Nemusi weChitatu, mutungamiri wehurumende, VaMorgan Tsvangirai, nemutevedzeri wavo, VaArthur Mutambara, vakaita musangano nevatori venhau vakavazivisa kuti vainge vatenderana mumusangano wavainge vaita nemutungamiri wenyika, VaRobert Mugabe, kuti VaChihuri vachambofanobata matomu pachitariswa kuti ndiyani akakodzera kutora chigaro ichi.

Asi neChina, mutauriri waVaMugabe, VaGeorge Charamba, vakazivisa mubepanhau reHerald kuti VaChihuri vainge vapihwa basa kusvika muna 2014. VaCharamba vaudza Studio 7 kuti VaChihuri vatori panyanga kusvika muna 2014.

Mutauriri waVaTsvangirai, VaLuke Tamborinyoka, vanoti zviri kutaurwa naVaCharamba hachisi chokwadi.

Nhengo yeZanu-PF inomirira Mwenezi East muparamende, VaKudakwashe Bhasikiti, vanoti VaMugabe vane simba rekudoma VaChihuri vasina kusuma VaTsvangirai.

Nyanzvi munyaya dzezvemitemo uye vachidzidzisa paUniversity of Zimbabwe vanoti VaMugabe vanofanira kuzivisa nyika kuburikidza nekudhinda mubepa rehurumende chiziviso chekuti VaChihuri vakagadzwa zvakare semukuru wepamurisa.

Hurongwa hwekunzwa nyanzvi dzichitaura pamusoro pezviri kuitika muZimbabwe hunoitwa nebato re MDC inotungamirwa naVa Morgan Tsvangirai.

Mapurisa anonzi akamisa musangano uyu pahotera iri mu Harare apo vanhu vakanga vaungana kuti vazonzwa Professor Patrick Bond, ve Centre for Civil Society pa University of KwaZulu Natal mu South Africa vachitaura.

VaBond vaifanirwa kutaura pamwe chete naVa Ibbo Mandaza ve Southern African Political Economy Series kana kuti SAPES.

Va Bond, avo vanoremekedzwa zvikuru munyaya dzekufunga nepana mazana, vakashamiswa zvikuru nekuita kwemapurisa nekuti Zimbabwe imwe yenyika dziri kubatwawo nenyaya dziri kuitika pasi pano zvikuru sei nyaya dzemamiriro ekunze.

Nyanzvi inoona nezvematongerwo enyika uye vari mukuru anoona nezvebazi rwezvegwara nekupangana mazano muMDC-T, Va Charles Mangongera, vanoti vakashamiswawo nekuita kwemapurisa.

VaMangongera vanoti kunyange hazvo musangano wavo wakarambidzwa kuenderera mberi, vacharonga kuita mumwe musangano wakadai munguva pfupi inotevera.

Mumwe wemasachigaro matatu ekomiti  iyi, VaEdward Mkhosi, veMDC inotungamirwa naVaWelshman Ncube, vaudza vatori venhau kuti kunyange hazvo komiti yavo isati yazeya nyaya iyi inozotambirwa chete kana ivo semasachigaro vabvumirana nezviri mugwaro iri.

VaMkhosi vanoti vatori venhau vanofanira kusiyana nekunyora manyepo uye vanofanirwa kunyora zvavanopihwa nemasachigaro ekomiti iyi chete.

Mumwe  wemasachigaro  aya, VaDouglas Mwonzora veMDC inotungamirwa naVaMorgan Tsvangirai,  vanoti vaita musangano nevatori venhau kuitira kuti vajekese nezvenyaya iyi.

Vatiwo komiti yavo ichaonawo kuti pfungwa dzevanhu pamusoro penyaya iyi dzaremekedzwa.

Svondo rapfuura  nerino, mapepanhau munyika ange ari kunyora kuti bumbiro idzva richarambidza harahwa dzine makore anodarika  makumi manonwe pamwe neavo vakambotungamira nyika kukwikwidza musarudzo dzemutungamiriri wenyika, izvo zvinozoita kuti mutungamiri wenyika, VaRobert Mugabe, vasakwikwidze musarudzo idzo dzakatarisirwa kuitwa nguva ipi zvayo kubva pari zvino.

Asi bato ravo reZanu PF rinoti VaMugabe ndivo varinoda kuti vari miririre bato musarudzo idzi.

Mumwe wemasachigaro ekomiti iyi, VaPaul Mangwana veZanu PF, vanoti kana zvikafamba samarongero avo, komiti yavo ichapedza kunyora bumbiro kupera kwemwedzi uno.

Vati mushure maizvozvo, bumbiro idzva iri richashambadzwa referendamu isati yaitwa.

Referendamu iyi inenge yava referendamu yechipiri kuitwa munyika, zvichitevera referendamu yakaitwa muna 2000, iyo yakaramba kutambira bumbiro rakanga ranyorwa mushure mekunge vanhu vakurudzirwa kuita izvi nesangano reNational Constitutional Assemby.

Sangano iri riri kukurudzira zvakare rwendo rwuno kuti veruzhinji vasatambire Draft Constitution pareferendamu richiti zvido zvevanhu hazvisi kuremekedzwa nemapato ezvematongerwo enyika ari muhurumende yemubatanidzwa.

Vatungamiri vemapato ari muhurumende vakazivisawo neChitatu kuti vachange vave nechekuita nekunyorwa kwebumbiro idzva remitemo yenyika, kuitira kuti rikasike kupera.

Vachitaura kuvatori venhau, mumwe wevatevedzeri wemutungamiri wehurumende, VaArthur Mutambara, vakati pari zvino vamirira gwaro rinobva kuCopac richivazivisa kuti hurongwa uhu hwasvika papi.

Vari kunyora bumbiro remitemo iri vanonzi vakapedza mipanda gumi nemisere kubva pamipanda mugumi nepfumbamwe.

Izvi zvave kupawo kuti zvirwere zvakaita sekorera neTyphoid zvirambe zvichitenderera mumaguta semagora. Mubvunzo uripo ndewekuti chii chaizvo chiri kukonzera kuti maguta aimbogara akachena afumuke kunge misha yakatamwa?.

