رائٹرز گلڈ آف امریکہ کے ارکان ووٹ ڈال رہے ہیں

امریکی فلم اور ٹیلی وژن کے قلمکاروں نے یونین لیڈروں کی جانب سےممکنہ معاہدے کی توثیق کے بعد بڑے اسٹوڈیوز کے خلاف اپنی تین ماہ کی ہڑتال کے خاتمے کے لئے ووٹ دے دیے ہیں ۔

رائٹرز گلڈ آف امریکہ کے ارکان نے منگل کے رو ز لاس اینجلس اور نیویارک میں یونین کے دفاتر میں ووٹ ڈالے ۔

توقع ہے کہ وہ بدھ کے روز کام پر واپس چلے جائیں گے ۔

یونین کے ارکان بعد میں گزشتہ ہفتے طے پانے والے ممکنہ معاہدے کی شرائط کے بارے میں اپنی باقاعدہ رضامندی کے بارے میں ووٹ دیں گے ۔

رائٹرز گلڈ کے لیڈروں نے کہاہے کہ یہ معاہدہ اس بارے میں کئی کلیدی تنازعے طے کرتا ہے کہ قلمکاروں کو انٹر نیٹ پر دئے جانے والے پروگراموں کے لئے معاوضوں کی ادائیگی کس طرح کی جانی چاہیے ۔

نومبر میں شروع ہونے والی اس ہڑتال کے باعث ٹیلی وژن کے ان تمام پروگراموں کی پروڈکشن بند ہو گئی تھی جن کے مسودے تحریر ہوتے تھےاو ر اس سے فیچر فلموں کا کام بھی متاثر ہوا تھا۔

اندازہ ہے کہ اس ہڑتال کے باعث اسٹوڈیوز اور قلمکاروں کو لاکھوں ڈالر کا نقصان ہوا۔