فلمی صنعت پر نظر رکھنے والے کچھ مبصرین کے نزدیک چونکہ دوہفتے پہلے ریلیز ہونے والی ہٹ فلم ”اگنی پتھ“ ابھی سینماگھروں میں رش لے رہی ہے اس لئے ہوسکتا ہے ”ایک میں اور ایک تو“ کو فوری طور پر وہ رسپانس نہ ملے جس کی بہت زیادہ توقع کی جارہی ہے۔ دیکھیئے کیا ہوتا ہے۔

پچھلے ہفتے ایک اور فلم ”گلی گلی چور ہے“ بھی ریلیز ہوئی تھی مگر فلم بینوں سے اسے کچھ خاص پسند نہیں کیا ۔بھارت سے موصولہ اطلاعات کے مطابق فلم نے ہفتے بھر میں صرف سوا تین کروڑ روپے کا بزنس کیا۔ویسے بھی ”اگنی پتھ“ نے جہاں اور دوسری فلموں کو اپنے سامنے کھڑا نہیں ہونے دیا وہیں ”گلی گلی ۔۔۔“کو بھی اس نے پچھاڑ دیا۔

”اگنی پتھ“ کا ذکر نکلا ہے تو یہ بھی بتاتے چلیں کہ رہتک روشن اور پریانکا چوپڑا کی اداکاری اور کرن ملہوترا کی ڈائریکشن میں بنی یہ فلم ایک ارب روپے کا ہندسہ عبور کرچکی ہے ۔ فلم نے صرف ممبئی میں گیارہ کروڑ روپے سے زیادہ کا بزنس کیا جبکہ دیگر بڑے شہروں سے بھی اچھا بزنس کرنے کی اطلاعات موصول ہورہی ہیں ۔

”اگنی پتھ “پر مجموعی طور پر 75کروڑ روپے خرچ ہوئے تھے جن میں سے نصف پہلے ہی سیٹیلائٹ حقوق سے حاصل ہوگئے تھے لہذا فلم نے پیسہ کمانے میں نیاریکارڈ تو قائم کرنا ہی تھا۔
”اگنی پتھ“ کی ریلیز سے پہلے جو تین ہٹ اور اچھا بزنس کرنے والی فلمیں چل رہی تھیں مثلاً”دی ڈرٹی پکچر“، ”ڈان ٹو“ اور” پلیئرز“ ان فلموں کا بزنس بھی ”اگنی پتھ“ کی وجہ سے متاثرہوا اور مجموعی طور پر تینوں فلمیں نے دس دس لاکھ سے زیادہ کا بزنس نہیں کیا۔

اس حوالے سے اگر پچھلے ہفتے کی بہترین فلم کسی کو قرار دیا جاسکتا ہے تو وہ ”اگنی پتھ“کے علاوہ اور کوئی نہیں ۔

شادی جمعہ کی دوپہر ممبئی کے علاقے سانتا کروز میں واقع ہوٹل گرینڈ حیات میں انجام پائی۔دلہا کی عمر 33سال اور دلہن 24سال کی ہیں۔ اس شادی پر بھارتی میڈیا نے ’کڑی نظر‘ رکھی ہوئی تھی لہذا تقریب کو نمایاں کوریج تو ملنا ہی تھی۔ادھر انٹرنیٹ پر بھی اس شادی کو خاصی اہمیت ملی۔

شادی دوپہر کے وقت ریاست مہاراشٹر اور مراٹھی رسم و رواج کے مطابق انجام پائی۔ دلہا روایتی انداز میں برات لے کر، سرپر بڑی سی پگڑی اور لمبا سا سہراباندھے ہوٹل پہنچے ۔ انہوں نے موتی جیسے سفید رنگ کی شیروانی پہنی ہوئی تھی جسے مقامی افراد ’بند گلے کی شیروانی‘ بھی کہتے ہیں ۔

دوسری جانب دلہن یعنی جینیلیا نے سرخ رنگ کے مراٹھی اسٹائل کے کپڑے زیب تن کئے ہوئے تھے۔ برات کی ہوٹل روانگی سے قبل دونوں خاندانوں نے بھی روایتی انداز کے مطابق شادی کی رسومات اداکیں۔

شادی کی تقریبات کا آغازگزشتہ منگل کو محفل موسیقی سے ہوا تھا ۔ ان تقریبات میں بالی ووڈ اسٹارز اجے دیوگن، کاجول، ابھیشیک بچن ، جیا بچن،آسین، جیکی بھاگنانی، کرن جوہر، شاہد کپور، اکشے کمار اور ساجد خان نے شرکت کی۔بھارت کے امیر ترین تاجر انیل امبانی اور ان کی اہلیہ ٹیناامبانی بھی شادی کی تقریبات میں لوگوں کی توجہ کامرکز رہے۔

محفل موسیقی کے ساتھ ساتھ ایک پر اہتمام دعوت بھی رکھی گئی تھی جبکہ آئندہ کل یعنی ہفتے کو استقبالیہ رکھا گیا ہے ۔

جنیلیا اور رتیش کی پچھلے سال گیارہ ستمبر کو منگنی ہوئی تھی تاہم اس تقریب میں چند افراد کو ہی شریک کیا گیا تھا۔ دونوں فنکاروں کی یہ پسند کی شادی ہے۔ یہ دونوں فلم ”تجھے میری قسم“کی شوٹنگ کے دوران ایک دوسرے کے قریب آئے تھے اور تب سے ہی دونوں کے افیئرز کی خبریں عام تھیں۔

اتوار کی شب امریکی شہر لاس اینجلس میں ہونے والی 'انہترویں گولڈن گلوب ایوارڈ ز' کی تقریب  میں بلیک اینڈ وائٹ دور کی خاموش فلم 'دا آرٹسٹ' بہترین  مزاحیہ فلم، بہترین مزاحیہ اداکار اور بہترین موسیقی کے ایوارڈز کے تین ایوارڈز کے ساتھ سرِ فہرست رہی۔

'ہالی ووڈ فارن پریس ایسوسی ایشن' کے زیرِ اہتمام ہر سال ہونے والے 'گولڈ گلوب ایوارڈز' کا فیصلہ تنظیم کے لگ بھگ 90 اراکین کرتے ہیں۔

ایوارڈ کی تقریب کی میزبانی مزاحیہ اداکار اداکار رکی گریون نے کی۔ فلم 'دی آئرن لیڈی' میں سابق برطانوی وزیرِاعظم مارگریٹ تھیچر کا کردار نبھانے پر بہترین اداکارہ کا ایوارڈ میرل اسٹریپ کو دیا گیا جب کہ مارٹن سکورسیس فلم 'ہیوگو' پر بہترین ہدایت کار قرار پائے۔

بہترین اسکرین پلے کا ایوارڈ فلم 'مِڈ نائٹ ان پیرس' کے لیے ووڈی ایلن کے حصے میں  آیا۔ بہترین معاون اداکار کا ایوارڈ فلم 'بگنرز' کے کرسٹوفر پلمر اور بہترین معاون اداکارہ کا فلم 'دی ہیلپ' کی اوکٹاویا اسپنسر نے حاصل کیا۔

اسٹیون اسپل برگ کی 'دی اینڈوینچرز آف ٹِن ٹنِ' سال کی بہترین 'اینی میٹڈ فلم قرار پائی جب کہ بہترین غیر ملکی فلم کا گولڈن گلوب ایوارڈ ایران کی 'اے سیپریشن' نے جیتا۔

واضح رہے کہ 'گولڈن گلوب' ہالی ووڈ  کے سالانہ 'ایوارڈ سیزن' کی پہلی بڑی تقریب ہوتی ہےجس کا اختتام  فلمی دنیا کے سب سے بڑے ایوارڈز 'آسکرز' پہ ہوتا ہے۔

'آسکرز' کی منتظم 'اکیڈمی آف موشن پکچر آرٹس اینڈ سائنسز' 2011ء کے ایوارڈ زکے لیے نامزدگیوں کا اعلان 24 جنوری کو کرے گی۔

ہوسکتا ہے آپ کو یہ الفاظ کسی جانے پہچانے اخباری اشتہار کے لگے ہوں ۔ بالکل درست اندازہ لگایا ہے آپ نے۔ زبان و بیان کچھ اسی قسم کا ہے مگر حقیقت یہی ہے کہ ممبئی فلم انڈسٹری کو ان دنوں کروڑوں کا بزنس کرنے والی فلم ’ڈرٹی پکچر‘ کے فارمولے سے ملتی جلتی کہانیوں کی ضرورت ہے جس میں جوکچھ کرے ،ہیروئن کرے جبکہ کوئی مشہور ہیرو نہ بھی ہو توبھی چلے گا۔

فلم والوں کا کہنا ہے کہ کسی زمانے میں ایسی فلمی کہانیوں کو کوئی پوچھتا بھی نہیں تھا جن کی کہانی ہیروئن کے گرد گھومتی ہو لیکن حالیہ برسوں میں کامیاب ہونے والی فلموں کو دیکھیں تو انہی فلموں سے زیادہ بزنس ہوتا نظر آتا ہے جو ہیروئن بیسڈ ہوں مثلاً ودیا بالن کی فلم ”ڈرٹی پکچر“۔بھارت سے موصولہ اطلاعات کے مطابق اس فلم کا بجٹ 15کروڑ تھا جبکہ اس فلم نے ریلیز کے ابتدائی مہینوں میں ہی 90کروڑ روپے کا بزنس کرلیا ہے۔حالانکہ اس فلم میں کوئی بڑا ہیرو بھی نہیں۔

اگرچہ اس دوران دو فلموں ”باڈی گارڈ“ اور ” سنگم“ نے ہیرو کے نام پر کروڑوں کا بزنس کیا مگر ان کا بجٹ بالترتیب 50اور45کروڑروپے تھا اور ان کے ہیروز نے بھی فلم میکرز سے کروڑوں کا معاوضہ لیا جبکہ بھارتی ہیروئینوں خصوصا ودیابالن کا معاوضہ ان ہیروز کے مقابلے میں انتہائی کم ہے۔

فلمی نقادوں کا کہنا ہے کہ ہیروز کے مقابلے میں ہیروئنز کا معاوضہ کم ہواور فلم میں کوئی بھاری معاوضے والا ہیرو نہ بھی ہو تو بھی اس کا فائدہ ہی ہوتا ہے۔ ایک جانب فلم ساز زیادہ منافع کماتا ہے تو دوسری جانب وہ ہیرو کے بھاری بھرکم معاوضہ سے بھی بچ جاتا ہے۔“

ممبئی میں ان دنوں فلم ”ڈرٹی پکچر “کی زبردست کامیابی کے بعد انڈسٹری کاٹرینڈ بدل رہا ہے اور ودیا بالن، کنگنا راناوت اور پریانکا جیسی ہٹ فلمیں دینے والی ہیروئنز کی ڈیمانڈ اچانک کئی گناہ بڑھ گئی ہے ۔ ایسے میں ہر فلم ساز کی خواہش یہ ہے کہ کسی ہلکی پھلکی کہانی پر فلم بنائی جائے جس کا ہیرو بھلے کوئی مشہور اداکار نہ ہو مگر اس کی ہیروئن ایسی ہو کہ فلم ابتدائی ہفتوں میں ہی کروڑوں کی رقم بٹور لے۔