Vamwe vanoti gurukota rezvematunhu, VaIgnatious Chombo, nebato ravo reZanu-PF, ndivo honzeri yehosha yapinda mumaguta nenyaya yavo yekuda kupindira mukutongwa kwematunhu vachiisa zvematongerwo enyika mukati.

VaChombo vakanyanyoshorwa nekudzinga kwavakaita vaimbova meya weHarare, VaElias Mudzuri, avo vaidiwa zvakanyanya nevagari vemuHarare.

Nyaya yekumiswa basa kana kudzingwa basa kwemameya naVaChombo iri kuenderera mberi.  Vamiswa kana kudzingwa vanosanganisira meya wekwaMutare, VaBrian James, meya wekuChinhoyi nameya wekuBindura.

Ukuwo makanzura mazhinji eMDC akadzingwawo basa naVaChombo gore rapera.

VeMDC vari kuchemawo nerekuti VaChombo vari kupota vachidoma vanhu veZanu-PF vasina zvavanoziva kuvaita ma"special interest councillor" ivo vachifanira kuva vanhu vanomirira vanhu vakaita sevakaremara.

Asi vamwe vanoti makanzura eMDC anyanya huori uye ari kutemerana muvhu zvisina ani akamboona. Kusashandira pamwe kwemakanzura eMDC kunonziwo kuri kudzorera shure mabasa ekanzuru.

VaJerry Gotora, avo vaimbova mutungamiri weAssociation of Rural District Councils of Zimbabwe, vanoti huouri hwanyanya mumakanzuru.

Asi mutevedzeri wegurukota rezvematunhu, VaCecil Zvidzai, vanoti VaChombo ndivo vari kukanganisa zvinhu.

Vakaoma musoro muZanu-PF, vachitungamirwa nevakadzingwa basa segurukota rezvekuburitswa kwemashoko, VaJonathan Moyo, vanotiwo tsamba yakanyorwa nemutungamiri wehurumende, VaMorgan Tsvangirai, ichienda kumutungamiri wenyika, VaRobert Mugabe, munongedzo wekuti hurumende yemubatanidzwa yakundikana.

Mutsamba yavo iyo yakaendeswa kubepanhau reSunday Mail, VaTsvangirai vaigunun’una kuti veZanu-PF vari kutadzisa kuzadzikiswa kwechibvumirano cheGlobal Political Agreement nekukweva makumbo pazvinhu zvakawanda zvinoda kugadziriswa.

VeMD-TC vari kunongedzera kuhofisi yemunyori webazi rezvekuburitswa kwemashoko, VaGeorge Charamba, vachiti  ndivo vakaendesa tsamba kuvatori venhau.

Asi VaCharamba vanoti vari kuzodzwa mafuta enguruve yavasina kudya sezvo tsamba inogona kunge yakaendeswa nevekuhofisi yaVaTsvangirai.

Mutauriri weZanu-PF, VaRugare Gumbo, vashora MDC-T vakati ndiyo iri kuvhiringidza zvinhu muhurumende yemubatanidzwa.

Asi mutauriri weMDC-T, VaDoudlas Mwonzora, vanoti mashoko aVaGumbo navaVChinamasa mashoko anotaurwa nevanhu vane bato riri kukundikana.

PSC inonzi iri kuramba kuti kune zvipoko zvevashandi izvi, kana kuti Ghost Workers, uye inonzi yakati pane zvishoma shoma zvinganzi zvakafukunurwa neongororo iyi.

Gwaro rePSC rinonzi richasvitswa kumutungamiri wenyika, VaRobert Mugabe, munguva pfupi inotevera, avo vanozotarisirwa kurisvitsawo kudare remakurukota.

Bato reMDC pamwe nemamwe masangano evashandi vehurumende vagara vari kuchema chema kuti pane vanhu vazhinji vari kutambira mari dzehurumende asi vasiri vashandi.

Ongororo yaComptroller and Auditor General yakaburitsawo gwaro rinoti pane vashandi vari kubhadharwa mari vasiri pabasa. Ongororo iyi yakakurudzira kuti hurumende iferefete nyaya iyi.

Hatina kukwanisa kubata vakuru vePSC pamusoro penyaya iyi.

Asi gurukota rezvevashandi vehurumende, Amai Lucia Matibenga, vanoti havana ruzivo nezvedanho iri, vakati semaziviro avo gwaro reEnerst and Young richiri mumaoko edare remakurukota.

Munyori mukuru werimwe sangano revarairidzi, reProgressive Teachers’ Union of Zimbabwe, VaRaymond Majongwe, vanotiwo sangano ravo rakabvira kare richiburitsa nyaya yezvipoko izvi asi raingopiwa gotsi nehurumende.

Zvinonzi mhuri idzi dzakaendeswa kuConcession, uko dzinonzi dzakanosiiwa. Varimi ava vanonzi vakasiya zvirimwa zvinoda kusakurirwa nekutariswa uye zvipfuyo zvavo zvose.

Vane ruzivo nezviri kuitika vanoti mhuri yekwaMugabe iri kuda kuwedzera purazi rayo rekuchengetera mhuka pamwe nekupfuya mombe.

Aka hakasi kekutanga kuti vanhu vabviswe pedyo nemhuri yemutungamiri wenyika. Mhuri dzine chitsama dzakabviswa paivakwa imba yaVaMugabe nemhuri yavo kuBorrowdale.

Mumiriri weMazowe West uye vari nhengo yeZanu PF, Amai Margaret Zinyemba, vanoti havasati vapirwa zvizere nezvenyaya iyi.

Mutauriri wemapurisa, VaOliver Mandipaka, vaudza Studio7 kuti vari pazororo, uye hatina kukwanisa kubata mutevedzeri wavo, VaAndrew Phiri.

Vakakwikwidza musarudzo dzekutsvaga mumiriri wemudunhu iri vakamiririra MDC-T, VaGilbert Kagodora, vanoti varimi ava vakaziviswa nezvedanho rekubviswa kwavo mukupera kwegore rapera, asi vakaramba kubva kudzamara vazobviswa nechisimba neMuvhuro.

Sangano iri rinotiwo hutongi hwemutungamiri wenyika, VaRobert Mugabe, uho hwave kusvika kwamvura yacheka makumbo zvichitevera kukwegura kwavari kuita, hunogona kuipisisa munguva iyo pane kutaura pamusoro pehurongwa hwesarudzo gore rino.

