Steven Spielberg

چین نے امریکی فلم ڈائرکٹر اسٹیون اسپیلبرگ کی جانب سے بیجنگ اولمپک گیمز کے آرٹسٹک مشیر کے طور پر کام کرنے سے معذوری کے فیصلے کی مذمت کی ہے۔ اس کا کہنا ہے کہ وہ سوڈان کے علاقے دار فر میں انسانیت کے بحران کے بارے میں عالمی خدشات کی تائید کرتا ہے ۔

جمعرات کے روز بیجنگ میں ایک نیوز کانفرنس میں چینی وزارت خارجہ کے ترجمان لیو جیان چھاؤ نے سوڈان میں چین کے ریکارڈ کا دفاع کرتے ہوئے کہا کہ اس نے دار فر کے مسئلے کے حل کے لیے مسلسل کوششیں کی ہیں ۔

انہوں نے یہ بھی کہا کہ کچھ لوگ بد نیتی سے کام کر رہے ہیں اور یہ کہ دار فر کو اولمپک گیمز سے منسلک کرنے سے مسئلہ حل نہیں ہو گا۔

انہوں نے کہا کہ سیاسی مسائل کو گیمز سے منسلک کرنا اولمپک کی روح سے مطابقت نہیں رکھتا اور انہوں نے اس بارے میں اپنے اعتماد کا اظہار کیا کہ وہ کامیاب ہوں گے ۔

اکیڈیمی ایوارڈ یافتہ ڈائرکٹر اسپیل برگ نے منگل کو اولمپک کا اپنا عہدہ یہ کہتے ہوئے چھوڑ دیا کہ ان کا ضمیر انہیں اس عہدے پر برقرار رہنے کی اجازت نہیں دیتا کیوں کہ ان کا خیال ہے کہ چین نے سوڈان کے مغربی علاقے کے بحران کے حل کے لیے کافی کوششیں نہیں کی ہیں ۔

اسپیلبرک کی جانب سے اپنے عہدہ چھوڑنے کا فیصلہ اسی روز ہوا ہے جب نوبل انعام یافتہ شخصیتوں ،سیاست دانوں اور اولمپک اتھلیٹوں کے ایک گروپ نے چین کو ایک خط ارسال کیا جس میں اس سے کہا گیا کہ وہ سوڈان کو دار فر کے بحران کے خاتمے میں مدد کے لیے اپنا اثر رسوخ استعمال کرے ۔