پورے سال کی تمام فلموں کا تذکرہ یہاں کسی طور ممکن نہیں اس لئے صرف سال کی 10بڑی فلموں کی بات کرتے ہیں۔ ان فلموں کو ’بڑا‘ہونے کی بنیاد ان کی ناظرین میں پسندیدگی اور ان سے حاصل ہونے والی آمدنی کو بنایا گیا ہے۔ ۔۔۔تاہم ان دس فلموں میں سے ایک بہترین فلم کا فیصلہ ہونا ابھی باقی ہے۔

بھارت کے موخر اخبار’ ٹائمز آف انڈیا‘ نے سال 2011ء کی جن دس فلموں کو کامیاب ترین قرار دیا ہے ان کے نام اور ان کی تفصیل کچھ اس طرح ہے:

باڈی گارڈ

سلمان خان اور کرینہ کپور کی فلم ”باڈی گارڈ“ نے پہلے ہی دن 22 کروڑ روپے کا بزنس کرکے ایک نیا ریکارڈ بنایا۔ لیکن فلم کی کہانی اور ڈائریکشن پر کچھ زیادہ نہیں کہا جاسکتا تاہم موسیقی اور ایکشن نے فلم کو کامیاب بنانے میں اہم کردار ادا کیا۔ اس فلم کا ایک ڈائیلاگ ” مجھ پر ایک احسان کرنا کہ مجھ پر کوئی احسان نہ کرنا“ فلم بینوں میں شہرت کا باعث بنااورجونوانوں کی طرف سے ہر جگہ دوہرایا بھی گیا۔

را۔ون

اس فلم کی جدید ٹیکنک اور گرافکس دونوں لاجواب رہے۔ شاہ رخ خان نے اسے سائنس فکشن تھرلر بنانے کے ساتھ ساتھ خود کو سپر ہیرو کے طور پر بھی پیش کیا۔ فلم نے زبردست بزنس کیا جبکہ فلم کے ایک گیت” چھمک چھلو“ نے ناظرین کو سینما ہالز کی جانب متوجہ کیا۔

دی ڈرٹی پکچر

ایکتا کپور کی فلم ”دی ڈرٹی پکچر“ میں ودیا بالن نے جس قسم کا کردار ادا کیا ہے اس نے ہندی فلم بینوں کو چونکا دیا۔ ودیا نے فلم میں بہت ہی حیرت انگیز کردار ادا کیا ہے تاہم ناقدین کے مطابق فلم کے ذومعنی جملے ، ودیا بالن کے انتہائی مختصر کپڑے اور حرکات و سکنات ایسی تھیں کہ جس کا ذکر کرتے ہوئے بھی لوگ شرما جائیں لیکن اس کے باوجود فلم کامیابی سے دوچار ہوئی۔ اس فلم کی کامیابی سے اس تاثر کی بھی نفی ہوئی کہ کسی بھی خان ہیرو کے بغیر بننے والی فلمیں بھی کامیابی کے نئے ریکارڈ ٹوڑ سکتی ہیں۔

ریڈی

رومانٹک کامیڈی فلم ” ریڈی “ سلمان خان کی ہٹ فلموں کی فہرست میں نیا اضافہ ثابت ہوئی۔ڈائریکٹر نثار بزمی نے سلمان اور آسین کی جوڑی کو لیکر تھائی لینڈ میں اس فلم کی شوٹنگ کی لہذا انہیں لوکشنز کا بھی بھرپور فائدہ ہوا۔

زندگی نہ ملے گی دوبارہ

تین دوستوں کی اس کہانی نے فلم کی ڈائریکڑ ذویااختر کو کامیابی کی نئی سیڑھی عنایت کی۔ان کے بھائی فرحان اختر بھی بطور اداکار فلم میں موجود رہے جبکہ باقی فنکاروں مثلاً رہتک روشن ، ابھے دیول اور کترینا کیف نے بھی فلم کی کامیابی میں اپنا اپنا کردار ادا کیا۔ مجموعی طور پر دیکھیں تو ”زندگی نہ ملے گی دوبارہ“ اس سال کی ٹاپ فائیو فلموں شامل ہے۔

سنگھم

ایکشن اور مار دھاڑ والی فلم ”سنگھم“ کی شاندار کامیابی سے ڈائریکٹر روہت شیٹھی اور فلم کی ہیروئن کاجل اگروال کو بالخصوص بہت زیادہ فائدہ ملا۔کاجل کی یہ پہلی ہندی فلم تھی۔ اگرچہ فلم کا موضوع کرپشن کے خلاف جنگ ہے اور اس موضوع پر ہر دوسری تیسری فلم میں کام کیا جاتا ہے مگر پھر بھی” سنگھم“کو لوگوں نے بہت سراہا۔

راک اسٹار

راک اسٹار کی کہانی میں جھول ہونے کے باوجود فلم کے ہیرو رنبیر کپور اپنے کردارکے ذریعے فلم بینوں کے دلوں میں گھر کرنے میں کامیاب رہے۔ اس فلم نے پاکستانی نژاد امریکی اداکارہ نرگس فخری کو فن کی دنیا میں آگے آنے کا شاندار موقع دیا۔ فلم کی ایک اچھائی اس کا میوزک ہے جو اے آر رحمن نے ترتیب دیا جبکہ موہت چوہان کی آواز میں گائے گئے گانوں نے بھی فلم کوخوب شہرت بخشی۔

میرے برادر کی دلہن

یہ فلم نہ زیادہ اچھی تھی ، نہ زیادہ خراب ۔ لیکن یش راج کے بینر، عمران خان، کترینا کیف اور پاکستانی ایکٹر و سنگر علی ظفر کی اداکاری نے اسے کامیاب بنادیا۔ یہ بھی اس سال کی رومانٹک کم کامیڈی فلم تھی جس نے باکس آفس کی کھڑی پر خوب بھیڑ اکھٹی کی۔

دہلی بیلی

دہلی بیلی کے مکالمے ، مناظر اور باقی ’ مصالحہ‘ سب کا سب ایسا تھا جیسا کہ نہیں ہونا چاہئے تھا مگر حیرت انگیز طور پر یہ فلم بھی کامیاب رہی۔ عمران خان، کنال روئے کپور اور ویر داس کی اداکاری نے فلم کو سہارا دیا۔ اس کے ڈائریکٹر ابھی نوائے ڈیو کی فلم ” گیم“ اگر انہیں اندھیرے میں لے آئی تھی تو فلم ”دہلی بیلی“ انہیں فخر کے ساتھ چکاچوند روشنیوں کی جادوئی دنیا میں واپس لے آئی۔

یملا پگلا دیوانہ

سن دوہزار سات میں فلم ”اپنے “ کے تین ستارے سنی دیول، بوبی دیول اور دھرمیندر ایک مرتبہ پھر اس فلم میں یکجا ہوئے جس کے ڈائریکٹر تھے سمیر کارنک۔ فلم کا بجٹ بہت ہی کم تھا لیکن اسے پذیرائی خوب ملی۔ فلم بینوں کے لئے یہ بات دلچسپی سے خالی نہ تھی کہ باپ اور بیٹے ایک ساتھ کام کرتے ہوئے کس حد تک کامیاب رہتے ہیں۔

بھارتی ریاست مہاراشٹر کے قصبے ناگ پور میں جمعہ کو منعقدہ ایک تقریب میں 'گنیز ورلڈ ریکارڈز' کے لندن سے خصوصی طور پر بھارت آنے والے نمائندوں نے  جیوتی امگی کے قد کی پیمائش کی جو عالمی ادارے کے مطابق صرف 8ء62 سینٹی میڑ یعنی 7ء24 انچ ہے۔

جیوتی کا قد امریکہ کی 22 سالہ بریجٹ جارڈن سے لگ بھگ 7 سینٹی میٹر چھوٹا ہے جو رواں برس ستمبر تک  دنیا کی سب سے پست قامت خاتون ہونے کے اعزاز کی حامل تھیں۔

'گنیز' کے مطابق جیوتی امگی کا قد دو برس کے بچے کے اوسط قد سے بھی چھوٹا ہے۔

'گنیز' کی جانب سے قد کی پیمائش کے بعد انہیں دنیا کی پست قامت ترین خاتون تسلیم کیے جانے پر امگی نے پرنم آنکھوں  سے صحافیوں کو بتایا کہ انہیں اپنے چھوٹے قد پر فخر ہے کیوں کہ اس کے باعث انہیں ایک منفرد شناخت ملی ہے۔

یاد رہے کہ جمعہ کو ہونے والی یہ تقریب امگی کی 18ویں سال گرہ کے موقع پر منعقد کی گئی تھی اور 'گنیز' کی جانب سے ان کا نام دنیا کی سب سے پستہ قامت خاتون کے طور پر درج کرنے کے اعلان کو امگی نے اپنے لیے "سال گرہ کا خصوصی تحفہ" قرار دیا۔

ساڑھی میں ملبوس امگی نے اس موقع پر اپنے مہمانوں کے ہمراہ سال گرہ کا کیک بھی کاٹا۔

ہائی اسکول کی طالبہ امگی کا کہنا تھا  کہ وہ یونی ورسٹی میں جا کر تعلیم حاصل کرنا چاہتی ہیں اور ان کا خواب بالی ووڈ کی فلموں میں کام کرنا ہے۔

یہ امگی کا پہلا عالمی ریکارڈ نہیں ہے بلکہ جمعہ کو 18 برس کی ہونے سے قبل تک وہ دنیا کی  پست قامت ترین 'ٹین ایجر' ہونے کا اعزاز رکھتی تھیں۔ تاہم جمعہ کو ان کی 18ویں سال گرہ کے موقع پر انہیں لڑکی سے خاتون کی  'کیٹگری' میں منتقل کردیا گیا۔

'گنیز ورلڈ ریکارڈز' کی جانب سے جاری کیے گئے ایک بیان میں کہا گیا ہے کہ پچھلے دو برسوں کے دوران امگی کے قد میں صرف  ایک سینٹی میٹر کا اضافہ ہوا ہے اور بعض طبی وجوہات کے سبب ان کا قد مزیدبڑھنے کا امکان نہیں۔

مثال کے طور پر امیتابھ بچن کی اداکاری سے گندھی فلم” بڈھا ہوگا تیرا باپ“ کرن راوٴ کی ”دھوبی گھاٹ “ اور پنکج کپور کی فلم ”موسم“ ۔ یہ نووارد ڈائریکٹرز کی پہلی پہلی فلمیں تھیں اور شاید ان کے ناتجربہ کاری کے سبب ہی یہ فلمیں ناکام ہوگئیں مگر کچھ فلموں نے واقعی شاندار کامیابی حاصل کی ۔ یہ فلمیں کون سی تھیں اور ان کے ڈائریکٹرز کون تھے آیئے ذیل میں تفصیل سے اس پر روشنی ڈالی جائے۔