Mugwaro rayaburitsa rinonzi Zimbabwe’s Sanctions Standoff, ICG inoti sarudzo dziri kuitwa gore rino kana rinotevera dzichange dziine mhirizhonga sezvakaitika muna 2008.

Sangano iri rinoti nyika dzekumawirira dzinofanira kuvandudza nyaya yezvirango kuitira kuti Zanu-PF ibvume kuvandudza zvinhu zvairi kuramba kuita.

Sangano iri rinotiwo Zanu-PF inofanira kumisa tsika yekuti chese chanetsa yoti zviri kukonzerwa nezvirango. Rinotiwo MDC inofanira kubuda nechisungo chakajeka panyaya yekuti zvirango zvibviswe.

Mutevedzeri wemutauriri weMDC-T, Muzvare Thabitha Khumalo, vanoti bato ravo riri kuyedza kuti zvirango zvibviswe asi Zanu-PF iri kuomesa musoro.

Nyanzvi munyaya dzezvematongerwo enyika, VaJoy Mabenge, avo vanoshanda nesangano re Institute For A Democratic Alternative for Zimbabwe, vanoti zvirango zvinofanira kuramba zviripo kudzamara Zanu PF yava kuremekedza zvido zvevana veZimbabwe.

Mutongi wedare, Va Walter Chikwanha, vatura mutongo wekuti havakwanise kubvumidza mhuri yemushakabvu kuti ifukunure mutumbi wemufi vachiti havasati vaongorora humbowo hwese hwakasvitswa mudare nevafakazi vese panyaya iyi.

VaChikwanha vati kuita izvi kwakafanana nekumhanyira kumedza kutsenga uchada sezvo dare richiri pakati pekuongorora zvose zvakataurwa nevafakazi vakapa humbowo hwavo mudare.

Gweta riri kumirira mhuri yemushakabvu, Va Thakor Kewada, vakati mazvikokota wemuZimbabwe akaongorora mutumbi wemushakabvu, Va Gabriel Aguero Gonzalez, havana kuita basa nemazvo, nokudaro mazvikokota wemitumbi yevanhu veku South Africa, Va Reggie Perumel, avo vakatsvagwa nemhuri yemushakabvu, vaida kuti mutumbi uyu ufukunurwe kuti vawuongorore patsva.

Asi mutongi wedare ati dare rake harina masimba ekuti mutumbi uyu ufukunurwe pasi pemutemo we Inquest Act uyo unoti gurukota rezvinoitika mukati menyika ndiro rine masimba ekupa mvumo yekuti mitumbi yevanhu ifukunurwe.

VaChikwanha vati pavachapedza kuongorora humbowo hwese hwakasvitswa kudare, vachaudza gweta guru renyika kuti ritore matanho kana vaona kuti pane chikonzero chingaita kuti mutumbi uyu ufukunurwe.

Zvichakadai, Amai Mujuru, avo vasvitsa humbowo hwavo kudare kuburikidza negwaro rehuchapupu ravakanyora, affidavit, iro raverengwa nemuchuchisi wehurumende, Va Clemence Chimbari, ndivo vaita mufakazi wekupedzisira paongororo iyi.

Vati vakasvika pamba iri papurazi pakafira murume wavo papurazi reRuzambo Alamaine,  ku Beatrice mutumbi wemushakabvu uri murimi remoto uye vanodzimura moto hapana chavakabatsira nacho sezvo vakanga vasina mvura pavakasvika.

Vatiwo vakanga vasina svumbunuro dzepamba pemushakabvu. Kupedza kwaita vafakazi kupa humbowo kudare kwasiya mibvunzo yakawanda pane mhinduro sezvo pavafakazi vose pasina ari kutaura kuti chakakonzera moto unonzi wakazouraya Va Mujuru chii.

Ongororo iyi yanga ichiitwa nedare nepamusana pekuti mhuri yemushakabvu iri kuda kuziva kuti chakakonzera kuti Va Mujuru vafe chii.

Sachigaro we National Constitutional Assembly, uye vachidzidzisa zvemitemo pa University of Zimbabwe, Va Lovemore Madhuku, vanoti chikumbiro chemhuri yekwaMujuru chakakurumidza kuitwa nekuti mutongi ari kuongorora nyaya iyi anofanirwa kuphiwa nguva yakakwana yekuti aongorore zvose zvakataurwa nevafakazi asati apa mutongo wake.

Vatungamiri vaviri ava vanonzi vakurukura nyaya dzinosanganisira dzesarudzo, bumbiro idzva remitemo yenyika riri kunyorwa, kuwedzerwa kwetemu yemukuru wemapurisa, VaAugustine Chihuri, uye kuburitswa kwematsamba anenge anyoreranwa pakati pevaviri ava nevemapepanhau, zvikuru ehurumende.

VaTsvangirai vanonzi vakanyora tsamba kuna VaMugabe svondo rapera vachiti hurumende yemubatanidzwa haisi kufamba zvakanaka. Zvaive mutsamba iyi, izvo zvinonzi zvaifanirwa kunge zviri zvakavandika, zvakazoburitswa nebepanhau reThe Sunday Mail neSvondo.

Mutauriri waVaTsvangirai, VaLuke Tamborinyoka, vaudza Studio 7 kuti vatungamiri ava vari kutarisirwa zvakare kusangana neChitatu kuti vaenderere mberi nehurukuro dzavo.

Studio7 haina kutaura nemunyori webazi rezvekuburitswa kwemashoko, uyo anotaura akamirira VaMugabe, VaGeorge Charamba, avo vasingadi kutaura nenhepfenyuro ino.

Nyanzvi mune zvematongerwo enyika, vachishanda vakazvimirira, VaCharles Mangongera, vanoti havaone musangano uyu uine chaunoburitsa, sezvo VaMugabe vachingoita zvizhinji voga vasingasumi VaTsvangirai.

Vachitaura pamberi pekomiti yedare reseneti inoona nezvemvura, VaSipepa Nkomo vakati vashandi vari kuvaka, kana kugadzirisa madhamu, vari kuramba kudzokera kunzvimbo dzavanenge vachishandira vachiti vari kuona njuzu munzvimbo idzi.

