ریڈ کراس کے بین الاقوامی ادارے نے خبردار کیا ہے کہ آب وہوا کی تبدیلی دنیا بھر میں زراعت اور صحتِ عامہ کے لیے ہنگامی صورت حال میں اضافے کا سبب بن رہی ہے۔

انٹرنیشنل فیڈریشن آف ریڈکراس اور ریڈ کریسنٹ اداروں کے سیکرٹری جنرل مرکو نسکالا نے کہا ہے کہ درجہٴ حرارت میں اضافے سے پینے کے تازہ پانی میں کمی آئے گی اور دنیا کے مزید کئی علاقوں میں ملیریا جیسی بیماریوں کے پھیلاؤ میں اضافہ ہوگا۔

پیر کے روز جنیوا میں واقع ان اداروں نے متوقع بحران کے پیش نظر دوسال کی مدت کے لیے29 کروڑ 20 لاکھ ڈالر کی امداد کی اپیل کی ۔ مسٹر نسکالا نے کہا ہے کہ اس رقم کا زیادہ تر حصہ اس بحران کے پیش آنے کا انتظار کرنے کی بجائے اس کے مقابلے کے لیے تیار ی کرنے اور ان سے بچانے کی کوششوں پر مرکوز ہوگا ۔

ریڈ کراس کے عہدے داروں نے گذشتہ سال افریقہ کے چھوٹے جزائر اور ڈیلیٹا کے علاقوں میں ان بحرانوں کے مقابلے کی تیاری اور ان کے خطرات میں کمی کے پروگراموں میں اضافے کا وعدہ کیا تھا۔