کرن راوٴ : دھوبی گھاٹ

کرن راوٴ عامر خان کی اہلیہ ہیں اور شاید یہی ایک وجہ تھی جس کے سبب ان کی پہلی فلم ” دھوبی گھاٹ“ نے ریلیز سے پہلے ہی لوگوں کی توجہ حاصل کرلی لیکن بدقسمتی سے فلم ”ٹائیں ٹائیں فش“ ثابت ہوئی۔ فلم کی ناکامی کے ساتھ ہی کرن راوٴ بھی مطمئن ہوکر بیٹھ گئیں۔ اگرچہ فلم کی پروموشن پر بہت پیسہ اور وقت خرچ کیا گیا مگر فلم بینوں کو کرن راوٴ کی ڈائریکشن اچھی نہیں لگی۔

ریمو ڈی سوزا : فالتو

بنیادی طور پر ریموڈی سوزا کوریوگرافر ہیں لیکن فلم ”فالتو“ سے انہوں نے ڈائریکشن کے شعبے میں بھی خود کو منوانے کی کوشش کی اور وہ اس کوشش میں کامیاب بھی رہے۔ ”فالتو“ کی کہانی کا پلاٹ اگرچہ بوسیدہ تھا لیکن فلم میں ایک ساتھ کئی نئے چہروں کو متعارف کرانے کا رسک کامیابی کی صورت میں نکلا۔ اس فلم کی کامیابی فلمی نقادوں کے لئے ”سرپرائز“ تھی۔ ریمو نے بہت اچھی ڈائریکشن دی۔ کوریوگرافی بھی شاندار رہی جبکہ میوزک بھی قابل ذکرتھا۔
ابھینے ڈیو :گیم او ر دہلی بیلی

ابھینے ڈیونے اس سال دو فلمیں دیں۔ ”گیم “اور” دہلی بیلی“۔” گیم “کوششوں کے باوجود باکس آفس پر اپنے لئے کوئی جگہ نہ بناسکی جبکہ دہلی بیلی نے کامیابی کی ایک نئی تاریخ رقم کی۔
امول گپتے : اسٹینلے کا ڈبہ

امول گپتے کی فلم ” اسٹینلے کا ڈبہ“ ان کی پہلی کاوش تھی ۔ فلم کو بھارت اور بیرون بھارت کئی ایوارڈ ملے ۔ اس فلم نے ثابت کیا کہ بالی ووڈ میں بچوں کیلئے بنائی جانے والی فلم بھی کس قدر کامیاب ثابت ہوسکتی ہے۔

صدیقی : باڈی گارڈ

صدیقی نے سلمان خان کے ساتھ فلم ” باڈی گارڈ “ ڈائریکٹ کی اور راتوں رات شہرت کی بلندیوں پر پہنچ گئے۔ فلم نے جس قدر کامیابی حاصل کی اور ریونیو جنریٹ کیا اسے بیان کرنے کے لئے یہاں جگہ تنگ پڑ جائے گی۔

پون کرپلانی : راگنی ایم ایم ایس

سال 2011ء میں ڈائریکٹر پون کرپلانی کی پہلی فلم ” راگنی ایم ایم ایس“ریلیز ہوئی۔ فلم اور پون کرپلانی دونوں کو ایکتا کپور کا آشرواد حاصل تھا لہذافلم باکس آفس پر آسانی کے ساتھ اپنے لئے جگہ بنانے میں کامیاب ہوگئی۔

لوورنجن : پیار کا پنچ نامہ

ڈائریکٹر لوورنجن نے بھی سال 2011ء میں ہی اپنی پہلی فلم ”پیار کا پنچ نامہ“بناکر ڈائریکشن کے شعبے میں طبع آزمائی کی ۔ فلم نے اپنے اوپر خرچ ہونے والی رقم نکال لی۔
وکاس بہل اور نتیش تیواری : چلر پارٹی

وکاس بہل اور نتیش تیواری سال 2011ء میں بچوں کے لئے فلم ” چلر پارٹی“ لے کر میدان میں آئے ۔ اس فلم کے لئے سلمان خان نے بھی خاصی محنت کی ۔ دونوں ڈائریکٹرز اپنے شعبے میں نام بنانے میں کامیاب رہے۔

روہت دھون :

ڈیوڈ دھون کے بیٹے روہت دھون اپنی پہلی فلم ”دیسی بوائز“ لے کر حاضر ہوئے ۔ فلم نے اوسطاً بزنس کیا لیکن روہت ڈائریکشن کے فن میں کامیاب رہے۔
بیجوائے نمبی یار : شیطان

انہوں نے فلم ”شیطان “ڈائریکٹ کی۔ فلم کا تصور اچھا تھا۔ موسیقی بھی دلکش ثابت ہوئی لیکن فلم عوام کو متاثر نہ کرسکی ۔

روشن عباس : آلویز کبھی کبھی

روشن عباس نے اپنی پہلی فلم ” آلویز کبھی کبھی “ کے نام سے متعارف کرائی ۔ انہیں شاہ رخ خان کی مکمل حمایت بھی حاصل رہی لیکن فلم بری طرح ناکامی سے دوچار ہوئی۔

مذکورہ بالا ڈائریکٹرز کے علاوہ پروین دباس فلم ” صحیح دھندے، غلط بندے“، راگھو دھر فلم ” مائی فریند پنٹو“ پوری جگن ناتھ فلم ” بدھا ہوگا تیرا باپ“ اور پنکچ کپور فلم ” موسم“ کے ساتھ پہلی مرتبہ ڈائریکشن کی فیلڈ میں داخل ہوئے لیکن ان کی ڈائریکٹ کی ہوئی فلمیں فلم بینوں کو اپنی جانب قطعی متوجہ نہ کرسکیں۔

ثریا سے شریا گھوشال تک کے اس سفر میں بھارت سے بلبلِ ہند لتا منگیشکر، سلکھشنا پنڈت جبکہ پاکستان سے مہناز کے نام اس لحاظ سے انتہائی منفرد نظر آتے ہیں کہ ان گلوکاراؤں نے اب تک شادی نہیں کی ۔

 یہ بات بھی دلچسپی سے خالی نہیں کہ شادی شدہ گلوکاراؤں کی آوازوں میں وقت کے ساتھ اس قدر تبدیلیاں رونما ہوئی ہیں کہ ان کی آج کی آواز اپنی ہی ابتدائی آواز سے قطعی طور پر مختلف ہو گئی ہے لیکن ثریا کی آواز ان کے آخری گیتوں تک اپنی بھرپور شناخت رکھتی تھی۔ اسی طرح فلم” محل“ میں گایا ہوا لتا منگیشکر کا پہلا فلمی گیت ”آئے گا، آئے گا“ ہو یا ان کی گائیکی کے آخری دور میں فلم ”دل تو پاگل ہے‘ ‘کا ٹائیٹل گیت ، لتا منگیشکر کی آواز کہیں بھی اپنے سامع پر اثرانداز ہوئے بغیر نہیں گزری۔

 گیت ”دل تو پاگل ہے، دل دیوانہ ہے“ کی خاص بات یہ ہے کہ جہاں اس گیت کو گانے والی لتا منگیشکر اپنی ستر کی دہائی میں ہوتے ہوئے بھی کنواری ہیں ۔۔۔ آئیے نظر ڈالتے ہیں پاکستان اور بھارت کی چند غیر شادی شدہ گلوکاراؤں کی زندگیوں پر:

ثریا
غیر شادی شدہ گلوکاراؤں میں ثریا کا نام سر فہرست ہے۔ ان کا پورا نام ثریا جمال شیخ تھا لیکن وہ ثریا کے نام سے ہی مشہور تھیں۔ انہوں نے 1940 اور 1950 کی دہائیوں میں اداکارہ اور پلے بیک سنگر کے طور پربھی بڑا نام کمایا۔ ثریا کے گیت آج بھی کانوں میں رس گھولتے ہیں۔ثریانے 1948 ء سے 1951ء تک چھ فلموں میں دیو آنند کے ساتھ کام کیا۔ 1948ء میں فلم ”ودیا“ کے گیت ’کنارے کنارے چلے جائیں گے“ کی شوٹنگ کے دوران کشتی الٹ گئی لیکن دیو آنند نے اپنی جان خطرے میں ڈال کر ثریا کو بچالیا اور یہیں سے ثریا دیو آنند کو پسند کرنے لگی۔

ثریا کی محبت کا جواب دیو آنند نے بھی محبت سے دیا۔ دیو آنند نے باقاعدہ ثریا کا ہاتھ مانگا اور اس کے لیے تین ہزار روپے کی ہیرے کی انگوٹھی بھی بھیجی، لیکن ثریا کی نانی نے مذہب کی وجہ سے اس رشتے کی مخالفت کردی۔ اس رشتے سے انکار کے بعد 1951ء میں ریلیز ہونے والی فلم ’دو ستارے‘ آخری فلم تھی جس میں ان دونوں نے ایک ساتھ کام کیا ۔ ثریا کی کامیاب فلموں میں ”مرزا غالب“، ”دل لگی“ اور” انمول گھڑی“ سمیت بہت سی فلمیں شامل ہیں۔

لتا منگیشکر
لتا منگیشکر دنیا بھر میں مقبول گلوکارہ کی حیثیت رکھتی ہیں۔ انھیں سب سے زیادہ گیت ریکارڈ کرانے کا بھی اعزاز حاصل ہے۔ لتا جی نے بھی ایک طویل زندگی گزارنے کے باوجود شادی نہیں کی۔ ان کا کہنا تھا کہ ان کی پہلی اور آخری محبت موسیقی ہے اور اب یہ سمجھا جائے کہ ان کی شادی موسیقی سے ہو چکی ہے۔ ایک اور اعزاز جوانہیں حاصل ہے، وہ یہ ہے کہ انھوں نے بھارت بھر کے فلمی حلقے پر اپنی شخصیت اور مزاج سے انتہائی مثبت اثرات مرتب کیے ہیں۔ لتا جی نے کم و بیش پچاس ہزار گیت گا ئے ہیں ۔

سلکھشنا پنڈت
 سلکھشنا پنڈت بھارت کی وہ خوش قسمت ترین گلوکارہ ہیں جنہوں نے فلمی دنیا میں گلوکارہ کی حیثیت سے بچپن میں قدم رکھا اور اپنا پہلا گیت لتا منگیشکر کے ساتھ گایا۔ 1967ء میں ریلیز ہونے والی فلم ’تقدیر‘کے لیے گایا جانے والا یہ گیت ’سات سمندر پار سے‘ اس قدر مقبول ہوا کہ ایوارڈز کی لائن لگ گئی۔ سلکھشنا نے 1970ء اور 1980ء کی دہائیوں میں اداکاری کے جوہر بھی دکھائے۔