VaSipepa Nkomo vanoti kunyange hazvo ivo pachavo vasingawirirane nepfungwa dzekuti njuzu dzinotadzisa kuvakwa kwemadhamu, hapana zvavangaite kana vashandi vemubazi remvura pamwe nemakanzuru vachiwirirana nepfungwa idzi.

Nepamusana pedambudziko iri, VaSipepa Nkomo vanoti madzishe ava kugadzirira kuita mabira munzvimbo idzi, kuitira kuti njuzu idzi dzisaonekwa zvakare nevashandi vanenge vachigadzira madhamu.

VaTomana vari kutyisidzirawo vatori venhau vari kunyora nyaya yekuti temu yaVaChihuri yasvika kumagumo vachiti vari kufukura hapwa uye vanogona kusungwa pasi pemutemo weOfficial Secrets Act sezvo vari kuda kukonzera kusagadzikana munyika.

Asi pasi pemutemo wePolice Act, temu yemukuru wemapurisa inopera kwapera makore mana, ichizowedzerwa gore rega rega.

Pasi pechibvumirano cheGlobal Political Agreement, GPA,  mutungamiri wenyika, VaRobert Mugabe, vanofanira kuwirirana nemutungamiri wehurumende, VaMorgan Tsvangirai, vasati vagadza vanhu pamabasa epamusoro muhurumende.

VaTsvangirai vanoti havasi kuzorega VaMugabe vachiita madiro ajojina rwendo rwuno panyaya iyi.

Asi VaTomana vaudza Studio7 kuti VaMugabe chete ndivo vane simba iri.

Nyanzvi munyaya dzezvemitemo, uye vachidzidzisa paUniversity of Zimbabwe, Professor Lovemore Madhuku, vanovezve sachigaro weNCA, vanoti VaTomana havataure segweta nekuti havasi kutevedzera mutemo wenyika.

Chirwere ichi, icho chakatangira mumusha weDzivaresekwa, chinonzi chava mumatunhu anodarika makumi mana eguta reHarare.

Vanhu vanodarika chiuru nemazana mashanu vanonzi vakabatwa nechirwere ichi. Pave kutyirwa kunzi chirwere ichi chingangopararira munzvimbo dzakawanda munyika.

Mukuru anoona nezvekudzivirirwa kwezvirwere mubazi rezvehutano, Doctor Portia Manangazira, vanoti dambudziko rechirwere ichi raitawo kuti kanzuru yeguta reHarare pamwe nebazi rezvehutano vaite muonera pamwe chuma chemuzukuru mukuedza kuri dzivirira.

Kanzuru yeguta reHarare inonzi yakatangawo kutora matanho ekudzivirira kupararira kwechirwere ichi, akaita sekuvhara zvibhorani zvine mvura ine tsvina, uye kuendesa mvura yakachena kumisha inogara veruzhinji.

Mukuru weCommunity Working Group on Health, VaItai Rusike, uye vari nyanzvi mune zvehutano, vanoti panodiwawo dzidziso yakasimba muvanhu kuitira kuti nyika isarambe ichitambudzwa nezvirwere zvegore ragochanhembe.

Mari yekufambisa yemushandi wepasi pasi ari muGrade B1, yakwira kubva pamadhora makumi mana nemana pamwedzi kusvika pamadhora makumi matanhatu nematatu pamwedzi. Mari yekubatsirika nepekugara yakwirawo kubva pamadhora makumi mashanu kuenda pamadhora makumi manomwe nemana pamwedzi.

Mari yemuhoro inotambirwa nemushandi wepasi pasi yaramba iri pazana nemakumi mashanu ane madhora mapfumbamwe pamwedzi. Mari dzekubatsirikana idzi dzichatambirwa kubva muna Ndira.

Izvi zvinenge zvave kureva kuti mari yemushandi uyu yose yasanganiswa yave kukwira kubva pamazana maviri nemakumi mashanu ane madhora matatu, $253.00 kusvika pamazana maviri nemakumi mapfumbamwe ane madhora matanhatu, $296.00.

Izvi zvinoreva kuti mushandi wepasi pasi awedzerwa nemadhora makumi mana nematatu pamwedzi, $43.00 semari yekubatsirikana.

Sachigaro wesangano rinomirira vashandi vehurumende reApex Council, Amai Tendai Chikowore, vanoti vari kuramba vachirwisa kuti mari dzemihoro dziwedzerwe, izvo zvaita kuti vasvitse tsamba yekukumbira kubatsirwa kumahofisi emutungamiri wehurumende, VaMorgan Tsvangirai.

Vashandi vehurumende vari kuda kuti mushandi wepasi atangire pamazana mashanu nemakumi matatu ane madhora masere, $538.00 pamwedzi. Studio7 haina kukwanisa kunzwa divi rehurumende panyaya iyi kunyange hazvo hurumende ichiti haina mari.

Munyori mukuru weProgressive Teachers Union of Zimbabwe, PTUZ, VaRaymond Majongwe, vanoti sangano ravo rakatsamwiswa zvikuru nechiitiko ichi.

VaMajongwe vanotiwo ichi chinofanirwa kuve chidzidzo kuvashandi vose vehurumende kuti vanofanirwa kuita muonera pamwe chuma chemuzukuru panyaya dzemihoro.

Nhumwa dzeEU dziri kutungamirwa nemumiriri weEU muZimbabwe, VaAldo Dell’ Ariccia. Asi VaMatema vaudza ZBC kuti hapana chinobatsira kuita musangano neve EU kana vasina kubvisa zvirango zvavakatemera mutungamiri wenyika, VaRobert Mugabe, nevamwe vakuru muZanu-PF.

Nyanzvi munyaya dzezvematongerwo enyika dzinoti Zanu-PF yave kuda kuomesazve musoro panyaya yekudyidzana nedzimwe nyika mushure mekunge mwedzi wapera, gurukota rezvematunhu, VaIgnatious Chombo veZanu-PF, varambidza mamwe mameya kushanyira America.

Muzinda weAmerica muZimbabwe wakange waronga rwendo urwu senzira yekusimbaradza hukama pakati peZimbabwe neAmerica.

EU iri kutarisirwawo mumazuva mashoma anotevera kugara pasi kuBrussels, Belgium kuti izeye nyaya yekuti yobvisa here kana kuti kwete zvirango zvakatemerwa VaMugabe nevamwe vavo muZanu-PF nenyaya yekutonga nedemo.

