 7 uxoxe lengcwethi ecubungula ezombusazwe, uMnu. Zenzele Ndebele othi loludaba luzatshengisa sobala ukuthi oyinkunzi esibanyeni sikahulumende womanyano ngubani.

IMDC Isola UMugabe Ngokwala Ukunanza Uhulumende WeLibya

Ntungamili Nkomo — Wed, 1 Feb 2012 21:17:27 GMT

Amacele womabili eMDC sesole uMongameli Mugabe ngokuqhubeka esala ukwamukela uhulumende omutsha kweleLibya kanye lokuvuselela ubudlelwano lalelolizwe.

EleZimbabwe lixotshe ummeli weLibya nyakenye ngemva kokuba eveze ukuba ubengasasekeli umbuso kaMuammar Gaddafi kodwa sekuqembu labahlamuki beNational Transitional Council abayibo asebebusa.

Ekhuluma emhlanganwei weAfrican Union osanda kwedlula eEthiopia uMugabe usole kakhulu iAfrican Union ngokwamukela uhulumende omutsha lo, okuveze sobala ukuthi kazimiselanga ukuvuselela ubudlelwano phakathi kweZimbabwe leLibya.

Isikhulumeli seMDC ekhokhelwa nguMnu Welshman Ncube, uMnu Nhlanhla Dube uthi uMugabe kalalungelo lokutshela abantu beLibya ukuthi kumele babuswe ngubani.