اپنے گیارہ سالہ گلوکاری کے دور میں سلکھشنا پنڈت نے بے شمار ایوارڈز حاصل کیے۔ ایک بار اپنے ایک انٹر ویومیں سلکھشنا نے کہا تھا کہ ان کے گیارہ سالہ سنگنگ کیریئر میں انتہائی کم گیتوں کا مطلب ان کی ناکامی نہیں ہے، بلکہ ایسا اس لیے ہے کہ وہ گانے کے بول، فلم میں گانے کی سچویشن، کمپوزیشن اور دیگر باتوں پر غور کر نے کے بعد اس بات کا فیصلہ کرتی ہیں کہ وہ گائیں گی یا نہیں۔

 ماضی میں معروف پاکستانی گلوکار پرویز مہدی کے ساتھ سلکھشنا پنڈت کی ایک سی ڈی بھی ریلیز ہوچکی ہے، جس نے کافی مقبولیت حاصل کی تھی۔

اس میں کوئی شک نہیں کہ’‘’ ڈان ٹو “کا انتظار صرف فلم بینوں کو ہی نہیں بلکہ خود ’ریل لائف۔۔ ڈان‘ یعنی شاہ رخ خان کو بھی ہے ۔” را۔ون“ کو خاطرخواہ کامیابی نہ ملنے کے بعد انہیں ایک ایسی فلم کی ضرورت ہے جو انہیں اداکاری کے میدان میں ایک مرتبہ پھر ’بادشاہ ‘ثابت کرسکے۔

”ڈان ٹو“ کی کامیابی کے لئے شاہ رخ خان کوئی کسر اٹھانہیں رکھ رہے ۔ اس کی زبردست تشہیر کی جارہی ہے ۔ اسے ٹو ڈی کے ساتھ ساٹھ تھری ڈی فارمیٹ میں بھی ریلیز کیا جارہا ہے ۔ انہیں ”را۔ون“ سے یہ تجربہ بھی ہوا ہے کہ لوگ ٹو ڈی کے بجائے تھری ڈی فلموں کو زیادہ پسند کررہے ہیں۔ کیا شاہ رخ خان کے یہ تجربات اگلی فلم کے حوالے سے کامیاب ثابت ہوں گے ؟؟اور کیا ”ڈان ٹو“ باکس آفس پر کامیابی کے نئے ریکارڈ بنا سکے گی؟؟ کیوں کہ سب کچھ کرگزرنے کے باوجود” را۔ون“ صرف اتنا ہی کما سکی جتنا اس پر خرچ آیا تھا۔

”ڈان ٹو“ امیتابھ بچن کی 80ء کی دھائی میں بننے والی فلم ”ڈان“ کا دوسرا سیکوئل ہے۔ اس سے قبل ”ڈان ون“ سن 2006ء میں ریلیز ہوئی تھی۔ سیکوئل کے ڈائریکٹر فرحان اختر ہیں جن کی ایک اور فلم ”زندگی نہ ملے گی دوبارہ“ رواں سال ہی ریلیز ہوئی تھی جس نے کامیابی کے ساتھ ساتھ فرحان کو ایک نئی پہچان بخشی۔ ”ڈان ٹو“ انہیں کس حد تک شہرت دلاسکے گی ، اس بات کا فیصلہ جاننے کے لئے خود فرحان اختر بھی” ڈان ٹو“ کی ریلیز کے منتظر ہیں۔

آئیے آج ایسے ہی فنکاروں پر سرسری نظر ڈالی جائے جو ایکٹر ہونے کے ساتھ ساتھ پلے بیک سنگنگ بھی کرتے رہے :

امیتابھ بچن

اداکاری کے ساتھ ساتھ گلوکاری کرنے والوں میں سب سے پہلا نام امیتابھ بچن کا آتا ہے۔ یہ وہ فنکار ہے جسے ایک زمانے میں ریڈیو آڈیشن میں یہ کہہ کر فیل کردیا گیا تھا کہ ان کی آواز میں کوئی دم نہیں۔

یہ بات شاید ان کے دل میں گھر کرگئی اور انہوں نے اپنے فن میں وہ مہارت پیدا کی کہ ناصرف ان کی مکالمہ ادائیگی دوسرے فنکاروں کے لئے ایک مثال بن گئی بلکہ انہوں نے اپنی آواز سے وہ جادو جگایا کہ لوگ ان سے اداکاری کے ساتھ ساتھ گلوکاری بھی کرانے لگے۔

امیتابھ نے ایک دو نہیں پوری ستائس فلموں کے گانے اپنی آواز میں ریکارڈ کرائے۔ 1979ء میں دو فلموں یعنی ”دی گریٹ گیمبلر“ اور ” مسٹر نٹور لال“ میں امیتابھ نے جب اپنی بھاری آواز میں گیت گائے تو شائقین فلم نے ان کی اداکاری کی طرح ان کی صداکاری کو بھی بہت سراہا۔ ” گریٹ گیمبلر“ کی موسیقی راہول دیو برمن، جبکہ ”مسٹر نٹور لال“ کی موسیقی راجیش روشن نے ترتیب دی تھی۔

فلم ” مسٹر نٹور لال“ کے گیت ”میرے پاس آؤ میرے دوستو ایک قصہ سنو‘ ‘ نے تو امیتابھ کے لیے گیتوں کی لائن لگا دی۔ فلم ”لاوارث“ میں ان کے گیت ”میرے انگنے میں تمھارا کیا کام ہے“ نے کامیابی کے نئے ریکارڈ قائم کیے۔ آج بھی یہ گیت ہر جگہ سنا اور گایا جاتا ہے۔

مذکورہ فلموں کے علاوہ جن فلموں میں امیتابھ بچن نے اپنی آواز کا جادو جگایا ان میں ”سلسلہ،“ ”مہان“، ”پکار“، ”شرابی“، ”طوفان“، ”جادوگر“، ”خدا گواہ“، ”میجر صاحب“، ”سوریا ونشی“، ”عکس“، ”کبھی خوشی کبھی غم“، ”امان“ وغیرہ شامل ہیں۔

عامر خان

فلم ”ہم ہیں راہی پیار کے“ کا گیت ”چکنی صورت تو کہاں تھا اب تلک یہ بتا“ کس نے نہیں سنا ہوگا، اس گیت میں نظر آنے والا من موہنا معصوم سا لڑکا بالی ووڈ کا وہ ہیرو ہے جس نے بھارتی فلمی صنعت کو نہ صرف بطور اداکار کامیاب فلمیں دیں بلکہ بطور ہدایتکار اور گلوکار بھی اپنا لوہا منوایا ہے۔ ۔۔جی ہاں بات ہورہی ہے مسٹر پرفیکٹ یعنی عامر خان کی۔

بے شمار فلموں میں کام کرنے کے بعد اچانک 1998 میں ریلیز ہونے والی فلم’ ’غلام“ میں بطور گلوگار عامر خان نے جب ”آتی کیا کھنڈالا‘ ‘گایا تو نوجوانوں کی زبانوں پر یہ گیت ایسا رچ بس گیا کہ اس گیت نے نوجوانوں کی عام بول چال کے حصے کی شکل اختیار کرلی۔

اس گیت کے بعد عامر نے اور بھی بہت سے گیت گائے۔ فلم ”فنا “میں عامر نے کاجول، سونونگم اور سنیدھی چوہان کے ساتھ گیت ”میرے ہاتھ میں‘ گا کر شائقین کے دل جیت لیے تھے۔ ان گیتوں کے بعد عامر کے گیت مقبولیت کی سند حاصل کرنے لگے اور انھوں نے بہت سی فلموں میں نہ صرف سولو گیت گائے بلکہ بالی ووڈ کی نامور گلوکاراؤں کے ساتھ دوگانوں کے علاوہ بہت سے کورس گیت بھی گائے۔

عامر نے جن گیتوں میں گلوکاری کی ان میں فلم ”تارے زمین پر“، ”میلہ“ خاص طور پر قابل ذکر ہیں۔ عامر نے کئی البمز کے لیے بھی گیت گائے ۔ انہوں نے شان، ہری ہرن، ادیت نارائن، الکا یاگنک، سونو نگم ، سنیدھی چوہان اور بالی ووڈ کے صف اول کے کئی گلوکاروں کے ساتھ گیت گائے ہیں جو خاص و عام میں آج بھی مقبول ہیں۔

 نانا پاٹیکر

نانا پاٹیکر کا شمار بھارت کے مقبول ترین اداکاروں میں ہوتاہے۔ ان کے بارے میں کہا جاتا ہے کہ ان کا مقابلہ اطالوی نژاد امریکی اداکار الپا چینو ہی سے کیا جا سکتا ہے جس نے ہالی ووڈ میں اپنی منفرد اداکاری سے زبانوں کی سرحدیں عبور کر کے بین الاقوامی شہرت حاصل کرلی تھی۔

 نانا پاٹیکر بھی ایک ایسے ہی ورسٹائل فنکار ہیں، جنھیں جذباتی اداکاری میں ملکہ حاصل ہے۔ نانا نے جہاں فلم بینوں کو اپنی اداکاری سے اپنا فین بنایا ہے، وہیں اپنی آواز اور موسیقی کے آلات کے ملاپ سے ایک ایسا گیت عوام کو دیا جسے عوامی ہی کہا جا سکتا ہے۔ ”ایک مچھر“ جیسا گیت گا کر نانا نے اداکاری کے بعد سرتال کی دنیا میں بھی اپنے قدم انتہائی مضبوط کرلیے ہیں۔

اس کے بعد ایک اور گیت ”جو ہوتا اس کو ہونے دے، جو روتا اس کو رونے دے“ نے بھی خاصی مقبولیت حاصل کی۔ میوزک ڈائریکٹر سنجیو کا کہنا ہے کہ انھوں نے یہ گیت نانا پاٹیکر کی شخصیت اور ان کی آواز کو سامنے رکھ کر تیار کیا تھا اور اس کی دھن خاص طور پر انھی کے لیے کمپوز کرائی تھی۔ نانا پاٹیکر اگرچہ گلوکاری کے میدان میں وہ رنگ نہیں جما پائے جو امیتابھ بچن نے جمایا تھا تاہم اپنے عوامی رنگ کی وجہ سے نانا مقبولیت کی بلندیوں پر ہیں۔

رنبیر کپور

بالی ووڈ اداکا رنبیر کپور نے اپنی اداکاری سے تو فلم بینوں کو اپنا دیوانہ بنایا ہی تھا مگر ایسا لگتا ہے کہ وہ بالی ووڈ میں باقاعدہ گلوگار بننے کے لیے پر تول رہے ہیں۔ اپنی فلم ”راک اسٹار“ کی نمائش سے قبل فلم کی پروموشن کیلئے رنبیر کپور نے ممبئی میں کنسرٹ کر ڈالا۔ اس کنسرٹ میں رنبیر کے ساتھ فلم کے ڈائریکٹر امتیاز علی اور موسیقار اے آر رحمن بھی شریک ہوئے۔ کنسرٹ میں گلوکاروں نے فلم ” راک اسٹار“ کے گانے گائے۔