Vanokokera Zanu-PF mudare reparamende, VaJoram Gumbo, vanoti vanonzwisisa danho ratorwa naVaMatema.

Asi nyanzvi munyaya dzezvekudyidzana nedzimwe nyika, VaClifford Mashiri, vanoti zviri kuitwa neZanu-PF hazvishamise sezvo yagara ichida zvekunetsana nedzimwe nyika.

VaChakaodza vashaikira ku St Annes Hospital mu Harare. Kufa kwaVa Chakaodza kunotevera kushaya neSvondo kwemumwe mutori wenhau, Makuwerere Bwititi, uyo aishandira ku Namibia.

Va Chakaodza vakamboshanda ku Zimbabwe Institute of Development Studies yaiva pasi pe University of Zimbabwe, uko vakanga vari chipangamazano. Mushure mezvo, VaChakaodza vakazoshanda semukuru webazi rezvekuburitswa kwemashoko.

Vakazoitwa mupepeti webepanhau re Herald. Mushure mezvo VaChakaodza vakazoshanda zvakare ne Standard Newspaper semupepeti waro.

Pari zvino vanga vachinyorera Financial Gazette kunyange vanga vachinyora vari muchipatara.

Masangano evatori venhau e Zimbabwe Union of Journalists ne MISA-Zimbabwe anoti kufa kwaVa Chakaodza kurasikirwa zvikuru kwaita nyika.

Vanhu vakaungana kumba kwavo ku 82 Goodrington Road, mu Bluff Hill, muHarare. Mutevedzeri wasachigaro weMISA-Zimbabwe, Va Kumbirai Mafunda, vanoti Zimbabwe yarasikirwa zvikuru nerufu rwaVa Chakaodza.

Zvichitevera kukundikana kwenhaurirano idzi sangano remubatanidzwa wemasangano anomirira vashandi  vehurumende, reApex Council, rinoti rave kukwidza nyaya iyi kumutungamiri wehurumende, VaMorgan Tsvangirai, pamwe nemutungamiri wenyika, VaRobert Mugabe.

Pakaita zvakare mangange panyaya yemihoro iyi gore rapera, vatungamiri vaviri ava vakazopedzisira vapindira vashandi vakawedzerwa mari dzavanotambira.

Nyanzvi mune zveupfumi uye vachishanda nesangano reLabour and Economic Development Research Institute of Zimbabwe, VaProseper Chitambara, vanoti kunyange hazvo vatungamiri vaviri ava vaine chido chekuti vashandi vawedzerwe mari, havana zvikuru zvavangaite sezvo mari iri kupinda muhomwe yehurumende iri shoma zvikuru.

Gurukota rezvevashandi vehurumende, Amai Lucia Matibenga, vakaudza paramende neMuvhuro kuti dambudziko remari dzemihoro harifanirwi kukandwa mubazi ravo chete, sezvo paine mapazi ehurumende akawanda anobata pamwe panyaya iyi.

Vakatiwo dare reparamende, iro rinopasisa bhajeti yehurumende, raifanirwa kunge rakaonawo kuti bhajeti remari yevashandi vehurumende iri pasi, roramba kupasisa bhajeti iri.

Vashandi vehurumende vakanga vachiramwa mabasa kwesvondo rose svondo rapera vachida kuti vawedzerwe mari dzavo dzemihoro.

Hurumende inoti yakaisa patafura mari inoita mamiriyoni mazana maviri nemakumi mana emadhora ichashandiswa mukuwedzera mari dzevashandi. Asi vashandi vehurumende vari kuramba kutambira.

NeMuvhuro pakaita musangano wekomiti inoona nemashandiro ari kuita COPAC wekuyedza kugadzirisa misariridzwa yechikamu chekupedzisira chebumbiro remitemo.

Asi nhengo yekomiti inomirira MDC-T, VaTendai Biti, vaudza Studio 7 kuti hapana chakabuda pamusangano uyu uye vave kutarisirwa kusangana svondo rinouya.

Nyaya dzonetsa dzinosanganisira yemasimba emuchuchusi mukuru wehurumende, nyaya yekuti vanhu votongerwa rufu here kana kuti kwete nedzimwe.

VeMDC vari kuti vave kuda kuti zvasaririra zvitauriranwe nemapato voita sungawirirano. Asi vakaoma musoro muZanu-PF vanoti uku kuda kusatevedza zvakabva muvanhu uye izvi zvikaitwa bato ravo rinofanira kubuda muhurongwa hweCOPAC roshandisa bumbiro riripo iye zvino pakuita sarudzo.

Vakaoma musoro ava vanoti SADC neAfrican Union vanofanira kutendera Zimbabwe kuita sarudzo, anenge akunda ozonyora bumbiro idzva remitemo yenyika.

Mutauriri weZanu-PF, VaRugare Gumbo, vanoti sarudzo dzinofanirwa kuitwa gore rinouya.

Nyanzvi munyaya dzezvematongerwo enyika, uye vari mukuru we Media Centre, VaEarnest Mudzengi, vanotiwo vezvematongerwo enyika havakwanise kutenderwa kunyora bumbiro remitemo.

Komiti iyi inoti haisi kufara nemashandiro ari kuita GMB kusanganisira nyaya dzechioko muhomwe nehuori hunonzi huri kuitika mu GMB makare.

Zvinonzi vakuru ve GMB vashanu, vachitungamirwa naVa Albert Mandizha, vaudza komiti iyi kuti zvirongwa zvavo zvizhinji zvekubatsira varimi zviri kukanganiswa nekuti hurumende ine chikwereti kuGMB chinosvika mamiriyoni gumi nepfumbamwe emadhora.

Vakuru veGMB vaudawo komiti iyi kuti hurumende ndiyo ine masimba ekuvaudza zvekuita panyaya yefetereza nembeu.

Imwe nhengo yekomiti yanga ichibvunzurudza vakuru ve GMB, Va Moses Jiri, vanoti Va Mandizha nevamwe vavo vavaudza kuti hurumende ndiyo inogara ichipindira mubasa ravo, zvikuru pakuti ndiani anofanira kupihwa fetereza, mbeu nezvimwe zvakadaro.

VaZvorwadza vaburitswa mutirongo mushure mekubhadhara mari yechibatiso inoita zana remadhora. Dare rati vadzoke zvakare kudare musi wa 14 Kukadzi.