بیان میں کہا گیا ہے کہ ”ہم بیٹے کو پاکر بہت خوش ہیں ۔ اس بچے کی پیدائش ہمارے لئے بہت معنی رکھتی ہے۔ ایک اس اعتبار سے کہ اس خوشی کا ہمیں بہت انتظار کرنا پڑا اور دوسرا اس لحاظ سے کہ بہت مشکلوں کے بعد ہمیں یہ راحت ملی ہے۔ دراصل طبی پیچیدگیوں کے سبب نارمل طریقے سے ہمارے یہاں اولاد نہیں ہوسکتی تھی اس لئے ہمیں ”آئی وی ایف۔ سروگیسی “طریقہ اختیار کرنا پڑا۔ ہمیں خوشی ہے کہ سب کچھ اچھی طرح سے ہوگیا“

بیان میں مزید کہا گیا ہے کہ ” ہم اس دنیا کے خالق کی عظمت کے شکرگزار ہیں، ساتھ ہی سائنسی ایجادات کے کمالات اور اپنے دوستوں و رشتے داروں کے بھی شکر گزار ہیں جنہوں نے ہمیں اپنی دعاوٴں میں ہر پل یاد رکھا“

یہ عامر خان کی دوسری جبکہ کرن راوٴ کی پہلی شادی ہے۔ عامر کی پہلی بیوی کا نام رینہ دت تھا جن سے عامر خان کے دو بچے یعنی ایک بیٹا اور ایک بیٹی ہیں۔ دونوں نے 15سال تک ایک ساتھ رہنے کے باوجود علیحدگی اختیار کرلی۔

عامر اور کرن کی ملاقات سن 2001ء میں فلم ”لگان “کے سیٹ پر ہوئی تھی ۔ کرن راوٴ اس فلم کی اسسٹنٹ ڈائریکٹرتھیں ۔ تین سال بعد دونوں نے شادی کرلی ۔ کرن راوٴ اس سے پہلے 2009ء بھی ماں بننے والی تھیں لیکن طبی پیچیدگی کے سبب ان کا یہ خواب پائے تکمیل کو نہ پہنچ سکا۔

عامر کے پہلے بیٹے کا نام جنید جبکہ لڑکی کا نام ارا ہے۔ عامر نے رینہ کو سنہ 2002ء میں طلاق دی تھی جبکہ کرن سے انہوں نے 2005ء میں شادی کی تھی۔

بھا رتی میڈیا سے آنے والی اطلاعات کے مطابق اس گانے کے لئے کترینہ بہت محنت کررہی ہیں اور دن رات ریہرسل میں مصروف ہیں۔ ” اگنی پتھ “کے ڈائریکٹر کرن ملہوترا ہیں۔

”اگنی پتھ“سنہ 1990ء کی کامیاب فلم ہے جس کا ری میک بھی اسی نام سے بنایا جارہا ہے۔ پرانی ”اگنی پتھ“ میں امیتابھ ہیرو اور مادھوی ہیروئن تھیں۔ اسے یش چوپڑا نے ڈائریکٹ کیا تھا۔

کترینا کا کہنا ہے کہ ”نیا گانا ان کے پچھلے ہٹ آئٹم سانگ ” شیلا کی جوانی“ سے بالکل مختلف ہے ۔ کرن جوہر میرے دوست ہیں جب انہوں نے مجھے تفصیلات بتائیں تو مجھ سے رہا نہیں گیا اور میں نے فوراً ہی گیت پکچرائز کرانے پر رضامندی ظاہر کردی۔ آئٹم سانگ کے ڈانس ڈائریکٹر گنیش آچاریہ ہیں ۔ اس گیت کو میں نے چیلنج کے طور پرقبول کیا ہے“

کترینہ کا یہ بھی کہنا ہے کہ انہیں گانے کے تھیم پر پرفیکٹ انداز میں اتر نے کے لئے پورے تین کلو وزن کم کرنا پڑا۔ فلم کے ہیروٴ رہتک روشن کا کہنا ہے کہ کترینہ نے گانے پر شاندار پرفارمنس دی ہے۔ فلم کے ساتھی فنکار سنجے دت نے بھی کترینہ اور اس گانے ”چکنی چنبیلی“ کی بھرپور انداز میں تعریف کی ہے۔

بھارت کے موخر اخبارات کے مطابق آئٹم سانگ ”چکنی چنبیلی“ مراٹھی ہٹس کا ہندی ری مکس ہے ۔ کترینہ نے اس گانے کے لئے بھارت کے لوک رقص ”لاوڑی“کی باقاعدہ تربیت لی ہے ۔ یہ لوک رقص بھارت کے بہت سے گانوں کے لئے استعمال میں لایا جاتا رہا ہے ۔ ماضی کی ہیروئن بندو، مادھوری دکشت ، شلپا شیٹھی اور نمرتا شروڈکر وغیرہ اس ڈانس پر ہٹ سانگ دے چکی ہیں۔

ٹائمز آف انڈیا ‘نے خبر دی ہے کہ فلم ”انگلش ونگلش “ کو ساوٴتھ انڈین فلم میکر آر بالاکرشنن کی اہلیہ گوری شندے ڈائریکٹ کررہی ہیں۔

امیتابھ اس سے قبل بالاکرشنن کے ساتھ فلم ”چینی کم “ اور ”پا“ میں کام کرچکے ہیں ۔  ان کا کہنا ہے کہ وہ گوری کے ساتھ کام کرکے خوشی محسوس کریں گے ۔  امیتابھ کا یہ بھی کہنا ہے کہ وہ بالاکرشنن کے ساتھ دوبارہ کام کرنے کے خواہشمند ہیں ۔  ان کا کہنا ہے کہ وہ بالاکرشنن کی جانب سے کسی نئی فلم کی اسکرپٹ کے منتظر ہیں۔

امتیابھ نے ”انگلش ونگلش“ کے حوالے سے سوشل نیٹ ورکنگ ویب سائٹ ٹوئیٹر پر پیغام دیا ہے کہ بالاکرشنن کے ساتھ کام کرنا ان کے لئے خوشی کا باعث ہوگا ۔  انہوں نے بالاکرشنن کو مخاطب کرتے ہوئے کہا کہ میرے لئے جلد اسکرپٹ تیارکریں ۔

”انگلش ونگلش“ متوسط طبقے سے تعلق رکھنے والی ایک عام گھریلو بھارتی عورت کی کہانی ہے جس کی کمزور انگلش کا سب مذاق اڑاتے ہیں ۔ بلاخر اس کی قسمت بدلتی ہے اور اسے انگریزی سیکھنے کے لئے امریکہ جانے کا موقع مل جاتا ہے۔

سری دیوی اور امیتابھ بچن نے 1992ء میں فلم ”خداگواہ“ میں ایک ساتھ کام کیا تھا ۔  سری دیوی جن کی مشہور فلموں میں ”چاندنی،  ”مسٹر انڈیا “ اور  ”صدمہ “ سرفہرست ہیں ، وہ 14 سال کی طویل مدت کے بعد اس فلم کے ذریعے ایک مرتبہ پھر اسکرین پر نظر آئیں گی۔

ٹائمز آف انڈیا نے خبر دی ہے کہ کچھ دنوں پہلے ان کی نئی فلم ”بول بچن“ کے حقوق خریدنے کے لئے ایک کمپنی سے ڈیل ہورہی تھی جس نے تمام کوششوں کے باوجود دنیا بھر میں فلم کی نمائش کے حقوق خریدنے کے لئے 53 کروڑ روپے کی قیمت لگائی تھی ۔

اجے کی کوشش تھی کہ انہیں زیادہ رقم ملے لیکن کمپنی اپنی شرائط پر اڑی ہوئی تھی لہذا ڈیل سے پہلے ہی معاملہ ادھورا رہ گیا۔

اجے ڈیل کی ناکامی پرکچھ مایوس اورکچھ اداس ہوگئے تھے لیکن ان کی قسمت نے یاوری کی ۔۔اور ہوا یوں کہ اسٹار اسٹودیوز نے انہیں ”بول بچن“ کے رائٹس خریدنے کے لئے 94 کروڑ روپے کی آفر کردی جسے اجے نے فوراً ہی قبول کرلیا کیوں کہ انہیں پہلی ڈیل کے مقابلے میں 41 کروڑ روپے کا فائدہ ہورہا ہے ۔

94 کروڑ روپے کی یہ رقم ا س حوالے سے اہم ہے کہ ابھی تک اجے کی کسی بھی فلم کی اتنی بھاری قیمت نہیں لگی۔ اجے دیوگن اورروہت شیٹھی کا پہلے سے ہی اس فلم کو ایک ساتھ کرنے کا معاہدہ موجود ہے۔

فلم ”بول بچن“ کے یونٹ ترجمان نے اس خبر کی تصدیق کی ہے۔ فلم میں اجے کے ساتھ ابھیشیک بچن بھی ہیں ۔

 جیسی ہٹ فلمیں دینے والی کرینہ کپور کویہ ریس جیتنے کے لئے خاصی مشقت کرنا پڑی

 کیوں کہ وہ صرف ایک فیصد ووٹ لیکر دوسری اداکاراوٴں سے ممتاز قرارپائیں۔

کرینہ کپورکے بعد دوسرے نمبر پر آئیں کترینا کیف۔ دلچسپ بات یہ ہے کہ کترینا کیف مسلسل تین سالوں تک یہ اعزاز بہت واضح فرق سے حاصل کرتی رہی ہیں۔اس فہرست میں پریانکا چوپڑا تیسرے اور بپاشا باسو چوتھے نمبرپر رہیں جبکہ دپیکا پڈکون ساتویں نمبر پر رہیں۔

امیتاز علی پہلے ہی اپنی پچھلی تین فلموں ”سوچا نہ تھا“، ”جب وی میٹ“ اور” لو آج کل“ میں اپنی صلاحیت اور اسکرپٹ پر پوری گرفت رکھنے والے ڈائریکٹر کی حیثیت سے بہت اچھی شناخت بناچکے ہیں۔ ان فلموں کا موضوع اور ٹریٹمنٹ بھلے ہی الگ ہو لیکن ان فلموں میں امتیاز نے محبت کے الگ الگ فلیور زکو پیش کرکے خود کو دوسروں سے منفرد ثابت کیا ہے۔

امتیاز علی کے بارے میں مشہور ہے کہ وہ کہانی کے کرداروں کے عین مطابق کاسٹ چنتے ہیں ۔”راک اسٹار “ میں بھی انہوں نے اسی اصول کو آگے بڑھایا ہے۔ ابتدا میں فلم کے پروڈیوسرسنیل ہیروئن کے کردار کے لئے کرینہ کپور کو ڈراپ کرکے دپیکا پڈکون کو لینا چاہتے تھے لیکن امیتاز علی نئی اداکارہ نرگس فخری کو لینے پر بضد رہے۔