VaZvorwadza vanoti vakasungwa mushure mekunge vaenda kukamba yemapurisa yeMatapi kunomhan’arira vechidiki veZanu PF veChipangano vavati vaidarika makumi masere vakanga vachida kuvabvisa kubva panzvimbo yavanoitira bhizimusi ravo.

Vati vakatozoshamisika vosungwa ivo kunyange hazvo vechidiki vavakanga vamhan'arira vakasiyiwa pasina zvavaitwa nemapurisa pakamba iyi.

VaZvorwadza vati vakarohwa nemapurisa, uye gweta ravo, VaAlec Muchadehama, pamwe nenhengo dzekomiti yeJOMIC vakanga vavashanyira vari muhusungwa, vakarambidzwa nemapurisa kuvaona.

Sachigaro wevechidiki veZanu PF mudunhu reHarare, VaJim Kunaka, vanoti bato ravo harinei nenyaya iyi sezvo VaZvorwadza vakanetsana nevagari vemuMbare.

Makambani anogadzira fotereza munyika akaita se Sables, Chemplex, Zimbabwe Fertilizer Company ne Windmill ari kuchema chema nemagetsi asiri kuwanikwa munguva yekugadzira fetereza, pamwe nekushaikwa kwemari munyika izvo zviri kuita kuti vatadze kugadzira fotereza inokwana.

TA Holdings, varidzi ve Sables, vanoti vakabvumirana ne ZESA kuti idzikise mari yavanobhadhara yemagetsi anga achidhura kuitira kuti vakwanise kugadzira fotereza.

Asi mukuru weChemplex, Va Misheck Kachere, vaudza bepanhau re Herald kuti fotereza iri kunetsa nekuti makambani ari kunetseka nekushaikwa kwemagetsi nguva zhinji. Vanotiwo havana mari yekuti fetereza yakatengwa itakurwe kubva kuMozambique.

Fotereza inonzi iri kutengeswa pamikoto, uye shoma iri kuwanikwa muzvitoro, inenge ichidhura.

Mukuru weCommercial Farmers Union,  Va Charles Taffs,  vanoti kutadza kuronga kwehurumende chimwe chizvinhu zviri kuita kuti fotereza inetse kuwana mwaka wega wega.

Nhengo yekomiti yeparamende inoona nezvekurima, Va Moses Jiri, vanoti komiti yavo ichange ichibuvunzurudza veGMB pamusoro penyaya iyi neChipiri mudare reparamende vachiti kushaikwa kwefotereza munyaya inyaya iri kuvashungurudza zvikuru.

VaMugabe vari kutarisirwa kupinda mumusangano wevatungamiri venyika dziri musangano reAU kuAddis Ababa, Ethopia kutanga nemusi weSvondo.

Mumashoko ayo kuvatori venhau, Zanu-PF inoti AU haifanire kuteerera mashoko eMDC ekuti munyika hamungaitwe sarudzo nekuti zvinhu zvichiri zvakaita manyama amire nerongo.

Mutauriri veZANU PF, VaRugare Gumbo, vanoti MDC iri kushanda nemasangano akazvimirira oga kuti ivhiringidze sarudzo.

Zanu-PF inoti mutungamiri weSouth Africa, VaJacob Zuma, vanova mutongi gava panyaya yeZimbabwe, vachatura gwaro remamiriro akaita zvinhu muZimbabwe kuAU.

Asi chipangamazano chaVaZuma, Muzvare Lindiwe Zulu, vanoti VaZuma havana hurongwa hwakadai. Vati VaZuma vangangosangana nevamwe vatungamiri veSADC Troika ndokunge vaita mukana.

Mutauriri weMDC inotungamirwa naVaWelshman Ncube, VaNhlanhla Dube, vanoti sarudzo dzinoitwa pasina kugarisana dzinobudisa kutaudzana nekuvhiringidza zvinhu sezvakaitika pasarudzo yemuna 2008.

Nyanzvi munyaya dzemitemo, uye vachishanda neZimbabwe Lawyers for Human Rights, VaJeremiah Bamu, vanoti Zanu-PF haikwanisi kuti ingodaidzira sarudzo pasina kuwirirana nemamwe mapato.

Vamiriri vemasangano akazvimirira ega mu Zimbabwe vari kumusangano we African Union vari kukurudzirawo vatungamiriri vemu Africa kuti vakurudzire VaMugabe, VaTsvangirai naVa Ncube kuti nyika iite sarudzo chete kana hurumende yazadzisa zvainofanirwa kuitwa pasi pechibvumirano chakavaka hurumende yemubatanidzwa.

Vanoona nezvekufambiswa kwezvirongwa zveCrisis in Zimbabwe Coalition kuchamhembe kwe Africa, Va Dewa Mavhinga, vanoti zvinhu zvinofanirwa kutanga zvagadziriswa pasati paitwa sarudzo.

Vanotiwo vari kuedza napose pavanogona napo kubatsira vashandi ava kugadziririsa zvichemo zvavo.

Amai Mativenga vanoti vakaita zvese zvavakakumbirwa kuti vaite nevamiriri vevashandi zvekuti hurumende ibude negwaro rayakaunza kumusangano weNational Joint Negotiating Council uyo neChitatu.

Vanoti kunyange hazvo vari kuziva uye vari kushushikana nezvichemo zvevashandi  vehurumende, pane zvimwe zvavasisakwanise kuita sezvo vave gurukota rehurumende. Vanotiwo chinobatsira kuvashandi vehurumende haisi misangano navo asi kuti misangano yavanoita neNational Joint Negotiation Council.

Amai Matibenga vanotiwo mafungiro ane vamwe vanhu ekuti ivo ndivo vari kuramba nemari hazvisizvo uye bazi ravo harisi iro rinotambirisa vashandi vehurumende.

Vanoti mari inotambiriswa vashandi vehurumende inotanga yabvumiranwa nedare remakurukota pamwe neparamende vachiti havana masimba ekushandura izvi.

Vanoti komiti yemakurukota, iyo vari nhengo, yakakumbira hurumende kuti ione zvaingaite kutsvaga mari dzekuwedzera vashandi.