فلم ریلیز ہونے کے بعد امیتاز کی اس چوائس پر سب کے فیصلے غلط ثابت ہوئے ۔ نرگس نے اپنی بھولی صورت اور شرارتی آنکھوں کے سہارے کشمیری لڑکی ہیر کے کردار کو نہایت جاذب نظر بنادیا ۔

فلم کی شوٹنگ بھارتی دارالحکومت نئی دہلی، ریاست ہماچل پردیش ، کشمیر اور چیکوسلواکیہ میں کی گئی ہے ۔ یہی نکتہ اس فلم کا سب سے خوبصورت پہلو بن گیا ہے۔ امیتاز نے کہانی کی ڈیمانڈ پر سینکڑوں کی بھیڑ کے درمیان رنبیر کپور کے کئے سین شوٹ کئے ۔ یہی سین” راک اسٹار“ کو ایسی فلم بناتے ہیں جو ینگسٹرز اور کچھ نیا دیکھنے والوں کی کسوٹی پر سوفیصدی کھرا اترتے ہیں۔

فلم کی کہانی کالج میں زیر تعلیم ایک نوجوان جناردن جاکھڑ(رنبیر کپور) کے گرد گھومتی ہے جس کا بچپن سے یہ خواب ہے کہ ایک دن وہ راک میوز ک کا شہنشاہ کہلائے۔ مڈل کلاس اورلمبی چوڑی فیملی میں رہنے والے سب سے چھوٹے جناردن کا یہی جنون اسے دوسروں سے ممتاز کردیتا ہے۔ بھولی صورت اور اپنے سادہ سے پہناوے کی وجہ سے اس کے دوست اکثر اس کے میوز ک کا مذاق اڑاتے ہیں ۔

جناردن کالج اور دوستوں میں جے جے اور جارڈن کے نام سے مشہور ہے ۔ ہر وقت گیٹار ہاتھوں میں لئے جے جے کو جہاں بھی موقع ملتا ہے وہیں اپنے میوزک سے دوسروں کا دل جیتنے کی کوشش کرتا ہے۔

اسی دوران کالج کی سب سے خوبصورت لڑکی ہیر (نرگس فخری) سے اس کی ملاقات ہوجاتی ہے ۔ شروع میں دونوں میں ایک دوسرے میں نونک جھونک ہوتی ہے مگر پھر ہیر اسے چاہنے لگتی ہے لیکن دو ماہ بعد ہی اس کی شادی کرکے چیکوسلواکیہ بھیج دیا جاتا ہے۔ بس یہیں سے کہانی ایک نیا موڑ لیتی ہے۔

رنبیر کپور اپنے کردار میں خوب جچے ہیں ۔ شاید یہ ان کی اب تک کی سب سے خوب صورت اداکاری والی فلم ہے ۔ سیدھے سادے جناردن سے لاکھوں افراد کے پسندیدہ” راک اسٹار“ بننے تک کے رول میں رنبیر نے بہت محنت کی ہے ۔ نرگس انٹرول کے بعد اوور ایکٹنگ کا شکار نظر آتی ہیں۔ فلم کے کئی مناظر میں تو وہ محض شوپیس بنی نظر آتی ہیں۔

اے آر رحمن کی موسیقی اسکرپٹ اور فلم کے ماحول پر سو فیصدی فٹ بیٹھتی ہے۔ راک میوزک کے دیوانے ینگسٹرز کو رحمن کا میوزک اور موہت چوہان کی آواز جھومنے پر مجبور کردیتے ہیں ۔ فلم کے دو گانے ”ساڈا حق“ اور” ڈنگ ڈنگ“ پہلے ہی میوزک چارٹ پر سرفہرست ہیں۔

دوسری جانب سلمان خان نے فلم ” دبنگ “ ایک گانا بہت دبنگ انداز میں گایا ہے ”تیرے مست مست دو نین، میرے دل کا لے گئے چین ۔۔۔“سلمان خان 45 سال کے پیٹے میں ہیں ، کیا واقعی اس عمر میں بھی کسی کے مست مست نین ، دل کا چین اڑا سکتے ہیں!!۔۔حقیقت میں کچھ ہویا نہ ہو بالی ووڈ فلموں میں تو یہ لازمی سا ہے۔

کسی بھی فلمی ہیرو کا خیال آتے ہی ذہن میں اس کی عمر کاعمومی تاثر 25یا 26 سال سے زیادہ کا نہیں ابھرتا لیکن حقیقت یہ ہے کہ اس وقت بالی ووڈ کے جتنے بھی ہیروہیں وہ ’فوٹی پلس ‘ہیں یعنی ان کی عمر 40 اور50سال کے درمیان ہے ۔بے شک ان کی بدولت فلموں نے کروڑوں اور اربوں کا بزنس کیا ہو لیکن حقیقت یہ ہے کہ آج کے کامیاب ترین فلمی ہیروز کی عمر ڈھل گئی ہے اوروہ ’بوڑھے‘ ہونے لگے ہیں۔

اس فہرست میں ’خان ہیروز‘کا نمبر سب سے پہلے آتا ہے جو 1990ء کے عشرے میں آئے لیکن آج 20 سال کا وقفہ گزرجانے کے باوجود انہیں نہ صرف بطور ہیروز کاسٹ کیا جارہا ہے بلکہ ان کی فلمیں آج بھی سب سے زیادہ بزنس کررہی ہیں۔ ان کی معاوضہ بھی اصل نوجوان ہیروز سے کہیں زیادہ ہے جبکہ میڈیا بھی آج تک انہی کو سب سے زیادہ کوریج دیتا ہے ۔

سلمان خان 45سال کے ہوگئے لیکن ” وانٹیڈ“، ” دبنگ “، ”ریڈی“اور ”باڈی گارڈ“کی زبردست کامیابی نے ثابت کیا کہ آج بھی انہی کی مارکیٹ سب سے’ ہائی‘ ہے حالانکہ ان کے بال گرنے لگے ہیں اور وہ حال ہی میں امریکا سے سرجری کراکر واپس آئے ہیں ۔

یہی کچھ شاہ رخ خان کے ساتھ ہے۔ انہیں کمر کی تکلیف ہے لیکن پچھلے مہینے ہی میں ان کی کروڑوں روپے کی لاگت سے بنی فلم” را۔ون“ ریلیز ہوئی ہے جس میں وہ بطور سپر ہیرو نظر آئے ہیں ۔ فرحان اختر کی فلم ”ڈان ٹو “بھی عنقریب ریلیز ہونے والی ہے اور اس کے ہیرو بھی شاہ رخ خان ہی ہیں حالانکہ ڈھلتی ہوئی عمر کے آثار اب شاہ رخ کے چہرے پر نمایاں ہونے لگے ہیں۔

ان دونوں سے ذرا نظر ہٹاکر عامر خان اور سیف علی خان کی طرف دیکھیں تو یہ بھی 40 کو کراس کرچکے ہیں۔ اجے دیوگن ”سنگھم “ میں کسی نو عمر لڑکے کی طرح ہیروئن کی ساتھ گانے گاتے نظر آتے ہیں حالانکہ وہ شادی شدہ اور بچے والے ہیں اور عمر کی کم و بیش اتنی ہی بہاریں دیکھ چکے ہیں جتنی عامر خان یا سیف علی خان نے دیکھی ہیں۔

بالی ووڈ کے ہی دو ہیروز ایسے بھی ہیں جوعمر کی پچاس سے زیادہ بہاریں دیکھ چکے ہیں۔ 51 سالہ انیل کپور اور سنجے دت۔لیکن بڑی عمر کے باوجود آج بھی ان دونوں کو ہیروز کے روپ میں دیکھنے والوں کی تعداد لاکھوں میں ہے ۔ ”ڈبل ڈھمال“ اور” چتور سنگھ ٹو اسٹار“ سنجے دت کی حالیہ فلمیں ہیں جبکہ انیل کپور ہالی ووڈ فلموں کے بعد اب بالی ووڈ فلموں کارخ کررہے ہیں۔ ان کا فلموں میں ہیروز کے طور پر کام کرنے کا شوق ابھی بھی ماندھ نہیں پڑا ہے۔

اب ذکر کچھ بوڑھی ہوتی ہیروئنز کا۔ مادھوری ڈکشٹ 44اور سری دیوی 48سال کے پیٹے میں ہیں۔ یہ دونوں ناصرف فلموں میں واپسی کا ارادہ کرچکی ہیں بلکہ نئی فلمیں بھی سائن کرچکی ہیں۔ یہ وہ اداکارائیں ہیں جوکئی کئی سال پہلے شادی کرکے اپنی اپنی دنیا میں مگن ہوگئی تھیں اور فلموں سے کنارہ کش ہوگئی تھیں لیکن اب ایک بار پھر ان کی واپسی ہورہی ہے۔

ان دونوں ہیروئز نے 1980ءاور 1990ءکے عشرے میں فلمی دنیا میں قدم رکھا تھا۔ لطف کی بات یہ ہے کہ سری دیوی فلم ”انگلش ونگلش “میں لیڈنگ رولز کے لئے اپنا وزن تک کم کرچکی ہیں ۔

بھارتی جریدے ’انڈیا ٹو ڈے‘ کی ایک رپورٹ کے مطابق وینا ملک نے اپنی نئی فلم سے متعلق کچھ تفصیلات بتاتے ہوئے کہا کہ یہ تھری ڈی ہارر مووی ہے جس کے فلمساز ہیمنت مدھوکر ہیں جو زیادہ تر تیلگو فلمیں بنانے کے حوالے سے مشہور ہیں۔

وینا کا کہنا ہے کہ ابھی فلم کا نام شو نہیں کیا جارہا ۔ ان کا یہ بھی کہنا ہے کہ فلم کی شوٹنگ ایسی جگہ ہورہی ہیں جہاں نہ لگژری ہوٹلز ہیں اور نہ ہی ہوٹل جیسا آرام۔ دراصل یہ ایک جنگل ہے ۔ وینا کا کہنا تھا کہ ان کی یہ فلم اصل میں تھری ڈی ہوگی، دوسری تھری ڈی فلموں کی طرح نہیں کہ اس کے ٹو ڈی فارمیٹ کو تھری ڈی میں تبدیل کردیا جائے لہذا ایک ایک سین میں کئی کئی گھنٹے لگ جاتے ہیں۔ ان کا کہنا تھا کہ فلم میں ان کا کردار’ ہارر‘ ہونے کے ساتھ ساتھ’ تھرلر‘ بھی ہے۔

اطلاعات کے مطابق وینا نے فلم کے تمام اسٹنٹس خود شوٹ کرائے ہیں اور کسی ڈپلیکیٹ کا سہارا نہیں لیا۔ وینا کا کہنا ہے کہ انہیں پہلی مرتبہ اس طرح کا کام کرنے کا موقع ملا ہے لہذا انہیں بہت ہی لطف آرہا ہے۔