Vati chimwe chikumbiro ndechekuona kuti mari iri kuwanikwa pakutengeswa kwemangoda ekwaMarange yaunzwa kubazi rezvemari kuitira kuti igobatsira panyaya dzakaita semihoro yevashandi.

Vashandi vehurumende vadzokera zvakare pakuramwa mabasa, mushure mekunge vambomisa danho iri kwezuva rimwe chete kuitira kupa mukana munhaurirano dzemihoro dzaivepo pakati pevamiriri vevashandi nevamiriri vevashandirwi.

Kunyange hazvo hurumende yaisa patafura mari inoita $240 million yainoti yakakwanisa kuwanira vashandi vayo, vashandi ava vari kuramba kutambira mari iyi vachipa zvikonzero zvakasiyana siyana, zvinosanganisira zvekuti hurumende haina kutsanangura kuti mushandi ari kuzowana marii, zvichienderana nebasa raanoita.

Vashandi vari kuda kuti mushandi wepasi atangire pa$538.00 pamwedzi. Hurumende ine vashandi vanodarika mazana maviri nemakumi matatu ezviuru, mukati mavo muchinzi mune vashandi vasingazivikanwi, kana kuti “ghost workers”.

Havasi vashandi vehurumende chete vari kuchemera kuwedzerwa mari, sezvo vashandi vemakambani akazvimirira vari kuimbawo rwiyo rwumwe cheterwo.

Nyanzvi mune zveupfumi uye vachishanda neLabour and Economic Development Research Institute of Zimbabwe, VaProsper Chitambara, vanoti hurumende inofanirwa kutanga yaratidza chido chekubata vashandi vayo zvakanaka, kuitirawo kuti makambani akazvimirira atevedzere.

Munyori mukuru werimwe remasangano evarairidzi, rePTUZ, VaRaymond Majongwe, vanoti havana kuramba kutambira mari yakaiswa patafura nehurumende kwete, asi kuti vakaramba nzira iri kuda kushandiswa nehurumende yekuti vashandi vabatsire pakupatsanurwa kwemari iyi, sezvo isina kuzivisa kuti munhu achange achiwana marii pamwedzi.

Asi  chikamu chimwe chete chasara chiri kunzi ndicho chakaomarara zvekuti zvinogona kupa kuti COPAC iputse chirongo yasvika.

Vanasachigaro veCOPAC, VaMunyaradzi Paul Mangeana veZanu-PF, pamwe naVaDoglas Mwonzora veMDC-T, vanoti vapedza zvikamu gumi nemasere uye kwasara chikamu chimwe chete icho chine misariridzwa inofanirwa kugadziriswa.

Izvi zvinosanganisira nyaya yekutongerwa rufu, kodzero dzengochani, masimba emuchuchusi mukuru wenyika nedzimwe.

Vakaoma musoro muZanu-PF vaikurudzira mumusangano weboka iri neChitatu kuti mutungamiri webato iri, VaRobert Mugabe, vabuditse bato ravo muCOPAC voita sarudzo gore rino pasina bumbiro remitemo.

VaMwonzora vanoti mashoko eZanu-PF ndeemugotsi matsuro uye vati vanotarisira kuti mukupera kwemwedzi unouya vanenge vapedza kunyora bumbiro idzva iro richazovhoterwa pareferendamu. Pari zvino COPAC iri kuzeya zvikamu zvapera.

Nyanzvi munyaya dzezvematongerwo enyika, VaPedzisayi Ruhanya, avo vari kuita zvidzidzo zvepamusoro soro paWestminster University kuBritain vanoti Zanu-PF iri kutyira kuti masimba aVaMugabe angatorwe.

Vachitaura mushure memusangano we Politburo neChitatu, mutauriri we Zanu-PF, Va Rugare Gumbo, vakati sarudzo dzichaenderera mberi gore rino.

Vane ruzivo nezviri kuitika muZanu-PF vanoti Zanu-PF iri kufara kuti iri kuwana rutsigiro kubva kune vamwe vatungamiriri veSADC vakaita semutungamiri we Zambia, VaMichael Sata.

VaSata vanoti vachatsigira VaMugabe kuti vaiite sarudzo sezvavari kuda vachiti mutungamiriri wehurumende, VaMorgan Tsvangirai, munhu anoshandiswa nenyika dzekunze.

Mutauriri we MDC-T, VaDouglas Mwonzora, vanoti mashoko aVaSata anoratidza kuti ndeemunhu achine mukaka pamhino.

Mukuru webazi re Africa Governance Program musangano re Open Society Initiative – South Africa, Va Ozias Tungwarara, vanoti zvakataurwa naVaSata hazvina kutarisirwa kunga zvichibva kune mutungamiri wenyika.

Sachigaro wemubatanidzwa wemasangano anomirira vashandi vehurumende, weApex Council, Amai Tendai Chikowore, vanoti musangano uyu hauna chawabuda nacho.

Amai Chikowore vanoti hurumende haina kutaura kuti ichatambirisa vashandi marii kunze kwekuvaudza kuti yakaisa parutivi mamiriyoni mazana maviri nemakumi mana emadhora semari dzemihoro yegore rose ra2012.

Amai Chikowore vanoti varamba izvi nekuti hurumende inofanira kupatsanura mari iyi kuitira kuti zvibude pachena kuti ndeipi yemari ichashandiswa pamihoro, pakubatsirikana, padzimba pamwe nemari yekufambisa.

Pachaitwa mumwe musangano zvakare nemusi weChipiri svondo rinouya. Vatiwo danho rinotevera richatorwa  pachitariswa zvinenge zvabuda  mumusangano uyu.

Dzimwe nhengo dzekomiti iyi dzinoti vashandi vehurumende  vazhinji vange vari kuramwa mabasa, dzichiti avo vasiri kuramwa mabasa ndevaya vanoshandiswa nevakuru kutyisidzira vamwe kana kuti vanoita huwori kwavanoshanda.

Imwe nhengo yeApex Council, VaRaymond Majongwe, vanotiwo kana vashandi vese vakaramba kuita basa, zvichemo zvavo zvinogadziriswa nekukasika.

Vashandi vehurumende vakatanga kuramwa mabasa  nemusi weMuvhuro svondo rino vachida kuti mari dzavo dzemihoro dziwedzerwe.