تھری ڈی فلم کے علاوہ وینا ان دنوں ایک ٹی وی رئیلٹی شو ”سوئمور“ میں بھی کام کررہی ہیں جبکہ اس سے قبل وہ” بگ باس “کے چوتھے سیشن میں کام کرکے خوب نام کماچکی ہیں۔

ان تصاویر نے بھارت میں ایک جانب تو خوب ہلچل مچائی ہوئی ہے تو دوسری جانب یہی تصاویر فلم کی زبردست پروموشن کاسبب بنی ہوئی ہیں۔ بھارتی میڈیا سے آنے والی خبروں کے مطابق فلمی پنڈتوں کا اندازہ ہے کہ” فلم ریلیزہوتے ہی سب کے چھکے چھڑا دے گی“۔ حالانکہ جس وقت ”ڈرٹی پکچر“ ریلیز ہوگی ، تین اور مشہور فلمیں ”راک اسٹار“، ”دیسی بائز“اور ” ڈان ٹو“ اس کے مقابلے کے لئے میدان میں ہوں گی۔ یوں یہ کہنا غلط نہ ہوگا کہ ان چاروں فلموں کا آپس میں سخت مقابلہ متوقع ہے۔

ملن لوتھریا کے ڈائریکشن میں بنی ”ڈرٹی پکچر“ کی پروڈیوسرز ایکتا کپور اور شوبھا کپور ہیں ، اس لئے بھی فلم سے زیادہ توقعات وابستہ ہیں۔ ادھر ودیابالن کے ساتھ ساتھ نصیر الدین شاہ ، تشار کپور اور عمران ہاشمی بھی فلم میں اداکاری کے جوہر دکھاتے نظر آئیں گے۔

”ڈرٹی پکچر“ کی ’قبل از ریلیز‘ شہرت کا ایک اور سبب یہ بھی ہے کہ فلم کی کہانی ساوٴتھ انڈین اداکارہ سلک اسمیتا کے ساتھ پیش آئے حقیقی واقعات کے گر د گھومتی ہے۔ سلک اسمیتا اپنے منفرد لائف اسٹائل اور لباس کے سبب اپنی زندگی میں خاصی متنازع رہیں تاہم 1996ء میں انہوں نے خود کش کرلی تھی ۔ انہوں نے یہ انتہائی قدم کیوں اٹھایا، اس بارے میں آج تک کوئی کچھ نہیں جانتا ۔ اس پر اسراریت نے انہیں اور بھی زیادہ مشہور کردیا ہے۔

”ڈرٹی پکچر “2دسمبر کور یلیز ہونے جارہی ہے۔ ودیا کے بقول اس فلم میں انہوں نے کافی محنت کی ہے۔ ان کی پہلی فلم” پری نیتا“ تھی جس میں ودیا نے سادہ مزاج والی لڑکی کا رول اداکیا تھا ۔ یہ سنجیدہ کریکٹر تھا ۔ اس کے بعد ان کی جو بھی فلم ریلیزہوئی اس میں ان کا کردار سنجیدہ ہی رہامثلا ”پا“ اور ”نوون کلڈ جیسیکا“۔۔مگر پھر” عشقیہ“ سے انہوں نے یہ ٹرینڈ بدلا۔

”عشقیہ“ ودیا کی فنی زندگی میں زبردست تبدیلی کا سبب بنی۔ اب ان کی نئی فلم ”ڈرٹی پکچر“ کے بارے میں بھی یہ اندازہ لگایا جارہا ہے کہ یہ بھی ودیا کو نئی زندگی دے کرجائے گی۔فلم ڈسٹری بیوٹرز اپنے تجربے کی بنیاد پر پیشگوئی کررہے ہیں کہ فلم کو اچھا خاصا بزنس ملے گا۔۔۔ لیکن اس کے باوجود فلم کی قسمت کا فیصلہ 2دسمبر کو ہی ہوگا۔

’بچن بے بی‘ کی پیدائش پرحیرت انگیز ضابطہ اخلاق کا اجرا
لوگوں کی اس ”موضوع “میں ابھی سے حد درجہ دلچسپی کو دیکھتے ہوئے یہ خوف پیدا ہوگیا تھا کہ جس دن بچن فیملی میں نئے فرد کا اضافہ ہوگا جانے اس روز میڈیا خاص طورپر الیکٹرانک میڈیا کہیں تمام حدود و قیود ہی نہ پھلانگ جائے۔  مجبوراًٹی وی چینلز کی تنظیم براڈ کاسٹ ایڈیٹرز ایسوسی ایشن یعنی بی ای اے کوحیرت انگیز ضابطہ اخلاق جاری کرنا پڑا۔

برطانوی خبر رساں ادارے رائٹرز کے مطابق اگرچہ اس ضابطہ اخلاق کی کوئی قانونی حیثیت نہیں ہے تاہم تنظیم کے ارکان تنظیم کے فیصلوں کا احترام کرتے ہیں لہذا اس حوالے سے باہمی رضامندی کے تحت تمام ملکی ٹی وی چینلز اس ضابطہ اخلاق پر سختی سے عمل کرنے کے پابند ہوں گے۔

دس نکات پر مشتمل ضابطہ اخلاق کے مطابق بچے کی پیدائش کی خبرکو بطور بریکنگ نیوز پیش نہیں کیا جاسکے گا نہ ہی اس پر” تجزیے“کئے جاسکیں گے۔ پیدائش سے قبل یا بعداز پیدائش ٹی وی چینل ایک دوسرے سے آگے نکلنے کی دوڑ میں اعلیٰ صحافتی اقدار کو ملحوظ خاطر رکھیں گے ۔پیدائش کی خبر اسپتال کے مصدقہ ذرائع یا بچن خاندان کے کسی قریبی فرد سے کنفرم کرنے کے بعد ہی آن آئیر کی جاسکے گی۔ اسے بطور ٹکر بھی نہیں چلایاجاسکے گا۔

ضابطہ اخلاق میں ٹی وی چینلز کو اس بات کا پابند کیا گیا ہے کہ کوئی بھی چینل اسپتال یا بگ بی کے گھر کے باہر کوئی او بی وین کھڑا نہیں کرسکے گا۔ ٹی وی چینلز صرف پریس کانفرنس میں مدعو کئے جانے کے بعد ہی خبر آن آئیر کرسکیں گے۔ ہونے والے بچے کی تصویر بھی خاندانی ذرائع سے حاصل کرنے کے بعد ہی استعمال میں لائے جاسکے گی، اسے اپنے طور پر حاصل کرنے کے لئے کسی بھی قسم کی غیر اخلاقی دوڑ نہیں لگائی جاسکتی۔

ضابطہ اخلاق میں یہ بھی کہا گیا ہے کہ بچے کی قسمت کے حوالے سے بھی کوئی پیش گوئی نہیں کی جاسکے گی ۔

اس ضابطہ اخلاق پر کس حد تک عمل ہوگا یہ تو خیر آنے والا وقت ہی بتا سکے گا تاہم اس ضابطے کو جاری کرنے کی اصل وجوہات وہی ہیں جو اوپر بیان کی گئی ہیں یعنی لوگوں کا تجسس اور اشتیاق۔ پاکستان سے شائع ہونے والا روز نامہ ”جنگ“ بھارتی میڈیا کے حوالے سے یہ خبر بھی دے چکا ہے کہ بچے کی پیدائش کے لئے بچن خاندان کی طرف سے ایک انتہائی اعلیٰ اور جدید ترین اسپتال میں ایک ڈی لکس وی آئی پی کمرہ مختص کیا گیا ہے جو 10 سے 15 نومبر تک کے لئے بک ہوا ہے ۔

اخبار کے مطابق بھارتی میڈیا رپورٹس میں تو ہونے والے بچے کی متوقع تاریخیں تک اعلان کردی گئی ہیں ۔ ان رپورٹس کے مطابق ولادت کی متوقع تاریخ 11/11/11 ہوسکتی ہے ۔  جب کہ دوسری جانب  خود امیتابھ بچن میڈیا سے درخواست کرچکے ہیں کہ وہ ولادت کے سلسلے میں قیاس آرائیوں سے گریز کرے۔

برطانوی خبر رساں ادارے رائٹرز نے وشال کی شاہ رخ خان سے دیوانگی کی حد تک محبت کے مختلف پہلووٴں کو اپنی ایک خاص رپورٹ میں بیان کیا ہے جس کے مطابق وشال پیشے کے اعتبار سے تاجر ہیں اور ان کا پسندیدہ مشغلہ فلمیں ۔۔۔اور وہ بھی خاص کر شاہ رخ خان کی فلمیں دیکھنا ہے ۔

وہ شاہ رخ خان کی ’پوجا ‘کرتے ہیں ، ان کی محبت میں وشال نے اپنا گھر صنم کدہ بنایا ہوا ہے۔ گھر کا کوئی کونہ ایسا نہیں جہاں شاہ رخ کی تصویر نہ لگی ہو۔ انہوں نے گھر کی تمام دیواروں پر انچ ،انچ کے فاصلے پر شاہ رخ خان کی تصویریں پلاسٹر کرائی ہوئی ہیں۔ دیواروں پر ٹائلز سے بڑا بڑا شاہ رخ خان کا نام لکھوایا گیا ہے۔

کمروں میں بطور انیٹرئیر شاہ رخ کے بڑے بڑے پوسٹرز، کٹ آوٴٹس اور ان کی مورتیاں بھی سجی ہوئی ہیں۔ اس کہانی کا ایک دلچسپ پہلو یہ بھی ہے کہ وشال کی جس روز شادی تھی ، اس سے ایک رات قبل وہ  1300 کلومیٹر کے فاصلے پر واقع ممبئی میں شاہ رخ خان کے گھر کے باہر ان کی ایک جھلک دیکھنے کے لئے بے تاب کھڑے تھے۔

یہ تو کچھ بھی نہیں ۔ وشال کا کہنا تو یہاں تک ہے کہ وہ اپنے پیارے فنکار کے لئے کچھ بھی کرگزرنے پر تیار ہیں۔ یہی وجہ ہے کہ وشال اپنے گھر کوشاہ رخ خان کی درگاہ کہتے ہیں۔اس گھر میں موجود تکیوں تک پر شاہ رخ خان کی تصویر والے غلاف آپ کو نظرا ٓئیں گے۔

دیوانگی کی انتہا تو یہ ہے کہ انہوں نے اپنا نام تک تبدیل کرکے ” وشارخ خان“ رکھ لیا ہے ۔ چلئے یہاں تک تو ٹھیک تھا مگر دیوانگی کے اس درجہ کو آپ کیا کہیں گے کہ وشال نے اپنے بیٹے کا نام بھی وہی رکھا ہے جو شاہ رخ خان کے بیٹے کا نام ہے یعنی آریان۔ جبکہ وشال نے اپنی بیٹی کا نام ”سمرن “اس لئے رکھا ہے کہ شاہ رخ خان کی سپر ہٹ فلم ” دل والے دلہنیا لے جائیں گے“ کی ہیروئن کاجول کا نام فلم میں ’سمرن‘ ہی تھا۔

وشال کی اس دیوانگی پر ان کے اہل خانہ کیا سوچتے ہیں، اس سوال پر وشال کا کہنا ہے کہ پہلے پہل گھروالے یہ سب دیکھ کر پریشان ہوتے تھے مگر بعد میں انہیں بھی احساس ہوگیا کہ شاہ رخ سے میرا پیار کبھی ختم نہیں ہوسکتا لہذا انہوں نے اس صورتحال سے سمجھوتا کرلیا ہے۔

وشال اپنی بیوی رچی سنگھ کو بھی لکھنو سے ممبئی لاکر شاہ رخ خان کا دیدار کراچکے ہیں۔ شاہ رخ اکثر اپنے گھر آنے والے پرستاروں سے ملتے رہتے ہیں ،وہ وشال سے ان کے گھر آنے کا وعدہ بھی کرچکے ہیں مگر ابھی تک یہ وعدہ پورا نہیں ہوا۔

گزشتہ ہفتے شاہ رخ خان کا 46 واں جنم دن تھا اور اس خوشی میں وشال نے بدھ کے روز ریلیز ہونے والی ان کی نئی فلم” را۔ون “دیکھی حالانکہ ایک ہفتے کے دوران وہ تین مرتبہ پہلے بھی یہ فلم دیکھ چکے تھے۔ وشال کا کہنا ہے کہ انہوں نے اپنے چہیتے فنکار کی سالگرہ پر کیک کاٹا، ڈانس کیا اور چوتھی بار ان کی فلم ”را۔ون “دیکھی اور خوب انجوائے کیا۔

وشال سنگھ اور ان کی بیوی رچی سنگھ کے گھر، موبائل فون اور گاڑی پر شاہ رخ خان کی تصویریں کیسی لگتی ہیں آپ بھی دیکھئے اس سلائیڈ شو میں۔

ان اداکاراؤں نےبالی ووڈ کوجس مقام پر پہنچایا وہ اپنے آپ میں ایک کارنامہ ہے۔ ان اداکاراوٴں نے پردہ سیمیں پر اپنی معصوم اداوٴں، فنِ مہارت اور خوبصورتی سے انگنت نا قابل فراموش کردار نبھائے۔ ہیما مالنی بھی انہی اداکاروں میں سے ایک ہیں ۔ ہیما نے 70ء اور 80 ء کی دہائیوں کے ہندی سنیما کو بام عروج پر پہنچایا۔

ہیما آج ساٹھ برس سے زیادہ کی ہیں لیکن اکثر لوگوں کو وہ پہلے سے زیادہ خوبصورت اور باوقار لگتی ہیں۔ ہیما بالی ووڈ کی پہلی اور شاید واحد ڈریم گرل ہیں۔ انہیں اپنی اداکارانہ صلاحیتوں اور خوب صورتی پر "پدما شری ایوارڈ" بھی مل چکا ہے۔

تعلیم یافتہ ہیما مالنی کی سب سے بڑی خوبی یہ ہے کہ انہوں نے جدوجہد کے دور سے انتہائی عروج کے دور تک کبھی جسم کی نمائش کا سہارا نہیں لیا۔ آج بھی یہ بات کی جا سکتی ہے کہ ان کی کوئی ایک بھی تصویر یا ویڈیو معیار سے گری ہوئی پیش نہیں کی جاسکتی۔ ہیمااپنے پروقار ظاہری حسن کے ساتھ ساتھ اپنی بہترین اداکاری کے بل بوتے پر آگے بڑھی ہیں۔

ہیما مالنی وجنتی مالا کے بعددوسری تامل ہیروئن تھیں جنھوں نے بالی ووڈ میں خوب ہلچل مچائی۔ ہیما مالنی اکتوبر 1948ء میں آر چکرورتی کے گھر تامل خاندان" آئینگر" میں پیدا ہوئیں۔ انہوں نے پندرہ سال کی عمر میں پہلی مرتبہ فلم میں کام کیا، لیکن وہ فلم مکمل نہ ہوسکی ۔ فلم کے ڈائریکٹر سری دھر ہیما مالنی کے دبلے پتلے جسم کو کسی کردار میں نبھانے کا کوئی فیصلہ نہ کرسکے تھے ۔ آخر میں آکر اسی سبب انہوں نے فلم درمیان میں ہی روک دی۔ جبکہ، اس واقعے کے صرف چار سال بعد ہیما نے فلم ’سپنوں کا سوداگر‘ میں لیجنڈری ہیرو راج کپور کے مقابل کام کر کے اپنے فن اور اپنے حسن کا وہ لوہا منوایا کہ دنیا عش عش کر اٹھی۔

یہ فلموں میں ہیما مالنی کا آغاز تھا جبکہ اگلی دو دہائیوں میں انہوں نے بڑے بڑے کردار ادا کر کے سب سے زیادہ پسند کی جانے والی اداکارہ کا اعزاز حاصل کرلیا۔ ہیما میں مختلف کرداروں کو نبھانے کی بے پناہ صلاحیت موجود ہے۔ یہ خوبی کم اداکاروں میں ہوتی ہے۔

ہیما ان کرداروں کو بھی آسانی سے ادا کرنے کی حامی بھر لیا کرتی تھیں جن سے 1960ء کی دہائی کی ہیروئینں انکار کردیا کرتی تھیں، مثلاً 1971ء میں بننے والی فلم "انداز" میں انہوں نے ایک جوان سال بیوہ؛ 1971 ء میں فلم "لال پتھر" میں منفی کردار ادا کیا تھا حالانکہ اس سے پہلے اس دور کی ہیروئنیں ایسے کردار ادا کرنے سے منع کردیا کردیا کرتی تھیں۔

1972ء میں انھوں نے فلم ”سیتا اور گیتا“ میں سنجیو کمار اور دھرمیندر کے مقابل ڈبل رول ادا کر کے سب کو حیران کردیا۔ اس فلم میں اپنی خوبصورت اداکاری پرانھیں پہلا فلم فیئر بیسٹ ایکٹریس ایوارڈ ملا۔ اس کے بعد سے تووہ اپنے پورے کیریئر میں نمبر ون ہی رہیں۔

پھر وہ وقت بھی آیا جب بھارت کی نہایت بڑی اوربلاک بسٹر فلم ’شعلے‘ ریلیز ہوئی۔ اس فلم نے نہ صرف اداکاروں کی زندگیوں کو بدل کر رکھ دیا بلکہ بھارتی سنیما کی بھی تاریخ بدل کر رکھ دی۔ اس فلم میں ہیما مالنی نے ایک تانگے والی ’بسنتی‘ کا کردار اس خوبصورتی سے نبھایا کہ اس کے بعد ان کے پاس ایک کے بعد ایک 28 فلموں کی لائن لگ گئی۔ ان فلموں میں ”ڈریم گرل، چرس، نیا زمانہ، راجا جانی، دی برننگ ٹرین“کے علاوہ بہت سی خوبصورت اور یادگار فلمیں شامل ہیں۔

یہ میوزیم دنیا بھر کی مشہور و معروف شخصیات کے مومی مجسموں کے حوالے سے عالمی شہرت رکھتا ہے۔ان مجسموں کی خاصیت یہ ہے کہ یہ سب کے سب پہلی نظر میں حقیقت کا گماں دیتے ہیں۔ ۔۔۔اس حد تک کہ اگر وہ شخصیت اپنے مجسمے کے برابر میں کھڑی ہوجائے تو ایک لمحے کے لئے یہ پہچاننا مشکل ہوجاتا ہے کہ اصل کون ہے اور مجسمہ کون۔

ہرسال دنیا بھر سے لاکھوں سیاح ان مجسموں کو دیکھنے آتے ہیں جبکہ سیاح ان مجسموں کے ساتھ اپنی تصویرکھنچوانے میں بھی فخر محسوس کرتے ہیں۔میوزیم میں جس شخصیت کامجسمہ نمائش کے لئے رکھا جاتا ہے وہ اسے اپنے لئے اعزاز سمجھتی ہے۔

مقامی خبر رساں ادارے رائٹرز کے مطابق بھارتی اداکارہ کرینہ کپور کا بھی مومی مجسمہ نمائش کے لئے پیش کیاگیا۔ کرینہ بھی اسے اپنے لئے ایک بیش قیمتی اعزاز سمجھتی ہیں اس لئے مجسمہ کی نقاب کشائی کے وقت ہونے والی تقریب میں انہوں نے ناصرف خود شرکت کی بلکہ ان کی والدہ ببیتا کپور بھی ان کے ساتھ لندن پہنچیں۔

اپنے مجسمے کو دیکھ کر کرینہ حیرت زدہ ہوگئیں۔ ان کا کہنا تھا کہ مجسمہ بنانے والے نے کمال کردیا۔ لگتا ہے مجسمہ ابھی بول اٹھے گا۔ مجسمے کی نمائش جنوری 2012ء تک جاری رہے گی۔

چالیس سے زائد فلموں میں ہیروئن کا کردار اداکرنے والی کرینہ کپور بالی ووڈ فلموں کا ’آئیکون‘ ہیں۔ ان کی پے در پے تین فلموں ”تھری ایڈیٹ“،”باڈی گارڈ“اور ”را۔ون“ نے باکس آفس پر سب سے زیادہ بزنس کرنے والی کامیاب فلموں کا ریکارڈ بنایا ہے۔مجسمے کی نقاب کشائی کے وقت میوزیم میں ایک ہزار سے زائد لوگ جمع تھے۔ ان میں سے بیشتر ایسے تھے جو دور دراز علاقوں سے وہاں تک پہنچے تھے۔

میوزیم میں بالی ووڈ شخصیات کے مجسموں کے لئے ایک علیحدہ کمرہ مختص کیا گیا ہے۔ میوزیم میں شاہ رخ خان،سلمان خان، رہتک روشن، امیتابھ بچن اور ایشوریہ رائے کے مجسمے موجود ہیں۔ اب کرینہ کا مجسمہ بھی ان میں شامل ہوگیا ہے۔

میوزیم کے حوالے سے کچھ دلچسپ حقائق بھی گاہے بگاہے سامنے آتے رہتے ہیں مثلاً رائٹر کی ایک اور خبر کے مطابق رہتک روشن کا مجسمہ ان سرفہرست دس مجسموں میں شامل ہے جنہیں دیکھنے والوں نے اسے کمال مہارت کے سبب بوسہ دیا۔ بوسہ دینے والوں میں 20فیصدمردشامل تھے جبکہ باقی خواتین تھیں۔یہ مجسمہ رواں سال جنوری میں نمائش کے لئے پیش کیا گیا تھا۔

واضح رہے کہ پچھلے سال شاہ رخ خان کا مجسمہ بھی ان دس مجسموں میں شامل تھا جنہیں سب سے زیادہ بوسہ دیا گیا۔