Vari kuda kuti mushandi anotambira mari yepasi pasi ange achitangira pamazana mashanu nemakumi matatu nemasere emadhora pamwedzi. Vashandi ava vange vadzokera kumabasa neChitatu vakamirira zvinobuda mumusangano wange uri kuitwa.

Panguva iyo vashandi vehurumende vari kutadza kuwirirana nevashandirwi pahurukuro dzemihoro, vashandi vepasi vemumapurazi vakawedzerwa mari dzavo dzepamwedzi nezvikamu zvinomwe kubva muzana, vachibva pamadhora makumi mashanu nemashanu pamwedzi, vachienda pamadhora makumi mashanu nemapfumbamwe.

Izvi zvakatevera hurukuro dzakaitwa nesangano rinomirira vashandi munyaya dzezvekurima, reNational Employment Council for Agriculture, pamwe nevashandirwi, vanove varimi.

Asi vakafanobata chigaro chemunyori mukuru wesangano rinomirira vashandi vemumapurazi, reGeneral Agriculture and Plantation Workers Union of Zimbabwe, GAPWUZ, VaGift Muti, vanoti havasi kufara nemari iyi sezvo iri pasi-pasi zvikuru zvichienzaniswa nePoverty Datum Line.

Nyanzvi mune zveupfumi uye vachishanda nesangano reLabour and Economic Development Institute of Zimbabwe, VaProsper Chitambara, vaudzawo Studio 7 kuti pakuramwa mabasa kwevashandi vehurumende, hurumende inofanirwa kuita ongororo yevashandi vayo kuitira kuti iburitse vari kuba mari ivo vasiri vashandi.

Panyaya yekuwedzerwa mari kwevashandi vemumapurazi, VaChitambara vanotiwo zvinosiririsa kuti vana muzvinapurazi vanopa vashandi vavo mari iri pasi pasi zvakadaro. Vati dambudziko riri pavarimi vatsva, avo vasiri kuda kubata vashandi vavo zvakanaka.

Vari kuda chigaro chasachigaro weAU ndiVaJean Ping vekuGabon, avo varipo ikozvino uye Amai Nkosazana Dhlamini Zuma vekuSouth Africa. Gabon yakatumira nhumwa yayo kuZimbabwe, VaEmmanuel Issoze Ngendet, vachitsvaga rutsigiro.

Asi Zanu-PF inoti haina kufara nekuti vakazoita musangano nemutungamiri wehurumende, VaMorgan Tsvangirai, kumba kwavo kuStratahaven muHarare mushure mekunge vaita musangano nevakafanobata chigaro chemutungamiri wenyika, VaJohn Nkomo.

ZBC, iyo inorerekera kuZanu-PF inoti Gabon inoshandiswa neFrance kuti ipe mari kuMDC-T ichityora mitemo yenyika isingatenderi kuti mapato ezvematongerwo enyika apihwe mari nenyika dzekunze.

Tayedza kubata gurukota rezvekudyidzana nedzimwe nyika, VaSimbarashe Mumbengegwi, asi hatina kuvabata. Munyori anoona nezvekudyidzana nedzimwe nyika muMDC-T, VaJameson Timba, vanoti chava chigariro kuti ZBC inoreva nhema.

Nyanzvi munyaya dzezvekudyidzana nedzimwe nyika, VaClifford Mashiri, avo vanoshanda vakazvimirira vanoti zvoitwa neZanu-PF zvinonyadzisa uye ishaisano yekuti MDC isaone wekudyidzana nayo.

Izvi zvinotevera kufa kwemutori wenhau aive nemukurumbira munyika, Freedom Moyo, svondo rapera.

Moyo akaita tsaona ndokurasikirwa neropa rakawandisa. Vana chiremba vepachipatara chaairapirwa vakanetseka zvikuru kuwana ropa rekuti abatsirwe kuitira kuti asarasikirwe nehupenyu hwake. Ropa rakazouya kubva kuBlood Transfussion Services asi hazvina kuzobatsira.

Masangano aya ari kukurudzira vanhu muHarare ne Bulawayo kuti vaende kunopa ropa muhurongwa huri kutanga neMugovera.

Vanoona nezvekuburitswa kwemashoko kuNational Blood Services, Muzvare Esther Masunda, vanoti vanhu vakuru munyika ndivo vanopihwa ropa kunyanya asi vashoma shoma ndivo vari kupa ropa.

Mutevedzeri wasachigaro weMISA-Zimbabwe, Va Kumbirai Mafunda, vari kukurudzirawo veruzhinji kuti vaende kunopa ropa. Vati vatori venhau vacharamba vachipa kurudziro iyi nekuti vaona kurwadza kwazvo kana nyika ichinge isina ropa rakakwana.

Vari mukomiti yeparamende iri kutungamira kunyorwa kwebumbiro idzva, yeCOPAC,  vanoti vange vatenderana kuti vanhu vasatongerwe rufu uye kuti matunhu apihwe masimba. Vanotiwo vanga vawirirana kuti zvizvarwa zveZimbabwe zvipihwe mvumo yekuva zvizvarwa zvedzimwe nyika, asi Zanu-PF yave kutsika madziro.

Nyaya yekuda kutongera vanhu rufu iri kuuya kunyange hazvo vatongi vematare vari kuti zvekutongera vanhu rufu hazvisi kushanda nekuti nyaya dzekuponda vanhu dziri kukwira gore negore.

Hatina kukwanisa kutaura nemumwe wemasachigaro anomirira Zanu PF muCOPAC, VaMunyaradzi Paul Mangwana, avo vati vari mumusangano.

Asi mumwe wemasachigaro eCOPAC, VaDouglas Mwonzora veMDC-T vabvuma kuti nyaya idzi dzave kunetsa zvekare.

Nyanzvi munyaya dzemitemo dzinoti zviri kuitwa nemapato ari muCOPAC zvekugara pasi vosarudza zvekuisa mubumbiro remitemo riri kunyorwa, zvinozvidza pfungwa dzavanhu vakaudzwa kuti chirongwa ichi ndechekutora pfungwa dzevanhu kuti dziiswe mubumbiro idzva.

Gweta rinorwira kodzero dzevanhu, VaJeremiah Bamu, avo vanoshanda neZimbabwe Lawyers for Human Rights, vanoti Zanu-PF haidi kuremekedza kodzero dzevanhu.